د سولې د خبرو په لړ کې د بهرنیو ځواکونو د وتلو مسئله توده شوې ده. د سولې لپاره د طالبانو تر ټولو مهم شرط دا دی چې بهرني ځواکونه به له افغانستانه وځي او تر هغه وروسته به د نورو مسایلو په اړه مذاکراتو ته ادامه ورکوي. وسله والو طالبانو ته نږدې کسان او سرچینې وایي چې د دوحې په شپږ ورځنیو مذاکراتو کې د بهرنیو ځواکونو پر وتلو هوکړه شوې ده. د سرچینو په خبره، امریکا منلې چې بهرني ځواکونه به له افغانستانه وځي او په دې توګه به د سولې په برخه کې نورو پرمختګونو ته لار هوارېږي.
طالبانو ته نږدې کس او پخواني طالب چارواکي سید اکبر اغا په خپله وروستۍ مرکه کې ویلي، امریکایانو منلې چې خپل ځواکونه به له افغانستانه وباسي. د ده په خبره، راتلونکې میاشت د امریکايي او نورو بهرنیو ځواکونو تدریجي وتل پیلېږي او په دې توګه به اوربند او د سولې په برخه کې اړوندو نورو بحثونو ته لار پرانیستل شي. اکبر اغا زیاته کړې: «امریکا منلې چې ځواکونه به یې له افغانستانه وباسي. په راتلونکې میلادي میاشت (فبرورۍ) کې به د بهرنیو ځواکونو د وتلو بهیر پيل شي. د همدې فبرورۍ میاشتې په ۲۵مه نېټه به بیا د امریکایانو او طالبانو ترمنځ د خبرو بل پړاو پيلېږي چې په هغه کې به پر اوربند هم خبرې کېږي.»
سید اکبر اغا وايي، کله چې د راتلونکې میلادي میاشتې په پيل کې د بهرنیو ځواکونو د وتلو بهیر پيلېږي، نو دا پروسه به د طالبانو او امریکا د یوه ګډ پلاوي له لوري څارل کېږي. د نوموړي په خبره، په دې پروسه کې پرمختګ او صداقت د دې سبب کېدای شي چې طالبان د فبرورۍ میاشتې د پنځه ویشتمې نېټې په غونډه کې اوربند ته غاړه کېږدي او د مذاکراتو بل پړاو پيل کړي.
په ورته وخت کې د امریکا د بهرنیو چارو وزیر هم د خپلو ځواکونو د وتلو په اړه څرګندونې کړې دي. هغه تېره ورځ له دوحې د زلمي خلیلزاد تر وتلو وروسته په یوه ټوېټ کې لیکلي وو، چې دوی له افغانستانه د خپلو ځواکونو وتلو ته ژمن دي. د مایک پامپیو په خبره امریکا نه غواړي چې سرتېري یې په یوه اوږده جګړه کې ښکېل وي، نو ځکه دا هڅه کوي چې په افغانستان کې روانه جګړه د خبرو پر مټ حل کړي او په دغه هېواد کې یو قوي حکومت رامنځته کړي. پامپیو ویلي چې دوی په افغانستان کې یو خپلواک، پیاوړی او مستقل حکومت غواړي، نو له همدې امله دا ژمنه کوي چې امریکا د افغانانو ترڅنګ ولاړه ده. مایک پامپیو د سولې د خبرو په اړه هم هیله مندي ښودلې وه. ده ویلي: «زلمي خلیلزاد ښه خبرونه راکړي دي. د افغانستان د سولې خبرې له لاس ته راوړنو ډکې دي. دا هیله شته چې روانه جګړه د خبرو له لارې حل شي».
بل لور ته پاکستان بیا وايي چې دوی د افغانستان د سولې په برخه کې نه ستړې کېدونکې هڅې کړې دي. د پاکستان د بهرنیو چارو وزیر محمود قریشي تېره ورځ په یوه غونډه کې رسنیو ته ویلي چې د افغانستان د سولې خبرې دومره اسانه نه وې، نو پاکستان د دغه خبرو په اسانتیا کې نه ستړې کېدونکې هڅې کړې دي. قریشي ویلي، اسلام اباد په افغانستان کې د سولې خبرو ته ژمن دی او په دې برخه کې به خپلې همکارۍ نه سپموي.
د افغان سولې په اړه داسې مهال دغه څرګندونې کېږي چې د افغان سولې لپاره د امریکا ځانګړی استازی له دوحې کابل ته راغلی دی. ده ویلي، تر هغه چې له افغان حکومت سره د مخامخ خبرو په اړه هوکړه ونه شي، نو هېڅ هوکړه نه ده شوې. دده په خبره، یا باید پر ټولو مواردو هوکړه وشي او یا هېڅ هوکړه نه کېږي. هغه دا نه دي ویلي چې ټول موارد څه دي، خو طالبان بیا وايي چې مهمې غوښتنې یې له افغانستانه د بهرنیو ځواکونو وتل، د طالب زندانیانو خوشي کول، له تور لېسته د طالب مشرانو ایستل، د امریکا او نورو هېوادونو پر ضد د افغان خاورې نه کارېدل او د طالبانو دفتر په رسمیت پېژندل شامل دي. امریکا بیا ټینګار کوي چې طالبان باید له افغان حکومت سره مخامخ خبرې وکړي او روانه جګړه د بین الافغاني مذاکراتو پر مټ حل کړي.
