په افغانستان کې سیاسي فضا لا هم ټاکنیزه ده، خو داسې ښکاري چې د افغانستان مسئله د سیمې د هېوادونو او نړیوالو قدرتونو لپاره مهمه موضوع ده. تازه د افغانستان لپاره د روسیې ځانګړي استازي ضمیر کابلوف ویلي چې هېواد یې د افغان سولې په تړاو نړیواله غونډه جوړه وي. په دې غونډه کې چې په اکټوبر کې به جوړیږي، د روسیې، چین، امریکا او پاکستان استازي برخه اخلي. روسي چارواکو تایید کړې چې په دې اړه یې له طالبانو سره اړیکې ټینګې کړې دي، خو په دې اړه یې څه نه دي ویلي چې افغان حکومت هم دې غونډې ته بلل کېږي او که نه.
سوله زموږ افغانانو جدي اړتیا ده، خو دلته د جګړې له دوام د ځینو هېوادونو ګټې او د ځینو هېوادونو زیانونه هم غوټه شوي دي. له همدې امله اوس د افغانستان د سولې چاره یوازې زموږ کورنۍ مسئله نه ده، بلکې ځینې نور هېوادونه هم غواړي چې په افغانستان کې روانه جګړه ختمه شي. روسیه، چین او د سیمې ځینې نور هېوادونه فکر کوي چې د افغانستان جګړه یې ګټي ګواښي او ښايي د جګړې دوام دغو هېوادونو ته هم د جګړې د لېږد سبب شي. له همدې امله غواړي چې په افغانستان کې روانه جګړه ختمه شي. له بله اړخه ځینې سیمه ییز هېوادونه، په ځانګړي ډول د منځنۍ اسیا هېوادونه په افغانستان کې د دې لپاره هم امن او سوله غواړي، چې دوی له جنوبي اسیا سره ونښلول شي او اقتصاد او سوداګري یې وده وکړي. له شک پرته ځینې هېوادونه له امریکا سره د سیالۍ او په افغانستان کې د نفوذ زیاتولو په موخه هم غواړي چې د سولې په خبرو کې هڅې وکړي او فعال رول ولوبوي.
اوس چې په روسیه کې غونډه جوړیږي، له شک پرته چې د روسي ګټو د خوندي کولو او په افغانستان کې د نفوذ تر څنګ، دغه هېواد غواړي افغان جګړه ختمه کړي. دوی وېرېږي چې د جګړې دوام به د دوی تر کنټرول لاندې سیمو ته ناامني وغځوي. اوس چې زموږ حکومت په رسمي ډول اعلان کړی چې سوله ورته لومړیتوب نه لري او په دې ورځو کې ټاکنې ورته لومړیتوب لري، نو د سولې لپاره هڅې نه ښکاري. د ټاکنیزو لانجو اوږدوالی به د دې لامل هم شي چې د اوږده وخت لپاره د دولت په لومړیتوب کې سوله او د سولې هڅې نه وي. له همدې امله به سوله تر ډېره د بهرنیو هېوادونو او له حکومت څخه د باندې کړیو د فعالیتونو او هڅو محور وي. له همدې امله اوس په مسکو کې غونډه جوړیږي.
مسکو، چین او پاکستان د خپلو ګټو لپاره هڅې کوي چې د امریکا او طالبانو ترمنځ د سولې خبرې له سره پیل او بریالۍ شي. دوی به د خپلو هېوادونو ګټو ته هم ګوري، خو له بده مرغه په افغانستان کې حکومت او سیاسیون پر داسې ټاکنو بوخت دي، چې غوڅ اکثریت خلکو ورته ”نه” وویل. اوس چې څومره موږ په ټاکنیزو چارو کې بوختېږو، دا پر سوله او د سولې پر هڅو همدومره منفي اغېز کوي. که د دغو ټاکنو په پایله کې حکومت هم رامنځ ته شي، په دې خاطر چې د خورا کمو خلکو په رایو ټاکل شوی، نو په سوله کې به یې پر دریځ هم منفي اغېز وکړي. پکار ده چې ولس او سیاسیون پر یوه ستر او پیاوړي محور کار وکړي، چې له افغاني اړخ څخه دغو خبرو ته ننوځي او د سولې په بریا او د افغاني ګټو په خوندیتوب کې رول ولوبوي.
