د چين رسمي سرچېنو ويلي، چې د دغه هيواد د دوو مجلسونو د ۲۰۲۱ کال کلنۍ غونډې به په جلا جلا توګه د مارچ په ۴مه او ۵مه نېټه په پلازمېنه بېجينګ کې پرانيستل شي.
د چين د دوو مجلسونو کلنۍ غونډې د کال تر ټولو مهمې سياسي پېښې دي، چينايان د رايګيرۍ په واسطه خپل حقونه اجرا کوي او د دولت له مهمو پرېکړو مخکې خپلمنځي سلامشورې کوي او په اخر کې يووالي ته رسېږي.
د چين دوه ملي مجلسونه کوم دي؟
د چين ملي ولسي کانګرس او ولسي سياسي مشورتي کنفرانس د چين دوه ملي مجلسونه دي. د چين د اساسي قانون له مخې، ملي ولسي کانګرس د هېواد تر ټولو لوړ پوړی واکمن او تقنيني ارګان دی، چې ډيموکراتيکې رايګيرۍ له لارې رامنځته کېږي او له يوې دايمي کمېټې او څو ځانګړو کمېټو څخه تشکيلېږي. د ماموريت موده يې ۵ کاله وي او هر کال يو ځل عمومي غونډه ترسره کوي. د ۲۰۲۱ کال د مارچ په ۵مه نېټه به د چين د ۱۳م ملي ولسي کانګرس ۴مه غونډه پرانيستل شي او ۲۹۵۴ تنه استازي به پکې ګډون ولري. د ملي ولسي کانګرس عمده دندې د اساسي قانون او نورو قوانينو جوړول او تعديلول، د دولتي مشرانو، وزيرانو او د هېواد د عدلي ارګانونو مشرانو ټاکل، د اقتصادي او ټولنيز پرمختګ د ملي پلان يا ستراتيژۍ تصويبول او په بېړنيو حالاتو کې د جګړې يا سولې پرېکړې کول دي.
د چين ولسي سياسي مشورتي کنفرانس د هيواد د مختلفو سياسي ډلو، ګوندونو او د لږکيو قومونو له استازو څخه جوړیږي، چې عمده دندې يې د سياسي چارو په اړه سلامشورې او ډيموکراتيکه څارنه ده، يوه ملي کمېټه او په ولايتونو او کورواکو سيمو کې خپلې فرعي کمېټې لري، د باور موده يې ۵ کاله ده او هر کال يو ځل عمومي غونډه ترسره کوي. د چين د ولسي سياسي مشورتي کنفرانس د ۱۳مې دورې ملي کمېټې ۴مه غونډه به د ۲۰۲۱ کال د مارچ په ۴مه نېټه پرانيستل شي او ۲۱۵۸ غړي به پکې ګډون ولري.
د روان کال د دوو مجلسونو ځانګړې کلنۍ غونډې
کرونا وبا د ۲۰۲۰ کال له پيل راهيسې د چين په شمول پر ګردې نړۍ خپله لمن راتاو کړې ده. د چيني حکومت او خلکو په ګډو هڅو سره په دغه هېواد کې د کرونا وبا کنټرول شوې او اوس عامو خلکو ته د واکسين ورکولو بهير هم روان دی. چين تېر کال په نړۍ کې يوازينی عمده اقتصاد ګرځېدلی، چې مثبت پرمختګ يې ساتلی دی. د چين په پلازمېنې بېجينګ کې هر کال د دوو ملي مجلسونو کلنۍ غونډې ترسره کيږي، په دغه ښار کې له تېرو ۱۵ ورځو راهيسې د کرونا هېڅ نوې مثبته پېښه نه ده رامنځته شوې.
د بېجينګ ښاروال ډېرې هڅې کوي او د يادو دوو مجلسونو د سږنيو کلنيو غونډو د بريالي تر سره کېدو لپاره يې يو لړ جدي اقدامات نيولي دي. د بېجينګ ښار ترانسپورټ ادارې د فبرورۍ په ۲۱مه نېټه اعلان وکړ، چې د سږنيو کلنيو غونډو په ترڅ کې يې د ټولو اړوندو موټرونو او ترانسپورټي وسايلو جدي چېک او پلټنې بشپړې کړي او ټولو موټر چلونکو ته يې د کرونا وبا ضد واکسين تزريق کړی دی.
دغه راز د بېجينګ ښاروالي به د يادو کلنيو غونډو په ترڅ کې هره ورځ د اړوندو موټرونو په دننه او شاوخوا کې د عفونې ضد دوا وپاشي او جدي اداره به يې وکړي. د نړۍ بېلا بېلو مشهورو رسنيو به خپل خبريالان هر کال د چين د دوو مجلسونو د کلنيو غونډو د راپورتاژ جوړولو په پار بېجينګ ته راليږل، ځکه دغه غونډې د نړۍ د پاملرنې وړ دي. د چين حکومت سږ کال د کرونا وبا د خپرېدو د مخنيوي لپاره يوازې په بېجينګ کې د بهرنيو رسنيو ميشتو خبريالانو ته د راپورتاژ جوړولو اجازه ورکړې او نړيوالې رسنۍ کولی شي، چې په بهر کې د چين د يادوو مجلسونو په اړه په ويډيويي او کتبي بڼې مرکې او يا رپوټونه جوړ کړي.
د دوو مجلسو د سږنيو کلنيو غونډو په ترڅ کې د پام وړ مسئلې
۲۰۲۱ کال د چين د کمونېست ګوند د جوړېدو له سلمې کليزې سره برابر او د چين د ملي اقتصادي او ټولنيز پرمختګ څوارلسم ۵ کلن پلان پيل دی. د چين د ۱۳م ملي ولسي کانګرس په ۴مه غونډه کې به پر څوارلسم ۵ کلن پلان او تر ۲۰۳۵ کال پورې د ليرې موخې پر مسودې بحث وشي. د چين لوړ پوړي چارواکي اوس له يوه قيمتي فرصت سره مخامخ دي، څو د خپل وطن د راتلونکو ۵ کلونو د پرمختګ لپاره يوه نقشه جوړه کړي.
چين اوس د نړۍ دوهم لوی اقتصاد دی. دا چې په راتلونکي کې به پر کوم لوري ګامونه پورته کړي او څه ډول پرمختګ به وکړي، بې له شکه د چين دا چارې به د نړۍ زياته پاملرنه راجلب کړي. د دې تر څنګ د چين کمونېست د جوړېدو سلمه کليزه د چيني مشرانو لپاره خاص اهميت لري، نو دوی به د دوو مجلسونو په سږنيو کلنيو غونډو کې څه سياسي پيغام او معلومات ورکړي؟ دا هم د پاملرنې وړ ټکی دی.
اروپايي هېوادونه او امريکا لا هم د کرونا وبا ضد مبارزه کې سختې هلې ځلې کوي، خو د چين حکومت نه يوازې په خپل هېواد کې وبا کنټرول کړې او مخنيوی یې کړی او اقتصادي پرمختګ يې موندلی، بلکې د ټاکلي پلان له مخې به دغه لويې سياسي غونډې هم جوړې کړي. د چين لپاره د کرونا وبا ضد مبارزې لويه لاسته راوړنه ده، چې نه يوازې د چينايانو، بلکې د دغه هېواد د سياسي نظام برياليتوب هم بلل کېږي.
