جو تاو د چين د هه بۍ ولايت اوسيدونکی دی، نوموړی کابو لس کاله کيږي، چې په بېجينګ کې کار کوي او همدلته له خپلې مېرمنې او دوو ماشومانو سره د ژوند شپې او ورځې تېروي. نوموړی هر کال پسرلنی اختر خپل ټاټوبي ته وړي او هلته يې له خپلو خپلوانو او کليوالو سره يو ځای لمانځي، خو سږ کال يې له خپلې مېرمنې سره پرېکړه وکړه، چې سږنی پسرلنی اختر په بېجينګ کې ولمانځي او همدلته پاتې شي.
نوموړي وويل، دولت خلک هڅوي، چې د کورونا وبا د وقايې لپاره د پسرلني اختر په موده کې په خپلو ځايونو کې پاتې شي او د کار په ځای کې اختر ولمانځي. زه له دولت ملاتړ کوم، زه او کورنۍ به مې په بېجينګ کې پاتې شو. ډېر ملګري مې همدلته پاتې دي، نو د اختر په موده کې به د يوازيتوب احساس ونه لرو، خو د افسوس وړ خبره دا ده ،چې له پلار او مور سره به ونه ګورم، خو بيا هم له دوی سره هره ورځ وېډيويي خبرې کوم، نو دومره ستونزه نشته.
ډېرو چينايانو د ښاغلي جو په څېر انتخاب کړی او په خپلو ځايونو کې پاتې شوي دي. دوی دا انتخاب په اسانۍ نه دی کړی، ځکه پسرلنی اختر يعنې نوی کرنيز کال د چينايانو لپاره تر ټولو مهم دوديز اختر دی او زياتره چينايان د دې اختر د لمانځنې لپاره خپل ټاټوبي ته ځي او له خپلو کورنيو سره يې يو ځای لمانځي، نو د هر کال د پسرلني اختر په موده کې په چين کې ټرانسپورتي شبکه تر ډېر فشار لاندې وي او دغه وخت په نړۍ کې د انسانانو تر ټولو لويه پيمانه لرونکی تګ راتګ پيل کيږي.
چين په تېر۲۰۲۰ کال کې تر نورو وړاندې په خپل هېواد کې کورونا وبا ښه کنټرول کړې او د نړۍ يوازينی هېواد دی، چې په اقتصادي وده کې يې زياتوالی موندلی دی. د دې ترڅنګ چين د کورونا وبا پر وړاندې مبارزه کې ډېرې تجربې لري، نو ځکه د دې هېواد په هر ځای کې چې د کورونا مثبتې پېښې پکې زياتې وي، ډېر ژر يې تر کنټرول لاندې راولي. د وبا ضد جدي او اغېزمن اقدامات او له دولت سره د عامو خلکو همکارۍ په دغه هېواد کې د وبا د ښه کنټرولېدو مهم لامل ګڼل کيږي. دولت ځکه خلک هڅوي، چې سږنی پسرلنی اختر په خپلو ځايونو کې تېر کړي، چې د کورونا وبا پر وړاندې د مبارزې بريا وساتي.
د دولت دغې غوښتنې يوځل بيا د خلکو ملاتړ ترلاسه کړی دی. سږ کال د اورګاډو په سټېشنونو او هوايي ډګرونو کې مسافرين د پخوا په پرتله ډېر کم ښکاري. د چين ټرانسپورټي ادارې وړاندوينه کړې، چې د سږني پسرلني اختر په موده کې به د مسافرينو شمېر د تېر کال د همدې مودې په پرتله ٪۲۰ کم وي. يوه سروې هم ښيي، چې تر ۷۷٪ ډېرو کارکوونکو پرېکړه کړې، چې د مزدورۍ په ځايونو کې به پاتې او پسرلنی اختر به ولمانځي.
هوانګ جيوان د چين د شمال هې لونګ جيانګ ولايت اوسيدونکې ده او اوس په بېجينګ کې په يوه شرکت کې کار او ژوند کوي. نوموړې د تېر کال د وروستۍ اونۍ په پای کې يوه سوپر مارکيټ کې د پسرلني اختر د لمانځنې په پار شيان واخېستل. نوموړې وايي، ما همدلته اختر تېر کړ، کومه ستونزه نه لرم. زه کولی شم خپلې کورنۍ سره ويډيويي خبرې وکړم او دوی ته د اختر مبارکي ووايم. نن مې مېوې او د ژوند اړين توکي واخيستل، بيه يې مناسبه او له عادي وخت سره برابره ده ، ما ډېر توکي واخيستل او د اختر په موده کې به يې وکاروم.
د اختر په موده کې د خلکو د ژوند لپاره په بازارونو کې د کافي مالونو غرضه او د توکو ثابتې بيې ډېرې مهمې دي. د چين حکومت او تصديو پدې برخه کې ډېر چمتووالی نيولی دی. د چين دولت رئيس شي جين پينګ له پسرلني اختر مخکې د دغه هېواد له ګوی جو ولايت څخه د ليدنې پر مهال يوه سوپرمارکيټ ته ورغی او هلته يې د توکو د بيو وضعيت له نږدې وکاته.
د چين حکومت د تګلارو په رڼا کې د ډېرو ځايونو اوسېدونکو ته د اختر په موده کې د ژوند اسانتياوې برابرې شوې دي. د بېلګې په توګه، ډېرو مغازو خلکو ته د توکو اخيستلو پر مهال تخفيفونه اعلان کړي، حکومتي ادارو له خلکو سره د کور کرايو کې مرسته کړې، مخابراتي شرکتونو مشتريانو ته د انټرنېټ کارونې وړيا کڅوړې اعلان کړي، تصديو خپلو کارکوونکو ته د اختر د تېرولو لپاره پيسې ورکړي او باغونو خلکو ته ټکټونه ډالۍ کړي دي.
د بېجينګ اوسېدونکې اغلې ګوه وايي، زه په يوه حکومتي اداره کې کارکوم، زمونږ ادارې خپلو کارکوونکو ته د فلمونو ټکټونه ورکړي او هغو کارکوونکو ته چې وادونه يې نه دي کړي، خوراکي توکي ډالۍ کړي، چې پکې د (جياو ځه) او (مان تو ) په نوم دوديز خواړه او غوښې هم شامل دي، څو دوی د پسرلني اختر په رخصتيو کې ښه ډوډۍ وخوري.
د مېرمنې ګوه خاوند وايي، د بېجينګ ټول دولتي باغونه د ښاريانو پر وړاندې وړيا پرانېستل شوي، نوموړی درېو باغونو ته د تګ اراده لري او کورنۍ سره به په ګډه له باغونو سيل وکړي. نوموړي وويل، زما په اند دا ډول اقدامات ډېر ښه دي، ځکه د خلکو اړتياوې پوره کوي او پدې سره موږ په خپلو ځايونو کې له اختر څخه خوند اخيستلی شو.
