د ټاکنو په تړاو وروستي بدلونونه لا هم داسې دي چې ښکاري موږ له لانجو، درغلیو، ګډوډیو او ناقانونیو یوې ډکې پروسې ته روان یو. د ټاکنو په تړاو سره له اوسه د پراخو ستونزو تصویرونه دي. هره ورځ په ټاکنیزو منډو ترړو کې دولتي امکانات کارول کېږي او قانون نقضېږي، خو هېڅوک نشته چې د دغو کړنو مخه ونیسي. له بله اړخه د ټاکنو پر کمېسیون هم پراخې نیوکې دي چې نه دی توانېدلی، د ټاکنو په اړه پوره تیاری ونیسي. ویل کېږي چې ځینو سیمو ته ټاکنیز مواد نه دي رسېدلي، په ډېرو سیمو کې موقت کارکوونکي نه دي نیول شوي. د هغوی نیول او روزل وخت غواړي، خو ټاکنو ته یوازې شپږ ورځې پاتې دي. له بله اړخه وېل کېږي چې د مرکزونو د تړښت او پرانیستې په چاره کې هم ستونزه شته. په ځینو امنو سیمو کې مرکزونه تړلي دي، خو په ډېری ناامنو سیمو کې ډېر مرکزونه پرانیستي دي. له همدې امله سره له اوسه د پراخو درغلیو او ناقانونیو وېره شته.
کم داسې کاندیدان به وي چې د درغلیو لپاره تیاری نه لري، خو پیاوړي کاندیدان د پراخو درغلیو لپاره تیاری لري. سره له اوسه دوی نه یوازې په ټاکنیزو کمېسیونونو کې له خپل نفوذ نه ګټه اخلي، بلکې نور حکومتي واک او ځواک هم کاروي چې درغلي وکړي. ویل کېږي چې دولت ساز ټیم په دې چاره کې مخکښ دی، خو د ثبات او همپالنې ټیم هم چې څه دولتي امکانات کارولی شي، مخ ترې نه اړوي.
اوس د درغلیو لپاره دغو تیاریو ته په کتو ښکاري چې راتلونکې ټاکنې به له پراخو ستونزو ډکې وي. ښايي د ډېرو درغلیو اسناد او شواهد هم راښکاره شي او دا چاره به بیا له نورو کاندیدانو سره مرسته وکړي، چې د ټاکنو پایله ونه مني. په دې سره موږ راتلونکې ټاکنې د واک د مشروع لېږد لوري ته نه، بلکې د لانجو او ستونزو لوري ته وړي. تر دې مهمه دا چې د بهرنیانو لخوا هم داسې پیغامونه ورکول کېږي چې ګواکې ستونزه پېښېږي. هغوی یو ځل هڅه کوي چې په ټاکنو کې درغلۍ وشي او بیا دا درغلۍ د خپلو سیاسي موخو لپاره وکاروي. همدا چې امریکايي چارواکي بیا بیا د رڼو، عادلانه او سراسري ټاکنو غږ کوي، د دې مانا دا نه ده چې دوی رښتیا همداسې ټاکنې غواړي، بلکې دوی غواړي له ټاکنو وروسته همدا خبرې د خپلو سیاسي موخو لپاره وکاروي. بهرنیان، په ځانګړي ډول امریکایان نه غواړي چې واک سم ولېږدول شي، بلکې غواړي لانجه جوړه کړي او بیا د ۲۰۱۴ میلادي کال په شان لاسوهنه وکړي او موږ ته یو ناقانونه حکومت جوړ کړي.
همدغو ستزونو ته په کتو، پکار ده چې یو ځل بیا پر دې فکر وشي چې را روانې ټاکنې موږ ته د واک د مشروع لېږد زمینه برابروي او که موږ د ناقانونۍ، لانجې او ستونزو لوري ته وړي. که موږ د لانجې او ستونزې لوري ته روان یو، نو بیا پکار ده چې پر ټاکنو له سره غور وشي او په لوی لاس ځان ته لانجه پیدا نه کړو.
