تمرکز نه لری، تل مو فکر یوه خوا بله خوا وي، له کار څخه ژر ستړي کېږی، ساعتونه ساعتونه وخت همداسې بې ځایه ضایع کوی، که هر څومره درته ستړی کوونکی او بې ګټې هم وي، خو بیا هم د نورو سیل کوی. له دې سره سره ټول پوهېږی، که مو لږ تمرکز راټول کړی، هرڅه به مو سم شي.
که یوه شېبه هم دقت وکړی، که مو د کم وخت لپاره حواس کنټرول او پر یوڅه یې راټول کړی، کولای شی په یوه وخت کې ډېر کارونه وکړی.
موږ په همدې مقاله کې درته هغه لارې ښیو، چې په عملي کولو سره یې کولای شی، په کم وخت کې ډېر کار وکړی:
۱-له کاري چاپېریال سره مو ځان عیار کړئ
یو ښه او ارام کاري چاپېریال تر هغه، چې تاسې يې په اړه فکر کوی، ډېر ارزښت لري. څېړنې ښيي، که چېرې ستاسې کاري چاپېریال ښه همغږي ولري، ستاسې وړتیاوې هم ورسره لوړېږي. له دې سره سره، کولای شی ښه احساس ولری او د ډېر وخت لپاره مو پر یو کار تمرکز وساتی.
له کاري میز نه مو پيل وکړئ، ایا هغه څوکۍ چې تاسې پر ناست یاستئ، تاسې په کې راحت یاستئ؟ ملا خو به مو درد نه په کې کوي؟ ستاسې کاري چاپېریال باید مناسبه روښنايي ولري او د هوا ګرموالی او سوړوالی یې هم باید په مناسبه اندازه برابر وي. که مو ټوله ورځ په کاري دفتر کې تېرېږي، ښه ده چې هرڅه یې داسې برابر کړی، چې تاسې ترې خوند واخلی.
کاري چاپېریال باید الهام ورکوونکی وي او تاسې ته یوه انګېزه درکړي. په کاري چاپېریال کې د سټرېس کموالی د دې باعث کېږي، چې تاسې نوې پنځونې وکړی او ورځ تر بلې مو کار په ښه ډول سرته ورسوی.
هڅه وکړئ چې په کاري چاپېریال کې هغه عوامل چې ستاسې وخت ضایع کوي، بیخي کم او د صفر درجې ته راورسوئ.
د بېلګې په ډول، که مو کوم همکار هره دقیقه ستاسې خوا ته راځي او له تاسې سره خبرې کوي، ښه ده چې هغه ته د خپل کار د ډېروالي په اړه ووایئ، وبښئ! کار مې پاتې دی، که زه دغه کار وکړم، ښه به وي. له هغو ملګرو چې ستاسې کاري وخت ضایع کوي، هیله وکړی چې دا خبرې به د ډوډۍ خوړلو په وخت کې وکړو. که دغه همکار مو داسې کس وي، چې ډېر وخت پوښتنې کوي، ښه ده چې په اونۍ کې یوه ورځ او یو ساعت ورته وټاکئ او د هغه ستونزې چې په وس مو پوره وي، حل کړئ.
مخکې له دې چې پر کار مو پیل وکړی، ښه ده چې ټول ضروري توکي مو له ځان سره ولری. کله چې د کار پر مهال د کتاب او یا هم د کمپیوټر د چارجر لپاره ولاړېږی، هم مو تمرکز له منځه ځي او هم مو هغه د کار خوند چې تاسې پرې پیل کړی، مات مات کېږي. مانا دا چې بیا ستاسې هغه لومړۍ جذبه نه پاتې کېږي.
۲- له خپلو وړتیاوو سره سم مو کاري پلان جوړ کړئ
تر اوسه مو دا معلومه کړې، چې د ورځې په اوږدو کې مو د انرژۍ کچه څومره ښکته او پورته کېږي؟ موږ ټول د ورځې په اوږدو کې ځینې داسې ساعتونه لرو، چې په هغه کې د پاتې ورځې په پرتله ډېره انرژي لرو. خو ځینې بیا داسې ساعتونه هم لرو، چې په هغه کې تر ټولو ستړی او مات احساس کوو.
دا مو خوښېږي چې په کم وخت کې ډېر او په ښه کیفیت سره کار ترسره کړی؟ که مو خوښېږي، پر همدې موخه او پلان مو کار وکړئ، چې په کم وخت کې ډېر او په ښه کیفیت کار وکړئ. د ورځې هغه ساعتونه چې تاسې د پاتې ورځې په پرتله په کې د پوره انرژۍ احساس لری، هغو کارونو ته ځانګړي کړی، چې ډېر دقت او تمرکز ته اړتیا لري.
د هغو ساعتونو په اړه چې تاسې په کې ستړی احساس کوی، څو دقیقې فکر وکړئ. اوبه وڅښئ، له کار ځایه مو پاڅېږئ او څو قدمونه واخلئ.
۳- بې ارزښته کارونه نور مه کوئ
ټول کارونه یو شان نه دي، ځینې کارونه مهم او ډېر ارزښت لري، تاسې باید پر هغه ډېر تمرکز وکړئ. ځینې کارونه بیا ډېر ارزښت نه لري او که لري یې هم، له ډېر وخت وروسته یې پایله په لاس راځي، ښه ده چې پر ځای یې د مهمو او ژر لاسته راتلونکو پایلو پر کارونو تمرکز وکړئ.
د دې لپاره چې ځانونه له دغو بې ارزښته کارونو څخه خلاص کړی، اول باید دا ځان ته معلومه کړئ چې ستاسې وخت په څه څه تېرېږي. یوـ دوې اونۍ مو د دفتر د کاري لایحې مطابق کار وکړئ، پایلو ته یې ښه دقت وکړئ او معلومه کړئ چې تاسې ډېر وخت په څه کې مصرف کړی دی؟ کوم کارونه مو د دې باعث شوي، چې هم د دفتر او هم خپلو شخصي موخو پر لور حرکت وکړی؟
که نه شی کولای چې کوم کارونه مو تر ټولو مهم او ارزښت لرونکي دي، د کارونو له ډله بندي کولو څخه استفاده وکړئ. دا ډله بندي کولای شي له تاسې سره د مهمو او ارزښت لرونکو کارونو په تشخیص کې مرسته وکړي.
تاسې به په همدغه د کارونو ډله بندي کولو کې داسې کارونه هم پيدا کړی، چې چندانې ارزښت به نه لري، خو مهمه ده چې سرته یې ورسوی. دا ډول کارونه کولای شی یو بل ملګري ته وسپارئ. که مو ولیده چې دغه کار سخت دی، ښه ده چې په اړه یې بیا فکر وکړئ، چې ښه، تاسې یې سرته ورسوی او که یې بل چا ته وسپاری.
