کله چې یو څوک هڅوی، کولی شي په ژوند کې بریالي شي، خو له کمې مودې وروسته له بحراني حالتونو سره مخ کېږي. که لومړی ځل او یا دویم ځل ماتې خوري، له ځان سره دوې ټاکنې لري، یا به ماتې مني او یا به مخ ته ځي.
ځینې کسان انعطاف منونکي او د ډېر استقامت درلودونکي وي. هغوی خپلو هڅو ته دوام ورکوي، څو بریا ته ورسېږي، خو ځینې کسان بیا له لومړۍ ماتې وروسته له هر څه په شا کېږي. د دې لپاره چې دغه ډول خلک وهڅوی، څو مخ پر وړاندې ولاړ شي، باید شنه څراغونه ورکړئ او د خپل باور کچه مو ور وښایاست.
په دې برخه کې یوه ښه لار دا ده چې د خپل ځان په اړه ورته ووایاست. کومې ستونزې مو تېرې کړې دي، له څه څه سره مخ شوي یاست او څه ډول توانېدلي یاست چې د یوې ستونزې لپاره حللاره پیدا کړی او ماتې ونه منی. هغوی ته دا روښانه کړئ چې بریا یو سفر او بهیر دی، نه موخه. کله چې هغوی پوه شي چې تاسو هم ماتې خوړلې، خو له ماتې وروسته بیا هم بریا ته رسېدلي یاست، بیدارېږي. دغه ډول مقابل کس پر ځان باور پیدا کوي او له ځان سره وایي چې هېڅکله هم باید ډار ته اجازه ورنه کړي، چې د لارې پر سر یې خنډ شي.
د بریا خوند په ګډه وڅکئ!
دا مه وایاست چې ماتې خوړل د پر شا حرکت یوه برخه ده. د دې لپاره چې خلک پر ځان باور پیدا کړي، باید پوه شي چې په خپل وجود کې د بریا وړتیا لري. پاور د خپل ځان په اړه وایي: «زه چې کله ماشوم وم، خپل ورور (لاري) چې له مانه دوه نیم کاله مشر و، د ځان لپاره مې اېډیال وټاکه. له مور او پلار وروسته لاري زما په ژوند کې تر ټولو اغېز ناک کس و. لاري تل یو لوی رهبر او ښه ورزشکار و، موږ به چې کله په کلي کې د فوټبال او یا باسکټبال لوبه کوله، لاري به زموږ د ټیم کفټان و. کله به چې د ټیم لپاره لوبغاړي ټاکل کېدل، زه وروستی کس وم چې انتخاب به شوم، ځکه زه تر ټولو کوچنی وم، هډور هم نه وم. خو کله چې لږ لوی شوم، لاري به زه لومړی ټاکلم او دې کار به ماته انرژي راکوله. په دې خاطر نه چې ورور مې (لاري) ماته پام کوي، بلکې له دې کبله به خوشاله وم چې د ګټونکو په ډله کې به وم. لاري هېڅکله هم بایلل نه خوښول، خپله ټوله هڅه یې کوله څو ګټونکی شي او ډېر کله به ګټونکی هم و».
ګټل په انسان کې انګېزه را پیدا کوي. ډېوېډ امبروس، رومان لیکونکی په دې اړه وایي: «که مو د ګټلو اراده درلوده، نو د بریا نیمه لار مو وهلې ده. که نه، نو د ناکامۍ نیمه لار درته پاتې ده». کله چې څوک هڅول کېږي، په بدن کې یې د بریا لپاره انرژي څپې وهي.
کله چې څوک د بریا احساس کوي:
د بریا لپاره له ځانه تېرېږي
د بریا پر لارو چارو پسې ګرځي
انرژي پیدا کوي
د لوبې پروګرام تعقیبوي
د ټیم له ټولو غړو سره مرسته کوي
کله چې څوک د ماتې احساس کوي:
له ځانه تېرېدل یې خپل وروستي حد ته را رسېږي
بهانې لټوي
ستړی کېږي
د لوبې پروګرام له پامه غورځوي
نورو ته هم د ماتې احساس ورکوي
د دې لپاره چې نورو ته د بریا احساس ورکړی، هغوی ته داسې فضا برابره کړئ، چې لومړۍ کوچنۍ بریاوې تجربه کړي. په لومړي سر کې ورته داسې کارونه او مسوولیتونه وسپارئ، چې پوهېږی تر سره کولی یې شي. له هغوی سره داسې مرسته وکړئ چې د بریا لپاره ورته اړتیا لري. لکه څه ډول چې به یوناني خطیب ویل: «کوچنۍ موکې او چانسونه د لویو کارونو د کولو لپاره لار هواروي». کله چې په تدریج سره دغه کسان پر ځان باور پیدا کړي، کولی شي په راتلونکې کې له لویو ستونزو سره مبارزه وکړي.
بریا په راتلونکې کې تصور کړئ!
پوهانو د دې لپاره چې د موږکانو انګېزه معلومه کړي، پر هغوی باندې یې یوه جالبه څېړنه کړې ده. دوی یو موږک له اوبو څخه په یو ډک لوښي کې خوشي کړ، په داسې حال کې چې کوټه کاملاً تیاره وه. موږک په لامبو وهلو شروع وکړه. موږک د اوبو په منځ کې په داسې حال کې چې کوټه کاملاً تیاره وه، لږ تر لږه دری دقیقې لامبو ووهله. په دویمه ازموینه کې پوهانو په همدې اندازه اوبو کې بل موږک خوشی کړ، خو دا ځل په دې توپیر چې یوه څه اندازه رڼایي یې کوټې ته ور پرېښوده. دوی وایي چې موږک لږ تر لږه ۳۶ ساعته د ژوندي پاتې کېدو لپاره هڅه وکړه. که دغه مطلب په موږکانو کې صدق کوي، نو وګورئ چې که انسان هم په خپله راتلونکې کې د بریا لپاره لږ نښه نښانه وویني، څومره هڅه به وکړي. وایي، انسان لږ تر لږه څلوېښت ورځې پرته له خوړو، څلور ورځې پرته له اوبو او څلور دقیقې پرته له اکسیجن څخه ژوندی پاتې کېدای شي؛ خو که هیله یې پرې شي، څلور ثانیې هم ژوندی نه شي پاتې کېدای.
د المان پخوانی لومړی وزیر وایي: «سمه ده چې موږ ټول تر یوه اسمان لاندې ژوند کوو، خو ګډه روښنایي نه لرو». د یوه رهبر په توګه له نورو سره مرسته وکړئ، څو خپل اوسني حالت ته وګوری، په هیلو کې ډوب شی او ځان د راتلونکو بریاوو په منځ ګې احساس کړی.
د ښې راتلونکې د لرلو لپاره باید خپل لیدلوري ته هم بدلون ورکړئ. دنیس ویتلي وایي: «هېڅوک د بریا لپاره په برابرو شرایطو کې نه پیدا کېږي. هر څه په لیدلوري پورې اړه لري. لیدلوری د بریا معیار دی». کله چې د یو چا لیدلوری بدلون کوي، له شک او تردید څخه وځي، پر ځان باور ته رسېږي او ژوند یې ښه کېږي.
