د افغانستان د سرپرست حکومت د کډوالو چارو وزارت د جنورۍ په ۲۹مه نېټه کابل، کندهار، هلمند، غور او فراه ته د شاو خوا ۶۰۰ ټنو په اندازه د چين مرستندويه توکي وليږل او په اړمنو خلکو وويشل شول. د چين په بشري مرستو بار یو اورګاډی د جنورۍ په ۳۰مه نېټه له شینجيانګ څخه د افغانستان په لور خوځيدلی دی. د چين په دغې مرستندويه جوپه کې ۵۰۰ ټنه غنم، بوره، غوړي او له کچالانو د ډول ډول توليداتو جوړولو الې شاملې دي.
د چين په مرستندويو توکو بار يو بل اورګاډی به هم په روانې مياشت کې د افغانستان په لور وخوځيږي او چين ويلي، چې تر وسې پورې به له افغانانو سره مرستو ته دوام ورکړي.د شينجيانګ کارګر د چين د پسرلني اختر په درشل کې په منفي شل درجې سړه هوا کې د اورګاډي د کانټينرونو په ډکولو بوخت وو او دغه اورګاډی به په ټاکلي وخت د افغانستان په لور حرکت وکړي.
کله چې د امريکا په مشرۍ ائتلافي ځواکونه له افغانستان څخه ووتل، امريکا د افغانستان بيارغونه او د خلکو ژوند شا ته وغورځول او په ورته وخت کې يې د دغه هېواد څه باندې ۹ ميليارډه ډالر هم کنګل کړل او دا د دې سبب شول، چې د افغانستان اقتصادي حالت مخ په ځوړ روان شي او افغانان يې له راز راز ستونزو سره مخ کړي دي.
چين د افغانستان د ګاونډي او مسئولانه لوی هېواد په توګه په دغه هېواد کې د بشري بحران مخنيوي ته لومړيتوب ورکوي او غواړي د دغه هېواد له ۳۸ ميليونه خلکو سره د لومړنيو توکو مرسته وکړي. دغه فکر د چين د بشري حقونو له نشريې سره سمون خوري. چين د خلکو د ژوند او پرمختګ حقونه لومړي بنسټيز بشري حقونه بولي او د بشري حقوقو پر هغې نظريې ټينګار کوي، چې له مخې يې خلکو ته باید لومړيتوب ورکړل شي. دغه نظريه يوازې د چين د خلکو لپاره نه ده، بلکې د بېلا بېلو هېوادونو خلک هم باید ياده نظريه پلې کړي.
چين د بشري حقونو د تامينولو د دغې نظريې پر بنسټ د افغانانو ستونزې درک کوي او خواخوږي ورسره ښيي. چين هڅې کوي، له افغانانو سره په دغو ستونزمنو وختونو کې تر وسې پورې مرستې وکړي او هيله لري، چې افغانان له یادو ستونزو ووځي او خپل کور بیا اباد کړي. افغانان په ډېرو ستونزو کې راګير دي او نړيوال بايد د دوی له احساساتو سره لوبې ونه کړي. چين په ډېرو نړيوالو غونډو کې پر بېلا بېلو هيوادونو غږ کړی، چې افغانستان سره مرستې وکړي او له نړيوالې ټولنې يې بیا بیا غوښتي، چې له افغانانو سره بشري مرستې وکړي.
په افغانستان کې اوس سوړ ژمی دی، بحرانونه څه ته انتظار نه کوي، د بشري مرستو ځنډول به افغانان له نورو ستونزو سره هم مخ کړي او د ماشومانو په شمول کمزوري خلک به د مرګ خولې ته وغورځي. چين هيله لري، چې نړيواله ټولنه معقول وړانديزونه او له افغانانو سره بشري او اقتصادي مرستې وکړي.
د ملګرو ملتونو امنيت شورا څه موده مخکې د افغانستان د حالاتو په هکله يوه غونډه تر سره کړه.په ملګرو ملتونو کې د چين دايمي استازي جانګ جون په يادې غونډې کې وويل، چې نړيواله ټولنه بايد د افغانستان له سرپرست حکومت سره تماسونه زيات او ورباندې اعتماد او باور ټينګ کړي. هغه له نړيوالې ټولنې څخه وغوښتل، چې بشري مسئلې په سياست پسې ونه تړي او ډېر ژر دې له افغانستان سره بشري او اقتصادي مرستې وکړي.
چين او افغانستان ګاونډي هېوادونه دي او ګډ برخليک لري. چين هيله لري، چې خپل ګاونډی هېواد افغانستان يې ارام او خوندي وي او پکې ټولنيز ثبات او اقتصادي پرمختګ رامنځته شي. افغانان هم له چين سره ښې خاطرې لري او تل دا وايي، چې چين د افغانستان یوازینی ګاونډی هيواد دی، چې تر اوسه یې پرې تيری او ظلم نه دی کړی او نه يې هم په کورنیو چارو کې لاسوهنه کړې. دواړه هېوادونه په سوله کې ګډ ژوند کوي او خپله عنعنوي او ښه دوستي پالي.
د چين په مرستندويو توکو بار اورګاډی اوس افغانستان ته پر لارې دی او هيله ده، چې دغه توکي په دغه سوړ ژمي کې افغانان ګرم وساتي.
