موږ، تاسې ته هغه څلور قوانین ښیو چې د کال په پیل کې یې باید په تصمیم نیونه کې مراعات کړئ. دغه قوانین به له تاسې سره مرسته وکړي، څو مو موخو ته ژر او له هغې چې تاسې یې له دې مخکې اټکل کړی و، په چټکتیا سره ورسېږی.
کېدای شي تاسې موخو د رسېدو پر لار له ستونزو او مشکلاتو سره مخ شی، خو د ښې تصمیم نیونې او د دغو قوانینو په مراعات کولو سره، تاسې کولای شی له ماتې، وېرې او زړه نا زړه توب وروسته راپاڅی او بیا حرکت وکړی.
۱-پر خپل تصمیم مو باوري اوسئ
د نوي کال لپاره تر ټولو بریالی تصمیم، پر کلک باور پیلېږي. د بریا لپار باید پر هغه څه چې تاسې ورته رسېدل غواړی، کلک باور ولری. داسې پرېکړه وکړئ چې حتماً او له شک پرته هغه څه ته چې تاسې یې غواړی، رسېدای شی. ځینې وخت دا پرېکړه او تصمیم له هغو ملګرو او دوستانو سره هم شریک کړئ، چې باوري یاستی هغه ستاسې ملاتړ کوي. ښه ده چې د دغه تصمیم نیولو په پار له ځان سره وعده وکړی، دا وعده مو پرېکړه او تصمیم لا غښتلي کوي.
د نوي کال د موخو په اړه مو تصمیم او پرېکړې مه ځنډوئ. د خپلو هيلو او موخو په اړه فکر کولو ته وخت ځانګړی کړئ، که دغه کار ونه کړی، کېدای شي له ځینو هغو ستونزو سره مخ شی چې تاسې به یې په اړه مخکې له مخکې کوم چمتووالی نه وي نیولی.
د نوي کال په اړه باید دغه پوښتنې د خپلې توانایۍ او تصمیم نیونې په پار له ځانه وپوښتئ:
دغه تصمیم او پرېکړه زما خپله ده او که د بل چا؟
دغه تصمیم ماته کومه انګېزه راکوي؟ یا د کومې انګېزې له مخې یې کوم او که نه؟
دا پرېکړه او تصمیم مې له ژوند او نورو ارزښتونو سره کومه همغږي لري او که نه ورسره په ټکر کې دي؟
سپارښتنه:
نظم؛ پر خپلو پرېکړو او تصمیمونو د باوري پاتې کېدو لپاره ستاسې تر ټولو قوي ځانګړنه ده. کوښښ وکړئ چې ځان مو داسې تصور کړی، لکه هدف ته چې رسېدلي یاستی. هغه وخت به څه احساس کوی؟ څنګه به ښکاری؟ چېرته به وی؟ څه به کوی؟ نور به له تاسې سره څه ډول چلند کوي؟
د ځان په اړه د خپل تصور پر مټ کولای شی، د ځان لپاره هغه ځای پیدا کړی، کوم چې تاسې ورته رسېدل غواړی او د همدغه تصور پر مټ هغه ته د رسېدو انګېزه لا پیاوړې کولای شی.
۲– ډېر دقیق اوسئ
موخو ته د رسېدو کلي له تل پاتې انګېزې سره ده. که هر څومره مو موخې او هدفونه ښه او په پوره دقت سره وټاکی، بیا هم د ماتې وېره شته او موخو ته د رسېدو پر لاره وېره تر هرڅه بده ده. دا بیا ډېره عجیبه ده چې ځینې کسان له څو ځلي ماتې وروسته له خپلو پرېکړو تېرېږي او د نوي کال لپاره هېڅ پلان نه لري.
مخکې له دې چې د تېر کال پرېکړه او تصمیم بیا تکرار نه کړی، ښه په پوره دقت سره فکر وکړئ. که مو تېر کال د پرېکړو په عملي کولو نه وی توانېدلي، کومه خبره نه ده. سږ کال به د هغه د عملي کولو لپاره تر ټولو ښه تصمیم ولری.
له ځانه سره فکر وکړئ، د تېر کال په پرتله اوس کومو شیانو توپیر کړی دی؟ (پوره دقیق اوسئ، که نه د تېر کال له بدې پایلې سره به بیا مخ شی).
لویه مړۍ مه کوئ
هېڅ داسې دلیل نشته چې تاسې د دغه نوي کال لپاره له یوه- دوو زیات تصمیمونه ولری. له یوه- دوو د زیاتو تصمیمونو نیول مو انرژي تقسیموي او هر یوه ته د رسېدو چانس مو بېخي ډېر راکموي. هغه متل به مو اورېدلی وي، چې وايي: «ټولې مڼې په یوه لاس کې نه نیول کېږي» دا رښتیا خبره ده. په یوه وخت کې څو موخو ته نه شی رسېدای. ښه دا ده چې د یوې له لاسته راوړلو وروسته، د بلې لپاره هڅه پیل کړئ.
۳- پرېکړه مو ولیکئ
یو اسانه او ساده او په عین حال کې له تاسې سره موخو ته په رسېدو کې یو قوي اقدام د خپلو پرېکړو لیکل دي. زموږ په بدن کې دننه داسې یو ځواک شته چې د یو کار د سرته رسولو په وخت مو روحیه او انګېزه لا پياوړې کوي. خپلې پرېکړې او تصمیمونه مو د کاغذ پر مخ ولیکئ او هغه په یو داسې ځای کې ځوړند کړی، چې ډېر وخت مو سترګې پرې لګېږي. لکه، یا یې د میز پر سر کېږدئ او یا یې هم د یخچال او بل داسې څه پر سر کېږدئ چې تاسې ورسره ډېر کاروبار لری.
۴- خپل ځان ته مو ډالۍ ورکړئ
کله مو چې یو کار سم سرته ورساوه، ځان ته جایزه ورکول تر ټولو ښه کار دی او که رښتیا ووایو، زموږ ټولو دا خوښېږي چې یو څوک دې د یو کار په بدل کې جایزه یا ډالۍ راکړي، خو کله بېروني هڅونه نه وي، مانا دا چې هر وخت داسې څوک نه پیداکېږي چې تاسې ته د ډالۍ درکړي او نه مو هر څوک له ځینو وړو، خو مهمو بریاوو خبرېږي. ښه دا ده چې دا وخت خپله ځان ته ډالۍ ورکړئ.
کله مو چې د یو کار په اړه تصمیم ونیو، د ځان په اړه د ځینو ښو نومونو یا وړو ډالیو د ورکړې وعده وکړئ. په یاد لرئ، ډالۍ اخیستل هر وخت خاص وي او اخیستل یې چندانې اسانه هم نه دي. تاسې به ځان ته د ډالۍ په ورکولو سره پر هغه کس بدل شی، چې ډېر وخت به نور بیا ډالۍ درکوي؛ ځکه ډالۍ اخیستل په وجود کې شته وړتیاوې را ژوندۍ کوي.
