د اکتبو لومړۍ نېټه به د چين د ولسي جمهوریت د جوړېدو له ۷۵مې کاليزې سره برابره وي. له ۷۵ کلونو راهيسې د چين د کمونېست ګوند په مشرۍ سره په دې هېواد کې ستر بدلونونه راغلي او په بېلا بېلو برخو کې يې پرمختګونه موندلي دي. د چين له ټولنیز او اقتصادي پرمختګ سره سره د دغه هېواد او نورو هېوادونو ترمنځ تګ راتګ هم زیات شوی او ګڼ شمېر بهرنيان چين ته راغلي او د دغو پرمختګونو عيني شاهدان دي.
د نوي چين د ۷۵مې کاليزې د رارسېدو په درشل کې د چين د سي جي ټي اېن خبريالې د افغانستان د باختر خبري اژانس له خبريال او د صدای پروان راډيو له مسؤل مدير احمد زبیر حسرت سره مرکه وکړه او د چين د پرمختګ په باب يې د ده نظر واورېد. هغه وويل چې د نوي چين د اعلان له ۷۵ کلونو راپدېخوا د چين د حکومت او وګړو هڅې او لاسته راوړنې د ستاینې او پام وړ دي.
د ۱۹۴۹م کال د اکتوبر لومړۍ نېټه هغه ورځ وه چې له هغې ورځې راپه دې خوا چين او ولس يې د پرمختګ څرک پيدا کړ او د هغوی د برياوو او پرمختګونو لړۍ هم پیل شوه. هغه وويل چې چین هېواد ټولو نړیوالو ته د اقتصادي پرمختګ لپاره بېلګه ده، د اقتصادي پياوړتيا په برخه کې د چیني وګړو او چارواکو هڅې د ستاينې وړ دي، د چین هېواد پرمختګ نه یوازی دا چې خپله چیني وګړو ته مثبتې او ارزښتناکې پایلې درلودلي بلکې د سیمې ټولو هېوادونو پر اقتصادي وضعیت یې هم خورا مثبت اغیز درلودلی دی.همدارنګه چين په نړۍ کې د تر ټولو لوی پرمختيايي هېواد په توګه هم کولی شي چې د اقتصادي همکاريو د زياتولو، د سیمه يیزو اړیکو، ټرانسپورټي زیربناوو، د انرژۍ توليد، سوداګریزو فعالیتونو، د صنعتي کېدو، مالي خدمتونو، زراعتی همکاريو، ټولنیز او اقتصادي پرمختګ، فقر له منځه وړلو، په سیمه کې د امنیت او ثبات ټیګښت، د معیشت فرصتونو زیاتوالي، د سیاحت پراختیا تر څنګ د زده کړو او تعلیمي وړتیاوو رامنځته کولو برخه کې خورا مثبت رول ولوبوي.نو ویلی شو چې له تېرو څو لسيزو راهيسې نه یوازې په سيمې کې بلکې په ګرده نړۍ کې د چین اغیز ورځ تل بلې زيات شوی، نو ټولې نړۍ بايد د پرمختګ د يوې بېلګې په توګه ور ته وګوري.
د ښاغلي حسرت په اند د چین څو لسيز کلن پرمختګ له افغانستان سره د دې هېواد پر اړيکو هم مثبت اغيزلري. هغه وويل، دا چې د چین او افغانستان ترمنځ د اړیکو مخینه۶۹ کلونو ته رسېږي او چین هېواد تل د دواړو لوریو ګټو ته په ژمنتیا سره افغان حکومتونو ته د دوستۍ او همکارۍ ډاډ ورکړی او عملي ګامونه يې اخیستي، نو افغانان به د چین هېواد یادې مرستې او همکارۍ هېرې نکړي او هیله لرو چې یاده دوستي لا پیاوړې شي او نوره هم وغځیږي. چین په سیمه کې پر اقتصادي ښکېلتيا او سوداګريزې پراختيا سربېره د بیا رغونې پر پروژو پانګونې کړي چې د افغانستان لپاره د زیربناوو په رغولو، د اقتصاد په ژوندي کولو او د کاري فرصتونو په رامنځته کولو کې رغنده رول لوبوي او یادې هیلي د دې لامل شوې چې افغانان او سیمه ییز هېوادونو ته د سیمي پرمختګ، بیارغونې او سیمه يیز پيوستون او همکاریو لپاره د هیلو څرک پیدا شي.افغانان هم هیله لري چې د بدخشان واخان سړک په جوړیدا او د ميسو عینک کان او نورو ورته پروژو په پلي کولو سره د دواړو خوواوو اړیکي لا پیاوړې شي او د افغانانو له هیلو سره سم چین هېواد د افغانستان اقتصادي پراختیا کې لویه ونډه واخلي.
د مرکې په پای کې ښاغلي حسرت داسې ويلي، د نوي چين د کاليزې په رارسېدو سره د چین ټولو اتلو وګړو ته د یادې ورځې مبارکي وایم او د دوی د قربانیو او هڅو قدرداني کوم. د چین په پراختیا، سمسورتیا او اوسنۍ اقتصادي پياوړتیا کې د چیني وګړو او چارواکو ترمنځ همغږي، ښې اړیکې او د هېواد پرمختګ ته ژمنتیا د ستایلو ده. هیله لرم نور هېوادونه او ولسونه هم له دوی څخه عبرت واخلي او ددوی په قدم قدم کېږدي او خپل هېوادونه پر ځان بسيا کړي.
（撰稿：余海芳 初审：唐诗玉 审定：陈重 签稿：席猛）
