د افغان سولې په تړاو د مسکو غونډه د راتلونکې جمعې په ورځ کېږي. دا غونډه چې ټاکل شوې وه، څه وخت وړاندې شوې وی، خو د ملي یووالي حکومت په غوښتنه ځنډېدلې وه. اوس روسي چارواکو ویلي چې د افغانستان حکومت او طالبانو په دې غونډه کې له ګډون سره موافقه کړې ده، خو حکومت وايي چې له روسیې سره په مسکو کې د افغانستان د سولې په اړه د غونډې پر دقیق وخت او څرنګوالي مو افقه نه ده شوې. له دې سره داسې رپوټونه هم خپاره شوي چې مسکو ځینو افغان سیاستوالو ته هم بلنه ورکړې ده چې په دې غونډه کې برخه واخلي.
د ملي یووالي حکومت پر دوو دلایلو د دې غونډې د ځنډ غوښتنه کړې وه. لومړی دا چې د دې غونډې د مشرۍ په اړه بحث وشي او معلومه شي چې مشري به یې څوک کوي. دویم دا چې په دې غونډه کې به د بحث موضوع او ډول څرنګه وي. حکومت څو ورځې وړاندې د سولې عالي شورا د دار الانشاء رییس اکرم خپلواک او د بهرنیو چارو وزارت اداري مرستیال نصیر اندېشه مسکو ته د خبرو اترو لپاره لېږلي وو. له دې سفر وروسته د بهرنیو چارو وزارت ویلي وو چې دغه خبرې کومې ښکاره پایلې ته نه دي رسېدلې.
د افغانستان حکومت غوښتنه لري چې د دې غونډې مشري باید د افغانستان په لاس کې وي، خو دا هغه څه دي چې که یې مسکو ومني، نو طالبان به په غونډه کې ګډون ونه کړي. وسله وال طالبان له افغان حکومت سره خبرې نه کوي او بیا که د حکومت په مشرۍ غونډه جوړېږي، نو دوی پکې ګډون ته تیار نه دي. له همدې امله د ملي یووالي حکومت دا غوښتنه هم نه ده منل شوې. له بله اړخه حکومت غواړي چې په دې غونډه کې وسله وال مخالفین مخامخ له حکومت سره خبرې وکړي، خو طالبان بیا په دې غونډه کې بېله اجنډا لري. دوی د حکومت نوم نه اخلي، له امریکا سره پر خبرو ټینګار کوي او د سیمې له هېوادونو غواړي چې د دوی د دریځ ملاتړ وکړي. دا هغه څه دي چې نه طالبان ترې تېرېږي او نه یې هم د ملي یووالي حکومت منلو ته تیار دی.
له بله اړخه د ملي یووالي حکومت پر دریځ د امریکا سیوری هم خور دی. مسکو له وړاندې په دې غونډه کې خپل ګډون رد کړی او ویلي یې دي چې دوی یوازې د هغو هڅو ملاتړ کوي چې مشري یې افغانان کوي. کله چې امریکا ګډون ونه کړي، نو له یوه اړخه به د ملي یووالي حکومت د ګډون جرئت ونه کړي او له بله اړخه به دا ګډون ارزښتمن هم نه وي. امریکا نه غواړي چې د افغانستان د جګړې او سولې بحث د بل چا په رهبرۍ او مدیریت وشي. له بله اړخه ښايي دوی په داسې غونډو کې له جدي پوښتنو او غوښتنو سره مخ شي، نو ځکه غوره ګڼي چې ګډون پکې ونه کړي.
له بده مرغه د امریکا سیاستونه او د حکومت کمزوري د دې سبب شوې چې په دې غونډه کې د ملي یووالي حکومت ګډون او نه ګډون دواړه زموږ په زیان شي. که حکومت ګډون نه کوي، نو په سیمه ییزه کچه منزوي کېږي او که ګډون کوي، نو داسې یوې غونډې ته به مشروعیت ورکړي چې دوی پکې تر پښو لاندې کېږي او طالبان پکې د خپل قدرت او مشروعیت ننداره وړاندې کوي.
