د امریکا ولسمشر ډونالډ ټرمپ یو ځل بیا ویلي چې د امریکا اوږدې جګړې به ختموي. هغه ویلي، خپلو قوماندانانو ته یې ویلي چې له افغانستان څخه د ځواکونو د وتلو تیاری ونیسي. ټرمپ تر دې وړاندې هم ویلي چې نور بې ګټې جګړې نه کوي او له افغانستان څخه خپل ځواکونه وباسي. له دې سره والسټرېټ ژورنال په یوه مطلب کې ویلي چې امریکا غواړي له طالبانو سره بیا خبرې پیل کړي.
د امریکايي ځواکونو د وتلو بحث څومره جدي دی او ایا د سولې خبرې بیا پیلېږي؟
په امریکا کې عامه ذهنیت د امریکا د بهرنیو جګړو، په ځانګړي ډول د افغانستان د جګړې خلاف دی. دوی غواړي چې په افغانستان کې امریکايي جګړه ختمه شي او ځواکونه یې بېرته امریکا ته ور وګرځي. له همدې امله بیا بیا پر حکومت او سیاستوالو فشار راوړي چې په دې تړاو ژر تصمیم ونیسي او دا ستونزه حل کړي. له دې امله چې د ۲۰۲۰ کال په پای کې په امریکا کې د ولسمشرۍ ټاکنې کېږي، نو سیاستوال او کاندیدان غواړي د ولس د خوښې کارونه او ژمنې وکړي، څو د هغوی رایه خپله کړي. له همدې امله ټرمپ او نور سیاستوال بیا بیا وايي چې خپل ځواکونه له افغانستان څخه وباسي. که څه هم د بشپړ ایستلو بحث یو څه ستونزمن ښکاري، خو د عامه ذهنیت لپاره به امریکا په افغانستان کې خپل ځواکونه را کم کړي او دا کار حتمي کېدونکی دی.
له بله اړخه د ځواکونو د ایستلو او کمولو لپاره پکار ده چې امریکا په افغانستان کې یو سیاسي جوړجاړی وکړي. له سیاسي جوړجاړي پرته له افغانستان څخه د ځواکونو وتل به نه یوازې دا چې نړۍ ته په جګړه کې د امریکا د ماتې تصویر ورکوي، بلکې امریکايي ګټې هم له ګواښ سره مخ کوي. له همدې امله امریکا اړ ده چې له طالبانو سره سوله او سیاسي جوړجاړی وکړي. طبیعي ده چې امریکا غواړي چې دا سوله او سیاسي جوړجاړی یې ګټې خوندي کړي او دغه راز نړۍ ته د خپلې بریا تصویر ورکړي. له همدې امله یې له طالبانو سره اوږدې خبرې وکړې او له همدې امله یې خبرې اوس درولې دي. دا خبرې به اوس بیا پیلېږي. داسې ښکاري چې د بندیانو تبادله به د دې سبب شي چې ټرمپ ووايي، طالبان بدل شوي دي. لومړنۍ تبادله شوې ده او داسې اټکل کېږي چې د امریکايي پوهنتون استادان به هم د انس حقاني په شمول، له ځینو طالب بندیانو سره تبادله شي. دا چاره او ځینې نور سمبولیک بدلونونه به ټرمپ ته د خبرو د بیا پیل اجازه په لاس ورکړي. دا خبرې به بیا پیل شي، چې ښايي لنډ وخت دوام وکړي او په پایله کې یې یو داسې جوړجاړی رامنځ ته شي چې له افغانستان څخه د امریکايي ځواکونو وتلو او د امریکايي ګټو خوندیتوب ته لاره هواره کړي.
د امریکا او طالبانو معامله کېدونکې ده، خو پکار ده چې موږ افغانان دې چارې ته جدي پام وکړو. سوله زموږ اړتیا ده او له همدې امله باید د سولې لپاره له ټولو لارو چارو کار واخلو. له سولې سره مخالفت، د امریکا د پاتې کېدو هڅې او د جګړې دوام نه زموږ په خیر دی او نه هم دا زموږ د ستونزو له حل سره مرسته کوي.
