نن د ولسمشریزو ټاکنو لپاره د ټاکنیز کمپاین وروستۍ ورځ ده. د ټاکنیز کمپاین تر ډېره پیکه وه؛ ځکه چې د سولې خبرې روانې وې. له یوه اړخه خلکو له ټاکنیزو منډو ترړو سره لېوالتیا نه ښوده، له بله اړخه ډېری کاندیدان باوري وو چې د سولې پروسه بریالۍ کېږي او ټاکنې نه کېږي. د سولې د خبرو د بندېدو په تړاو د ټرمپ له ټویټ وروسته کاندیدانو کمپاین پیل کړ، په کابل او ولایتونو کې یې غونډې وکړې. د کاندیدانو پر ټاکنیزو هلو ځلو لا ډېرې نیوکې شته او هغه څه پکې ونه ویل شول چې باید ویل شوي وی.
اوس چې ټاکنیزې منډې ترړې ختمېږي، هېڅوک نه پوهېږي چې کوم کاندید د راتلونکي لپاره څه پلان لري. کاندیدانو د دې پرځای چې خپلې تګلارې او پروګرامونه تشرېح کړي، یو پر بل یې نیوکې وکړې، تورونه یې ولګول، جعلي خبرونه یې جوړ کړل، په ټولنیزو رسنیو کې یې یو بل ته ښکنځلې وکړې او یو بل یې تخریب کړل. دوی په دې برخه کې شته قوانین نقض کړل او آن یو د بل د تخریب لپاره یې پر افغاني ارزښتونو او اسلامي اصولو هم پښه کېښوده. دوی په کمپاین کې نه یوزاې دا چې د یو بل پر تخریب بوخت وو، بلکې پیاوړو کاندیدانو د پراخو او سیستماتیکو درغیلو لپاره پر تیاریو کار کاوه. دوی د دې پر ځای چې خلکو ته خپل پروګرامونه تشرېح کړي، داسې څه ووايي چې خلک زړه ورته ښه کړي، په ټاکنو کې برخه واخلي او بیا دوی ته رایه ورکړي، دوی هڅه کوله چې څنګه د صندقونو د ډکولو لارې چارې ومومي.
په کمپاینونو کې بیا ژمنې وې، هوايي خبرې وې، هوايي دهلېزونه وو، د سولې او امن ښکلي شعارونه وو، د فساد پر ضد د مبارزې او ښې حکومتولۍ خبرې وې، خو هېچا ونه ویل چې دا کارونه به څنګه کوي. هېچا ونه ویل چې سوله به څه ډول او له کومو لارو راولي، د دې لپاره څه عملي پلانونه او طرحې لري. هېچا ونه ویل چې له فساد سره به څنګه مبارزه کوي، له کومه ځایه به یې پیلوي او پخوا یې په دې برخه کې څه کړي دي. دوی یوازې شعاري خبرې وکړې، هوايي ژمنې یې وکړې او د ۲۰۱۴ ز کال په شان چا فرانسې ته د سبزي د لېږدولو ژمنې کولې، چا د یو میلیون کارونو د پیدا کولو او چا هم د افغانستان د سنګاپور کولو هوايي او تشې ژمنې. له همدې امله دوی خلکو ته هېڅ داسې څه ونه ویل چې پر اساس یې هغوی راووځي او په ټاکنو کې برخه واخلي.
اوس چې ټاکنو ته دوې نورې ورځې پاتې دي، داسې وېره ده چې ډېر کم خلک به په ټاکنو کې برخه واخلي چې دا چاره په جدي ډول د راتلونکي حکومت پر مشروعیت اغېز کوي. هغوی چې رایه ورکوي، له بده مرغه پروګرامونو ته نه، بلکې څېرو او بیا هم په قومي او نورو تمایلاتو رایه ورکوي. له بله اړخه لا هم هغه جدي او اصلي اندېښنه او پوښتنه پر ځای ده چې دا ټاکنې به پایله ولري او کاندیدان حاضر دي چې د دغو ټاکنو پایله ومني؟؟؟
