له نېکه مرغه په دې وروستيو کې د افغان دولت او طالبانو ترمنځ د زندانيانو د تبادلې لړۍ چټکه شوې او له خلکو سره يوځل بيا ددايمې سولې او پخلاينې په اړه هيلې پيدا شوې.
خدای (ج) دې دا کار په هېواد کې د دايمي سولې او امن لامل کړي او نور دې هېڅ افغان د خپلو خپلوانو غم ونه ويني.
خو يوه جدي اندېښنه د کرونا ويروس احتمالي خپرېدل دي چې بايد پام ورته وشي.
دې ته په پام سره چې اوس کرونا ويروس په هېواد کې په پراخه کچه خپور شوی چې له طبي ازموينې مخکې هېڅوک نه پوهېږي چې څوک روغ دی او څوک پر کرونا ويروس ککړ دی.
دولتي سرچينو خو آن په خپلو زندانونو کې هم د ياد ويروس شتون تاييد کړی، خدای خبر چې د طالبانو تر کنټرول لاندې زندانونو کې به د کرونا ويروس وضعيت څه ډول وي.
په افغانستان کې د ښکېلو لوريو ترمنځ اوږدې جګړې او دښمنيو ته په پام سره دا احتمال هم له پامه نشي غورځېدای چې طرفين له کرونا ويروس څخه د وسلې په توګه استفاده وکړي او په بنديانو کې يې په قصدي ډول مقابل لوري ته ولېږي.
اوس چې د دواړو لوريو دوه يا درې زره بنديان د هېواد بېلا بېلو سيمو کې خپلو کورنيو سره يو ځای کېږي، که داسې وګڼو چې هر بندي د کورنۍ پنځه غړي لري او دغه راز هر بندي ته د هرکلي لپاره د سيمې او کلي څخه لږ تر لږه سل کسان ورځي، نو که خدای مه کړه يو زنداني په کرونا ويروس اخته وي، څو کسان به ناروغ شي؟
طبيعي خبره ده چې د زندانيانو د احتمالي ناروغۍ په صورت کې به په لومړي قدم کې د يادو کسانو د کورنيو غړي او هغه کسان چې دوی ته هرکلي ته ورځي په کرونا اخته شي او په دې توګه به په هېواد کې د کرونا روان بحران څو چنده زيات شي.
نو دې خطرونو ته په پام سره ښکېل لوري، بنديان او ددوی کورنۍ، خپلوان او کليوال بايد دې موضوع ته جدي پاملرنه وکړي .
د طبي سرچينو هداياتو ته په پام سره، هم طالبان او هم دولت بايد خپلو بنديانو ته تر زندان پورې تعقيم کړی شوي موټر ور واستوي، بنديانو ته ماسک، جامې او هرڅه چمتو کړي او ياد کسان دې لومړی د يوې ټاکلې مودې لپاره قرنطين کړي او اجازه دې نه ورکوي چې د کورنۍ له غړو يا له نورو کسانو سره وګوري.
بنديان او د هغوی د کورنۍ غړي او کليوال دې هم د کرونا ويروس وقايې ته جدي پاملرنه وکړي هسې نه چې خدای مه کړه خوښي يې په خپګان بدله شي.
