د ۲۰۲۱م کال لپاره د چين ميډيا ګروپ په لسو مهمو کورنيو خبرونو کې د چين لاسته راوړنې

چين ميډيا ګروپ په دې وروستيو کې د ۲۰۲۱م کال د چين لس مهم کورني خبرونه خپاره کړي دي.

که تاسو غواړئ، د چين د ټولنيز او اقتصادي پرمختګ په اړه مالومات تر لاسه کړئ، نو په همدغو لسو خبرونو کې رانغاړل شوي او دلته يې لوستلی شئ.

لومړی، د چين کمونېست ګوند د جوړېدو د سلمې کليزې لمانځغونډه تر سره شوه او شي جين پينګ په چين کې د شتمنې ټولنې د جوړېدو اعلان وکړ.

د چين د کمونېست ګوند د جوړېدو د سلمې کليزې لمانځغونډه د ۲۰۲۱م کال د جولای په لومړۍ نېټه د بېجينګ په تيان ان من ډګر کې تر سره شوه. د نوموړي ګوند د مرکزي کمېټې عمومي منشي، د دولت رئيس او د مرکزي پوځي کمېټې مشر شي جين پينګ په دغه غونډه کې اعلان وکړ، چې چين لومړۍ سل کلنه موخه پوره او هراړخيزه شتمنه ټولنه يې جوړه کړې او د هېواد د سختې بېوزلۍ تاريخي ستونزې ته يې د پای ټکی کېښودلی دی.

دوهم، د چين د کمونېست ګوند د نولسمې مرکزي کمېټې شپږمه عمومي غونډه تر سره شوه.

د چين د کمونېست ګوند د نولسمې مرکزي کمېټې شپږمه عمومي غونډه د ۲۰۲۱م کال د نومبر له اتمې نېټې څخه تر يوولسمې نېټې پورې په بېجينګ کې تر سره شوه.

په دغې غونډې کې (( د چين د کمونېست ګوند د تېر سل کلن مزل د مهمو برياليتوبونو او تجربو په اړه د  مرکزي کمېټې پريکړه ليک ))  تصويب شو. په دغه مهم پريکړه ليک کې په تېرو سلو کلونو کې د دغه ګوند له خوا تر لاسه شوي برياليتوبونه او تجربې ځای شوې دي.

درېيم، چين د اقتصادي پرمختګ او د کرونا وبا ضد مبارزې په برخو کې د نړۍ مخکښ ځای نيولی.

د چين اقتصاد په ۲۰۲۱م کال کې د کرونا وبا او د نړيوالو حالاتو د بدلونونو پر وړاندې د ثبات تر څنګ پرمختګ هم کړی دی. د همدې کال په لومړنيو دريو ربعو کې د دغه هېواد د اقتصادي پرمختګ انډول ۹ اعشاريه ۸ سلنې ته رسيدلی، چې د نړۍ د نورو هېوادونو په پرتله څرګند لوړوالی ښيي؛ په لومړيو يوولسو مياشتو کې د دغه هېواد د وارداتو او صادراتو عمومي ارزښت ۳۵ زرو او ۳۹۰ ميليارډو يوانو ته رسيدلی، چې د ۲۰۲۰م کال د همدې مودې په پرتله ۲۲ سلنه زياتوالی ښيي او د نړيوال اقتصادي پرمختګ لپاره د چين د خدمت ونډه په تېرو څو کلونو کې نژدې ۳۰ سلنه ساتل شوې ده.

څلورم، د چين د بشپړې ولسي ډيموکراسۍ نظام خپل غوره والی ښکاره کړی.

په ۲۰۲۱م کال کې د چين د کمونېست ګوند د نولسمې مرکزي کمېټې د شپږمې عمومي غونډې اعلاميه خپره شوه، چې پکې د ډيموکراتيک سياست د ابادۍ په لاره کې د چين تجربې او لاسته راوړنې ځای شوي او نړيوالې ټولنې ته یې د چين د ډيموکراتيکې بڼې په تړاو هراړخيزه پېژندنه او ژور فکرونه بيان کړي دي.

پنځم، چين د کاربن ايستنې اندازې د کمولو موخې خپرې او د ايکولوژيکي تمدن د ابادۍ نوې مرحله يې پيل کړې ده.

د چين د کمونېست ګوند مرکزي کمېټې او دولتي شورا د ۲۰۲۰م کال د اکتوبر په ۲۴مه نېټه د يو رسمي سند په خپرولو سره د کاربن دوه اکسايد د ايستنې اندازې د کمولو په برخه کې د دغه هېواد موخې خپرې کړي، چې له مخې به يې په ۲۰۲۵ م کال کې په دغه هېواد کې د زرغون پرمختګ او د کاربن د ټيټې ايستنې په بڼه اقتصادي سيستم جوړ کړي او په مهمو صنايعو کې  به د انرژۍ د کارولو موثريت ډېر لوړ کړي. چين به په ۲۰۳۰م کال کې د کاربن دوه اکسايد د ايستنې اندازه اوج ته ورسوي او وروسته به يې ګام په ګام ټيټه کړي او په ۲۰۶۰م کال کې به د کاربن نيوچرالیټي (carbon neutrality ) موخه پوره کړي.

شپږم، د چين د حبوباتو توليدي اندازې نوی ريکارډ ټينګ کړی.

د چين د احصائيې ملي ادارې د شمېرنې له مخې، په ۲۰۲۱م کال کې د دغه هېواد د غلو دانو توليدي اندازه ۶۸۲ ميليارډه او ۸۵۰ ميليونو کيلوګرامو ته رسېدلې، چې دا رقم د تېر کال په پرتله ۲ سلنه زياتوالی ښيي.

اووم، د چين د اوومې سرشمېرنې نتيجه ښيي، چې دغه هېواد د نړۍ تر ټولو ډېر نفوس لري.

د چين د اوومې سرشمېرنې نتيجه د ۲۰۲۱م کال د مۍ په يوولسمه خپره شوه، چې له مخې يې د ۲۰۲۰م کال د نومبر تر لومړې نېټې پورې د دغه هېواد د سترې برخې نفوس يو ميليارډ او ۴۱۱ ميليونو او ۷۸۰ زرو تنو ته رسيدلی، چې دا د نړۍ په عمومي نفوس کې ۱۸ سلنه نيسي.

اتم، د چين فضانوردۍ ډېر پرمختګونه کړي دي.

 چين په همدې کال کې په فضانوردۍ کې، په تيره بيا د انسان وړونکو فضايي چارو او د مريخ د اکتشاف په برخو کې د پام وړ برياليتوبونه تر لاسه کړي دي. د بېلګې په توګه، د تيان هه په نوم د چين فضايي سټېشن مرکزي برخه د اپريل په ۲۹مه نېټه ټاکلي مدار ته داخل شوه. دغه راز چين د فضايي سټېشن د ابادۍ پلان د پلي کولو مرحله هم پيل کړې ده. د چين ستورمزلو په ډسمبر کې د تيان ګونګ له فضايي سټېشن څخه په لومړي ژوندي فضايي درس کې نړيوالو کتوونکو ته په فضايي سټېشن کې د کار او ژوند په اړه مالومات او ځانګړي علمي اصول معرفي کړل.

نهم، د هانکانګ د خاصې اداري سيمې د نوې مقننې شورا ټاکنې په بريالۍ توګه تر سره شوې.

د چين د هانکانګ د خاصې اداري سيمې د ۷مې مقننې شورا د ټاکنو نتيجه د ډسمبر په ۲۰مه نېټه خپره شوه او د دغې شورا د ۹۰ څوکيو لپاره ټول غړي انتخاب شول. په دغو ټاکنو کې تر يو ميليون او ۳۰۰ زرو زياتو هانکانګيانو رايه کارولې ده.

دغو ټاکنو د دې سيمې د ډيموکراتيک پرمختګ نوې پاڼه پرانيستې او داسې اصل يې څرګند کړی، چې د دې سيمې د ادارې حق د هېواد پالونکو په لاسونو کې دی.

لسم، د هواوې شرکت لومړۍ مالي مشره اغلې منګ وان جو خپل هېواد ته ستنه شوه.

د امريکا يو اړخيز بنديزونه او د نورو هېوادونو په چارو کې خپلسرې لاسوهنه د مېرمنې منګ وان جو د قضيې لامل شوې وه او د امريکا د دغو کړنو موخه دا ده، چې د هواوې په شمول د چين د لوړې تکنالوژۍ لرونکو تصديو بنديزونه ولګوي او د چين د پرمختګ مخه ونيسي.

خپل هېواد ته د مېرمنې منګ وانګ جو ستنېدل دا څرګندوي، چې چين د ټولو چينايانو ټينګ ملاتړ لري او هيڅ ځواک يې د پرمختګ مخه نشي نيولی.