پنځه هغه نښې چې وايي، تاسې مرستیال ته اړتیا لری

ټول انسانان په بېلابېلو دلایلو د نورو مرستې او کومک ته اړتیا لري. له دې اړتیاوو کولای شو په دنده او کار کې د بل مرستې هغې ته یې اشاره وکړو. تر ډېره دا ډول اړتیاوې ډېرې پېچلې وي او ښايي له ځان سره نوي مسوولیتونه هم ولري. کله چې دې دندې او کار پر مهال د بل چا مرستې ته اړتیا پيدا کېږي، دا وخت تر هرڅه ډېر ستونزمن د هغه قېمت پرې کول وي. کېدای شي له نورو مرسته غوښتل یا د خپلو مخکنیو ځینو مسوولیتونو سپارل بل کس ته، چې مخکې مو هم ورسره کار کړی وي، تاسې ته یو څه ګران تمام شي. خو مهمه او اصلي پوښتنه  چې دلته کېږي او ډېری وخت یې ډېری کسان له ځان څخه نه پوښتي، دا ده چې: «که د خپلو ځینو کارونو د تر سره کولو لپاره یو بل مرستیال ونه لری، دا به درته په څومره زیان تمام شي؟»

موږ په همدې مقاله کې د هغو نښو نښانو په اړه خبرې کوو، چې وايي، تاسې په خپل کار او دنده کې بل مرستیال یا داسې یو کس ته هم اړتیا لری، چې د کارونو ځینې برخې مو هغه ته وسپاری. همدا مقاله تر پایه ولولئ.

کله چې له دې هرې یوې نښې نښانې سره مخ شوی، مانا یې دا ده چې تاسې د خپلو کارونو په سم سرته رسولو کې بل کس ته هم اړتیا لری. خو له دې سره سره که بیا هم د مرستیال له ګومارلو وېرېږی، دې نښو نښانو ته پام وکړئ:

۱ـ د خدمتونو او محصولاتو په وړاندې کولو کې نیمګړتیاوې

کله چې د کار کولو په چاپېریال کې له تاسې ډېرې تېروتنې او خطاوې کېږي یا د مهمو کارونو د سرته رسولو فرصتونه له لاسه ورکوی، مانا یې دا ده چې تاسې بل مرستیال ته اړتیا لری. ځینې وخت دا تېروتنې د مسوولیت نه احساسولو له امله هم رامنځ ته کېږي او د مسوولیت نه احساس هغه وخت منځ ته راځي، چې تاسې د کار او دندې پر مهال یو ویښ ملګری ونه لری. که تاسې ښه او وړ کاري ملګری ولری، نه دا چې تاسې به مو شته مسوولیتونه په ښه ډول سرته ورسوی، بلکې د نورو کاري ټیمونو په پرتله به د کاري شرکت پر فضا ښه اغېز وکړی.

۲- د کاري ټیم، مشتریانو او یا هم شریک ناخوښي

هغه کسان چې ستاسې شاوخوا کار کوي، کولای شي تاسې ته په اسانۍ سره دا وښيي چې تاسې د خپلو چارو د ښه سرته رسولو لپاره بل مرستیال ته ضرورت لری. کېدای شي هغوی له دې هم اندېښنه ولري، چې تاسې به په دې اړه د هو ځواب ور کړی او که دې نه.

که تاسې ته د هغوی له خوا دا خبره وهم نه شي، تاسې په مجموع کې خپله کاري فضا و ارزوئ، که مو دا احساس کړه چې کاري ملګري او یا د کاروبار شریک مو له تاسې ناخوښ دی، د جبران لپاره یې یو ښه مرستیال وټاکئ، څو تاسې ته وښيي چې ستاسې کومې کړنې د هغوی د ناخوښۍ لامل شوې دي.

۳- ستاسې کمپيوټر او برېښنالیک

ستاسې کمپيوټر څنګه دی؟ ایا د کاري دفتر اړوند مهم فایلونه مو د سکرین پر مخ تیت او پرک اچولي دي؟ ستاسې برېښنالیک څنګه؟ څومره ایمیلونه لا هم تاسې ته بې ځوابه پراته دي، چې تر اوسه مو هېڅ یوه ته هم ځواب نه دی ورکړی او ستاسې د ځواب تمه کوي؟

دا ټول موارد د دې ښکارندويي کوي چې تاسې د یو ښه او وړ کس مرستیال ګومارلو ته اړتیا لری. کله چې تاسې ښه او فعال کاري مرستیال ملګری ولری، تاسې د کارونو په ښه تر سره کولو سربېره نظم او ډیسپلین ته هم هڅوي. ارواپوهان وايي، نظم او ډیسپلین د بریالي ژوند لومړۍ کړۍ ده چې وروسته نورې کړۍ ورپورې بندېږي.

۴- ستاسې دنده او کار

اوس یو څه وسیع او پراخ فکر وکړئ، کېدای شي د خپل پخواني کسب و کار او یا هم مخکنیو مشتریانو د له لاسه ورکولو په حال کې یاستی. که همداسې وي، بیا هم په ټینګار او تاکید سره وایو چې تاسې د یو مرستیال ګومارلو ته اړتیا لری. په دې کار سره کولای شی تاسې په خپلو کارونو کې بېرته نظم راولی او هغه مشتریان یا پخوانۍ دنده او کار مو چې له لاسه ورکړي دي، بېرته لاس ته راوړی.

۵- ستاسې باور او محبوبیت

کله چې په کار او دنده کې د یو ښه مرستیال ګومارلو پر وخت، هغه ونه ګوماری، ممکن په کاري چاپېریال او د همکارانو ترمنځ مو خپل پيدا کړی باور او محبوبیت له لاسه ورکړی. هغه کسان چې تاسې ورسره سروکار لری، که یې اړتیاوو ته توجه ونه کړی او د هغو په له منځه وړلو کې تر خپلې وسې ورسره مرسته ونه کړی، هغه ده چې بیا پر تاسې باور نه کوي او تاسې ته د یو جدي او په خپلو چارو کې د یو ځیرک همکار په سترګه نه ګوري. هڅه وکړئ چې خپلې ورځنۍ چارې په ښه ډول سرته ورسوی او تر څنګ یې له خپلو همکارانو سره هم مرسته وکړی.

ښه خبره دا ده چې هر وخت له خپلو همکارانو سره خپلو کړو وړو ته توجه وکړئ او هغه اعتبار او باور چې د هغوی پر وړاندې یې لری، له لاسه ورنه کړی. کېدای شي د یوه ښه او وړ مرستیال په ګومارلو سره وکړای شی، خپل وخت وسپموی او له خپلو همکارانو سر پر اړیکو بیا فکر وکړی. نو مهمه ده چې په کاري چاپېریال کې خپل اعتبار او باور وساتی.

مهم ټکی

که تاسې د یوې ډلې یا ګروپ مدیریت پر غاړه لری، رښتیا درته وایم چې که تاسې خپله کاري ډله وهڅوی، هېڅ وخت به د نوي کار کوونکي ګومارلو ته اړتیا پیدا نه کړی. د دې کار د تر سره کولو لپاره بېلابېلې لارې چارې لکه په ګډه د پلان جوړول، د کار کوونکو تر منځ د مسوولیت وېش او د ځینو کسانو پر ځای د هغوی کارونه مخ ته بېول اغېزمنې تمامېدای شي.

اخري خبره

پورت نښو نښانو ته په کتو او د یو ښه مرستیال په ګومارلو سره کولای شی خپله دنده او کار په ښه ډول مخ ته یوسی او په دې ډول سره ځان له خطره وساتی.