رولکس کمپنۍ د نړۍ تر ټولو ستره کمپنۍ او مشهور برنډ دی. دغه کمپنۍ په نړۍ کې د ساعت د تولید تر ټولو مشهور او ستر برنډ دی. د رولکس کمپنۍ تاریخچه د هانس ویلسدورف له نامه اخیستو پرته نه شو لوستلی. هغه لومړنی کس و چې د دې کمپنۍ بنسټ یې کېښود. هغه په ۱۹۰۵ کال کې په ۲۴ کلنۍ کې په لندن کې د ساعت جوړولو یو ځانګړی شرکت جوړ کړ. تر ده وړاندې پر لاس د تړل کېدونکو ساعتونو یا لاسي ساعتونو جوړول نه وو دود شوي، هغه هڅه وکړه څو داسې ساعت جوړ کړي چې په لاس وتړل شي. ده ده موخه یوازې دا نه وه چې په لاس تړل کېدونکی ساعت جوړ کړي؛ بلکې هڅه یې کوله چې هغه باید ښایسته وي او د زېور په توګه ورڅخه کار واخیستل شي. تر دې دمه پر دغو ساعتونو خلکو باور نه درلود، خو هانس خپله هڅه ثابته کړه او خلکو ته یې وښوده چې هر څه کولی شي. هغه هڅه وکړه څو خلک باوري کړي چې په لاس تړل کېدونکي ساعتونه هم د نورو په شان کار کوي او ګټور دي. نو د همدې لپاره یې د یوه سویسي شرکت له لارې د دغو ساعتونو جوړول پیل کړل.
هانس غوښتل د خپل دغه تولید کېدونکي ساعت لپاره نوم انتخاب کړي، ده هڅه کوله څو داسې یو نوم انتخاب کړي چې هم لنډ وي او هم یې خلکو ته یادول اسانه وي او له بلې خوا خوله په خوله شي او تر ټولو ورسېږي. ده یوه بله موخه هم لرله، هغه دا چې دا نوم باید پر ساعت ښکلی ښکاره شي. هغه هڅه وکړه چې څو توري څنګ تر څنګ کېږدي څو یو ښکلی نوم ترې جوړ شي. هغه په دې توګه سل نومونه جوړ کړل، خو یو یې هم خوښ نه شو، تر دې چې یو سهار په لندن ښار کې روان و او د رولکس نوم یې واورېد، همدې یې په غوږونو کې موسیقي تولید کړه، خوند یې ورکړ او د دې ساعت نوم رولکس شو.
رولکس د نړۍ تر ټولو ښه ساعتونه دي. رولکس ساعتونه په سویسي کمپنۍ کې تولیدیږي. تاسې به اورېدلي وي چې سویس د ساعتونو په تولید کې نړیوال نوم لري، نو رولکس هم په همدې ښار کې فعالیت او تولیدات لري. د رولکس کمپنۍ شعار دی «په لوړ عمل»، په دې مانا چې تر خپلې وروستۍ هڅې به خپل کار په ښه توګه تر سره کوي. د رولکس د کیفیت یو لامل دا دی چې له ځانګړي فلز کار اخیلي. دوی له ال ۹۰۴ مډل سټيل ګټه اخلي. د نړۍ بله هیڅ کمپنۍ له دغه فلزه په خپلو ساعتونو کې کار نه اخلي، دوی ټول ال ۳۱۶ سټیل کاروي، ښايي پوښتنه درته پیدا شي چې ولې نو نورې کمپنۍ له دې موادو ساعتونه نه تولیدوي؟ ځواب یې دا دی چې دا فلز خورا ګران بیه دی. بل دلیل یې دا دی چې له دې موادو د ساعت جوړول ځانګړي ماشینونه غواړي چې هغه بیا تر دې فلز ګرانبیه دي او له رولکس پرته له بل چا سره دغه ماشینونه نشته، ځکه همدې کمپنۍ پخپله ځان ته تولید کړي دي او یوازې دوی یې کاروي.
فوربز مجلې په ۲۰۱۶ کال کې رولکس شرکت د نړۍ ۶۴م غوره شرکت وباله. دوی ورسره لیکلي وو چې د نړۍ په ۱۰۰ غوره قدرتمنو او پیاوړو برنډونو کې ۶۴م ځای د رولکس دی. ښايي تاسې ته هم په زړه پورې وي چې د ساعت په نړۍ کې نو بیا دا برنډ ډیر پیاوړی دی. هره ورځ د ۲۰۰۰ په شاوخوا کې ساعتونه تولیدوي. کارکوونکي یې دومره نه دي، یوازې ۲۸۰۰ کسان په دغه شرکت کې کار کوي، خو ټول پر کار پوه او پیاوړي کسان دي. کلنۍ ګټه یې تر ۵ میلیاردو ډالرو رسېږي.
رولکس کمپنۍ د خپل کار په موخه کې ډېرې بریاوې خپلې کړې دي. دوی د نړۍ لومړنی د اوبو ضد ساعت په ۱۹۲۶ کال کې جوړ کړی دی. همداسې دوی د لومړي ځل لپاره په ۱۹۴۵ کال کې د تاریخ لرونکی اتومات ساعت جوړ کړ. پوهېږئ، دوی لومړنی داسې ساعت جوړ کړ چې ۱۰۰ متره یې تر اوبو لاندې کار کاوه، دا کار یې په ۱۹۵۳ کال کې وکړ او د دغه ساعت نوم یې هم پېرپتوال و.
رولکس کمپنۍ ورځ تر بلې وړاندې روانه وه. دوی د خپل کار د کیفیت لپاره د هانس په مشرۍ پوره پوره هڅه کوله. په هغه ورځ چې د رولکس د اوبو ضد ساعت ازمویل کېده، دا ورځ دوی ته ډېره سخته وه؛ ځکه یو وخت چا داسې فکر نه و کړی چې د انسان په لاس به ساعت وي، دا فکر خو یې هېڅ نه وکړی چې دا ساعت به تر اوبو لاندې هم کار کوي. ۱۹۲۶ کال و، د وخت مشهور لامبوزن مرسدس ګلانیتزن رولکس ساعت په لاس کړ او ویې ویل چې پوره لس ساعته باید دغه ساعت په اوبو کې خپل کار وکړی شي. هغه اوبو ته کښته شو او د مانش په کانال کې یې په لامبو پیل وکړ. لس ساعته وروسته رولکس کمپنۍ د خپلې سترې بریا خوشالي ونمانځله، ساعت بریالی راووت او رولکس کمپنۍ د یوه ستر شهرت خپلولو ته ځان تیار کړ. هما ورځ وه چې رولکس د خلکو خولو ته ولوېد، په نړۍ کې یې خپل ځای پیدا کړ. په سبا یې د رولکس نوم د نړۍ د ورځپاڼو په سر کې و، د میاشتو لپاره د ډېری ورځپاڼو او نشریو سرخط د رولکس کمپنۍ بې ساري بریا وه.
رولکس کمپنۍ د خپلو ساعتونو د تولید لپاره هڅه کوله، دا کمپنۍ همدلته ونه درېده، دوی هڅه کوله چې تر دې د ډېرې وړتیا لرونکي ساعتونه جوړ کړي. د رولکس کمپنۍ ساعتونه بېل ډولونه لري، خو په ټولیزه توګه په دریو برخو وېشل کېږي. پروفشنل، آیسټر پېرپېټل او سیلیني یې هغه مهم دي.
ایر کینګ د رولکس تر ټولو ساده او ارزانه ساعت دی. دغه ساعت د کمپنۍ له جوړېدو سره یو ځای په لومړنیو کلونو کې جوړ شو او د دې ساعت د جوړېدو موخه دا وه چې باید په فضا او هوا کې هم کار ورڅخه واخیستل شي. ایر کینګ په ۱۹۳۰ کال کې د انګلیس د حرفهيي پيلوټانو لخوا وکارول شو. دا ساعت ساده دی، خو دا چې بیه یې یو څه ټيټه ده، نو ډېر خلک کولی شي هغه واخلي.
رولکس ډېټ یې بل ساعت دی، یو څه اېیر کینګ ته ورته دی، خو توپير یې دا دی چې نېټه هم ښيي. په ۱۹۵۰ کال کې جوړ شوی دی او کولی شي د اوبو پر وړاندې تر ډېره مقاومت وکړي. همدا ساعت دی چې پوره ۱۰۰ متره تر اوبو لاندې کار کوي.
رولکس اکسپلور، لکه له نامه یې چې ښکاري د سیلانیانو لپاره جوړ شوی دی. دا ساعت د هغو کسانو لپاره جوړ شوی چې له سیل او سفر سره مینه لري، ځکه دا سات له ۲۰ تر ۴۰ درجو حرارت په مقابل کې ښه کار کولی شي. کله چې د لومړي ځل لپاره د ایورست لوړه څوکه فتح کېدله، نو د دې څوکې فاتح ايډمونډ هیلاري رولکس اکسپلورر ساعت په لاس درلود. دغه ساعت په ۱۹۵۴ کال کې جوړ شوی دی. د دغه ساعت بل موډل بیا رولکس اکسپلورر ۲ نومېږي، چې په ځانګړې توګه هغو کسانو ته طراحي شوی، چې په غارونو کې څېړنې او فعالیت کوي.
رولکس سوبمارینر بیا د دغه کمپنۍ بل ساعت و، تر ډېره په اوبتلونو کې کارېدو، تر اوبو لاندې یې په پوره قوت کار کاوه، دا موډل کولی شي ۳۰۰ متره تر اوبو لاندې کار وکړي. جیمز باند په خپلو ډېرو فلمونو کې له دغه ساعت استفاده کړې ده.
رولکس په لومړنیو کلونو کې ډېره هڅه کوله چې خپل ساعتونه په بېلو برخو کې و ازمويي. دوی کوښښ وکړ چې د اویسټر ساعت وړتیاوې په بېلو برخو کې وازمويي، له همدې امله یې دا ساعت په سپورت، هوانوردۍ، موټر چلونې او کشفي سفرونو کې و ازمویه. دوی د ساعتونو د ارزونې او ازمېښت لپاره یو منظم ازمېښت ځای جوړ کړ. دوی په دغه ځای کې بې شمېره څېړنې او ازمېښتونه تر سره کړل. دا لړۍ تر نن پورې روانه ده، دوی هر ساعت بېل بېل د اوږدې مودې لپاره په دغه ازمېښت ځای کې ازمويي او وروسته یې مشتري ته سپاري.
رولکس په ۱۹۳۰ کال کې د خپلو ازمېښتونو په لړ کې وغوښتل څو په لوړ سرعت د خپل ساعت کاري وړتیا وګوري. نو له همدې امله یې د هغه وخت تر ټولو پیاوړي موټر چلوونکي سېر مالکوم کمپبل ته خپل ساعت ورکړ، څو په تر ټولو لوړ سرعت کې هغه و ازمويي او وګوري چې کوم بدلون پکې راځي او که نه. هغه د ۱۹۳۵ کال د سپټمبر په ۴مه د بلوبرد شترینګ ته کېناست، په دې وخت کې نوموړی د سرعت د پادشاه په نامه مشهور و، هغه په نړۍ کې ۹ ځله د لوړ سرعت ریکارډ خپل کړی دی. هغه د دغه ساعت ازموینه وکړه او تر اوږده او چټک سرعت وروسته هم په ساعت کې کوم تغیر را نه غی. نو له خلکو دا وېره هم لرې شوه چې که مو ساعت په لاس وي او موټر کې سپاره وو، ښايي د سرعت په تغییر د هغه په ماشین کې تغییر راشي او وخت ناسم وښيي. وروسته کمپبل رولکس ته یو لیک ولېږه او په هغه کې یې مننه ترې وکړه، لیکلي یې وو بې جوړې ساعت دی.
رولکس اوس هم د نړۍ په کچه د ساعت جوړلو پیاوړې کمپنۍ ده. د اروپايي ټولنې د هستوي څېړنو د مرکز سيرن د معلوماتو له مخې، د رولکس ساعتونه کولی شي د ۱۰۰۰ ګاوس په قوت په مقناطیسي محیط کې عادي کار وکړي. دغه مرکز تر ډېره په ذره وي او مقناطیسي مسایلو کې څېړنه کوي. دوی له ۱۹۵۰ کال راهیسي په بېلو مرحلو کې د رولکس ساعتونه له بېلو اړخونو ارزولي دي، خو تر دې دمه بریالي راوتلي دي.
د وخت چټک موټر چلوونکی کمپبل د رولکس په اړه وايي: «د خوبونو د رښتیا کولو لپاره باید مبارزه وکړئ، باور ولرئ چې بریا ستاسې ده، هره ورځ مبارزه وکړئ، یوازې مبارزه او هڅه مهمه نه ده، د خپلې بریا لپاره اړین وسایل هم برابر کړئ. زه د تینیس په نړۍ کې فعال یم، اتل یم خو ځان ته تر ټولو مهم اصل وخت ښيم، له همدې امله ما په بېلو وختونو کې له رولکس ګټه اخیستې ده، رولکس زما خوب دی، د تینس په نړۍ کې مې هغه ملګری دی چې ښکلا او غرور یې را بښلی دی.
رولکس جی ام ټی ماسټر مې نږدې ۵۵ کاله مخکې اخیستی دی، هغه وخت زه په اردو کې وم، زما ډېر خوښ و، خو تر نن پورې دا دی راسره دی، نن مې دغه نندارتون ته راوړی دی، زما د ځوانۍ تر ټولو ستر او مهم ساعت و، زما ډېره هیله وه چې دغه ساعت واخلم، غوښتل مې چې یوه ورځ کور ته ولاړ شم او رولکس ماسټر ماډل مې په لاس وي، خو یوه ورځ مې واخیست، اوس هم دا دی ۵۵ کاله تېرېږي، خو لا هم کار کوي او روان دی. د اخیستو بېل، ضمانت خط او هر څه مې یې ساتلي دي، ځکه ډېر راته مهم و او په ډېره مینه مې اخیستی و. تر نن پورې مې نه پلورلی او نه یې پلورم. په هغه وخت کې مې په ۱۲۵ ډالره اخیستی و، زما معاش هغه وخت په اردو کې ۱۰۰ ډالره و.»
