جنرال عبدالرازق په ۱۳۵۸ لمریز کال کې د کندهار ولایت په سپین بولدک ولسوالۍ کې زېږېدلی دی. نوموړی په قوم اڅکزی و او پلار یې د کمونیستي حکومتونو پر مهال د مجاهدینو ترڅنګ د وخت له حکومت سره جنګېده. په ۱۹۹۴ ز کال کې طالبانو د جنرال رازق پلار او تره ووژل او تر څه مودې پورې خپله رازق هم له هغوی سره بندي و چې وروسته له بند څخه په تېښته بریالی شو. رازق وروسته د طالبانو له مخالفانو سره یو ځای شو او تر څه مودې پورې یې له هغوی سره جګړه وکړه. د طالبانو حکومت له ړنګېدو وروسته رازق د حامد کرزي له حکومت سره یو ځای شو او په سپین بولدک کې د سرحدي پولیسو مشر وټاکل شو. له نوموړي څخه درې مېرمنې، پنځه لوڼې او اووه زامن پاتې دي.
جنرال عبدالرازق په لومړي سره کې د یوې پوستې قوماندان و، وروسته په کندهار کې د سرحدي پولیسو قوماندانۍ ته ورسېد او له هغې وروسته په ۲۰۱۱ ز کال کې د کندهار امنیه قوماندان وټاکل شو.
د کندهار تر څنګ، جنرال عبدالرازق په ارزګان، هلمند او زابل ولایتونو کې هم د پوځي عملیاتو مشري کوله.
جنرال رازق په هېواد کې له پېژندل شویو څېرو څخه و او د پاکستان پر وړاندې یې سخت دریځ درلود.
نوموړی د خپل جګړه ییز مهارت، شخصي او قومي اړیکو پر مټ د سیمې له مشهورو شخصیتونو څخه و او د وژل کېدو تر مهاله د کندهار د امنیه قوماندان پر څوکۍ پاتې شو. جنرال رازق په ۲۰۰۸ ز کال کې لومړی ځل د بهرنیو ځواکونو له ملاتړ پرته د کندهار په محله جات کې د افغان ځواکونو خپلواک عملیات ترسره کړل. رازق په ۲۰۱۱ ز کال کې د کندهار د پخواني امنیه قوماندان خان محمد مجاهد له وژل کېدو وروسته د هغه د ځای ناستي په توګه وګومارل شو. د امنیه قوماندان په توګه د کندهار امنیت په ټینګښت کې د نوموړي رول خورا مهم بلل کېده. جنرال رازق د طالبانو سخت مخالف و او د دې تر څنګ د پاکستان پر ضد د توندو نیوکو او څرګندونو له کبله هم مشهور و.
جنرال عبدالرازق مخکې له دې چې د کندهار د امنیه قوماندان دنده ور وسپارل شي، د هېواد په سرحدي ځواکونو کې د وطن د یوه زړور قوماندان په توګه د وسله والو په مخنیوي کې ډېر مهم رول درلود. د هغه د زړورتیا او پوهې په نظر کې نیولو سره په ۱۳۹۰ لمریز کال کې د کندهار د پخواني امنیه قوماندان خان محمد مجاهد تر وژل کېدو وروسته، د سرحدي پولیسو د قوماندانۍ تر څنګ، د کندهار د امنيه قوماندانۍ مسوولیت هم ور وسپارل شو. د نوموړي تر ټاکل کېدو وروسته د کندهار ولایت امنیتي وضعیت چې په ډېر بد حالت کې و، تر پخوا ښه او د ډاډ وړ شو.
نوموړي څو څو ځله د هېواد د مختلفو اشخاصو په اړه توندې نیوکې او څرګندونې هم کړې دي. نوموړي په ۲۰۱۶ ز کال کې په کابل کې د برهان الدین رباني د مړینې په تلین کې د خلکو تر ویناوو وروسته په کندهار کې له رسنیو سره په خبرو کې په ډېره تونده لهجه وویل، هر څوک دې خلکو ته بې ځایه د ملي قهرمان لقبونه نه ورکوي او که چېرې داسې وي، نو بیا تر ملا عمر او ملا داد الله ستر مجاهدین نشته او باید د هغه لپاره هم ورځې ځانګړې شي.
د رازق په تړاو په لومړیو وختونو کې د هېواد په شمال کې چندان ښه نظر موجود نه و، خو له یو څه مودې وروسته بیا جنرال رازق یو څه خپل دریځ بدل کړ چې د وخت په تېرېدو یې په ۲۰۱۸ ز کال کې د حکومت او عطا محمد نور تر منځ په اړ او دوړ کې د عطا محمد نور پلوي وکړه.
نوموړي د عطامحمد نور تر څرګندونو وروسته چې ویل یې حکومت یې له بلخ ولایت نه د لرې کولو وړتیا نه لري او له یاد ولایت نه د نوموړي د تګ فیصله به جمیعت ګوند کوي وویل: «حکومت د یوې هوکړې له مخې رامنځته شوی او د دې وړتیا نه لري چې څوک له دندې لرې او یا یې وګماري.»
دا د نوموړي او حکومت تر منځ لومړی او وروستی جنجال نه و. دغه راز په نوموړي د بشري حقونو د کمېسیون له خوا هم تورونه وو چې شخصي زندانونه لري. رازق په تښتونو، ځورونې او بشر ضد جرمونو هم تورن و، خو هغه تل دغه تورونه ردول.
څه موده وړاندې د جنرال رازق په مشرۍ ځواکونو پر ډېورنډ کرښه له پاکستاني ځواکونو سره هم سخته جګړه وکړه. جنرال رازق د پاکستان ضد سخت دریځ درلود. نوموړي ډېری وخت له رسنیو سره په مرکو کې پاکستان د افغانانو سرسخت دښمن بللی او تل یې دا خبره کړې، تر هغې چې د پاکستان لاسونه تر افغانانو پورې رسېږي، افغانان ښه ورځ نه شي لیدلی.
جنرال عبدالرازق د افغانستان په کچه یو زړور قوماندان و چې په راتګ سره یې په ټولې جنوب لوېديځې حوزې کې امنیتي حالت ښه شو. د رازق په شهادت نه یوازې د کندهار ولایت اوسېدونکي خواشني وو او د ده نه موجودیت یوه لویه ضایعه بلله، بلکې په ټول هېواد او د هېواد څخه د باندې ټولو افغانانو د ده په شهادت خواشیني څرګنده کړې او دی يې د ملت یو زړور قوماندان او نه جبرانېدونکې ضایعه بللې ده. د هېواد د ولسمشر په ګډون د افغانستان د ختيځ څخه تر لوېديځ او له شمال څخه تر جنوبه ټولو قومي مشرانو، علماوو، پوځي قوماندانانو، جهادي او ملي شخصیتونو او عامو خلکو د خواشنۍ مراتب خپاره کړل او د ده شهادت يې د هېواد لپاره نه جبرانېدوکې ضایعه وبلله.
د شهید ستر پاسوال عبدالرازق په اړه مو د کندهار بېلابېل شخصیتونه وغږول او ټولو په يوه اواز ویل چې شهید یو زړور، تجربه کاره، په کار پوه او باتدبیره نظامي مسوول و چې هېڅکله يي د دښمن پر وړاندې ماته نه منله او تل يې د خپل سره په بیه د خپلې خاورې او خلکو ساتنه کوله. د دوی له قوله، شهید رازق په ډېر لوړ مورال د مخالفینو مقابله کول او په هر میدان کې يې وسله والو مخالفینو ته سخته ماتې ورکوله. خلکو دا هم ویل چې ستر پاسوال شهید عبدالرازق په کندهار کې د ټولو خلکو ستونزو ته رسیده ګي کوله او د امنیتي چارو تر څنګ د کندهار د خلکو د اساسي ستونزو د حل په لټه کې و او تل يې خلکو ته په ورین تندي ځواب ورکاوه او د ستونزو په حل کې يې هر اړخیزه همکاري کوله.
جنرال عبدالرازق تل د دښمن د شومو پلانونه په مخنیوي کې بریالی او تل د دوی د سترګو اغزی و، نو له همدې امله دښمن هم تل د هغه دله منځه وړلو په هڅه کې و. نوموړي په دې اړه له رسنیو سره په خبرو کې ویلي: «تر پنځه دېر شو ډېرې حملې را باندي شوې، داسې چې موټر مې په راکټ لګېدلی، داسې چې موټر مې پر ماین ختلی، په کمین کې راګیر شوی یم او انتحاري حملې را باندي شوې دي.» له دې ټولو سره سره به نوموړی تل دخدای ج په فضل او د خپلو خلکو د دعاوو په برکت وژغورل شو. بالاخره لوی پاسوال عبدالرازق د هېواد او خلکو د دښمنانو په یوه شومه دسیسه کې د ۱۳۹۷لمریز کال د تلې د میاشتې په ۲۶ مه نېټه شهید او د اجل داعيې ته یې لبیک ووایه او جنازه یې د کندهار ښار او ولسوالیو د زرګونو اوسېدونکو، د هېواد له بېلابېلو ولایتونو څخه ګڼ شمېر مشهورو څېرو، د ولسي جرګې غړو، د هېواد سیاسي او جهادي شخصیتونو، علماوو، سپين ږیرو، ځوانانو، قومي مشرانو او د شهید ګڼ شمېر دوستانو په ګډون د کندهار ښار د خرقې شریفې په انګړ کې په یو لړ خاصو مراسمو کې خاورو ته وسپارل شوه.
