پاکستاني الوتکو په کونړ او خوست کې هوايي بریدونه کړي دي چې پکې تر څلوېښتو زیات کسان شهیدان شوي دي. په دوی کې لویه برخه ښځې او ماشومان دي. بریدونه د وزیرستاني بې ځایه شوو پر کورونو شوي دي، له همدې امله قربانیان یې یو مخ ملکي وګړي دي. اسلامي امارت دغه برید غندلي او ذبیح الله مجاهد ویلي چې پاکستان دې د افغانانو حوصلې نه ازمايي او دا ډول تېروتنې دې نه تکراروي. په ورته وخت کې بهرنیو چارو وزارت د پاکستان سفیر ورغوښتی او د برید د غندلو تر څنګ یې ورته د افغانستان اعراض لیک هم سپارلی دی. له دې سره په ټولنیزو شبکو کې ګڼو افغانانو د پاکستان دغه برید غندلی او د ورته ګام غوښتنه کوي. په خوست کې زرګونه خلکو د پاکستان ضد لاریون کړی او ویل کېږي چې نن به هم په کابل او نورو ولایتونو کې د پاکستان ضد لاریونونه وشي.
دا پاکستان دا بریدونه وحشیانه او ظالمانه دي او د افغانستان او سیمې له خلکو یې په اقصی جومات او فلسطین کې روان اسرایلي وحشت هېر کړ. پاکستاني پوځ د اسرایلو تر رژیم ستر جنایت وکړ او په دې مبارکه روژه کې یې د ښځو او ماشومان په وژلو سره خپله وحشیانه څېره بربنډه کړه. پاکستاني ځواکونو دا بریدونه په ظاهره د هغو بریدونو په غبرګون کې کړي دي چې په دې وروستیو کې پر پاکستان پوځیانو کېږي، خو دوی دومره ډارن او وحشیان دي چې د خپلو ځواکونو غچ له بې دفاع وګړو، ښځو او ماشومانو اخلي. له بله اړخه دا ډول بریدونه په واضح ډول پر افغانستان بریدونه دي او په دې سره د افغانستان ځمکنۍ بشپړتیا نقض شوې ده، چې په هېڅ ډول د زغملو وړ نه ده. له همدې امله دا برید له ټولو اړخونه ناقانونه، ناوړه، وحشیانه، ظالمانه او اسرایلي عمل دی چې په هېڅ ډول نه شي توجیه کېدلی.
دغه برید ته باید ځواب وویل شي او په هېڅ ډول باید هېر نه شي، خو پکار ده چې ځواب عاقلانه او د افغانستان حالاتو، ستونزو او اړتیاوو ته په پام سره وي. دا سمه ده چې باید دیپلوماتیک اعراض وشي، چې وشو، خو تر دې ورهاخوا ګامونه اخیستل هم پکار دي. دا چې موږ هم ورته کار وکړو، ممکن نه ښکاري، ځکه افغانستان دا وړتیا نه لري چې دا ډول بریدونه وکړي. له بده مرغه موږ داسې هوايي ځواک نه لرو، چې دغه ډول بریدونه وکړو، کومې الوتکې چې وې، هغه هم د تېر رژیم مفسدینو او خاینینو یا له ځان سره بهر ته یوړې او یا یې هم دلته تخریب کړې. که ځمکنی برید وشي، بیا هم افغانستان هغه وړتیا نه لري چې سم غچ دې واخیستلی شي. له همدې کبله پکار ده چې پر نورو لارو فکر او کار وشي. پکار ده چې په شدت سره د ټي ټي پي ملاتړ وشي او ددې تر څنګ د ټولو هغو حرکتونو اخلاقي او مادي ملاتړ وشي چې په پاکستان کې د اسلامي نظام لپاره مبارزه کوي.
پاکستاني بریدونه باید هېر نه شي، ددغه ډول بریدونو د مخنیوي، غچ او پر پاکستان د فشارونو لپاره باید اوږدمهاله کار وشي. ددې تر څنګ باید ټول تمرکز پر دې وشي چې په افغانستان کې یووالی راشي، خلک او حکومت سره نږدې شي او د یوه پیاوړي نظام لپاره کار وشي چې بیا مو نه ایران کډوال وځوروي او نه مو پاکستان پر خاوره دا ډول وحشیانه او ظالمانه بریدونه وکړي.
