دا پوښتنه چې ایا رهبري یوه ذاتي وړتیا ده او که کسبي، له څو لسیزو را پدېخوا بې ځوابه پاتې شوې ده او هر کله چې یو نوی رهبر د عمل میدان ته راځي، همدا پوښتنه بیا د خلکو په خولو ښکته پورته کېږي. د بیل ګېټس را څرګندېدل دوباره د دې پوښتنې د پوښتلو لامل شول. هېڅوک نه شي کولای چې په قطعي ډول ووايي چې هغه ان له اوله دنیا ته رهبر راغلی و، خو دې هغه عمل او کار دا ښيي چې څنګه هغه د نړۍ د سوداګرو په منځ کې د ښې رهبرۍ پر اسطوره بدل شو. هماغسې لکه چې د یو خوراک د برابرولو لپاره څو شیانو ته ضرورت وي، څو یې خوند ښه برابر شي، هماغسې د یو ښه رهبر پاتې کېدو لپاره هم ځینو ځانګړو وړتیاوو ته اړتیا شته چې بیا همدا ځانګړې وړتیاوې د هغه د ښه ځلېدو لامل کېږي. بیل ګېټس هم له دې ډلې استثنا نه دی. هغه د نړۍ په سطحه له شتمنو او پېژندل شو کسانو څخه دی. هغه د ټولې امریکا په سطحه څو جایزې ګټلې دي. ګېټس په امریکا کې خلک د یو ښه ملګري په حیث پېژني او د هغه په اړه هېڅ بد نظر نه لري. موږ په همدې مقاله کې د هغه ځینې هغه ځانګړنې لولو، چې هغه یې د رهبرۍ پر اسطوره بد کړ:
۱ـ د خپلو موخو تعقیبول
ګېټس له کمپیوټر سره لېونۍ مینه لرله او خپل ډېر وخت به یې د پروګرامونو په لیکلو تېراوه. که څه هم هغه یو تکړه او لایق زده کوونکی نه و، خو پر دې پوه و چې د هغه څه تعقیبول چې دی ورسره مینه لري، ډېر مهم دي. د ګېټس همدا پرېکړه د کمپیوټر په نړۍ کې د بې ساریو پرمختګونو لامل شوه. له کمپیوټر سره د هغه زیاته مینه د مایکروسافټ شرکت د رامنځ ته کېدو سبب شوه.
که غواړی چې یو کار سر ته ورسوی، له دې چې ایا رښتیا مو هغه کار خوښېږي، په دې اړه ځان ښه باوري کړئ. په هغه شرکت او سازمان کې چې ستاسې نه خوښېږي، هېڅکله د کار کولو زړه مه ښه کوئ. د یو رهبر په حیث نورو ته د پو پلان، ستراتیژۍ او انګېزې ورکول، چې په تاسې کې کوم شور او هیاجان را منځ ته نه کړي، رښتیا چې په داسې یو چاپېریال کې کار کول ستاسې لپاره ډېر سخت دي. که یوازې د پیسو په خاطر کار کوی، دا قضیه بالاخره ستاسې په کړنو او چارچلند کې خپل اغېز ښکاره کوي. هرکله چې هغه کار کوی چې تاسې له زړه ورسره مینه لری، هر ورځ به ترې خوند اخلی، په ښه طبیعت به کارځای ته ځی او ورځ تر بلې به خپلو ټاکلو موخو ته نږدې کېږی.
۲- له کاره نه ستړي کېدل
ګېټس پوهېده چې بریا په یوه شپه نه تر لاسه کېږي، هغه باوري و چې موخې او بریا ته رسېدل د کار تر پای ته رسولو وروسته لاسته راځي. د هغه د لاسته راوړلو لپاره باید ډېر کار وشي او ډېر ژر د پایلې تمه ونه شي. ګېټس د هغې مینې او علاقې له مخې چې له خپل کار سره یې درلوده، کلونه کلونه په خپل کور کې د (کودونو) او (پروګرامونو) پر رامنځ ته کولو تېر کړل او بالاخره هغه لاره یې پیدا کړه چې له مخې یې ټوله نړۍ سره وتړل شوه. دې کارونو له هغه څخه ډېر وخت ونیو.
یو رښتینی رهبر خپله د عمل ساحې ته راکوزېږي او خپلې مټې بډ وهي؛ ځکه هغه پوهېږي چې یوازې په سر کې د ښو ایډیاوو لرل بسنه نه کوي، پر هغوی باید کار وشي. یو رښتینی رهبر تل هڅه کوي چې ایډیاوې یې پر ښې پایلې لاسته راوړونکي کار بدلې شي. ګېټس له هغې وروسته چې مایکروسافټ بریالی شو، شپه او ورځ یې هڅه کوله چې د خپلو مخاطبانو اړتیاوې درک کړي او هڅه یې کوله څو داسې تولیدات بازار ته وړاندې کړي، چې د زده کړې او سوداګرۍ په برخه کې د خلکو ستونزې هوارې کړای شي.
۳- پرله پسې هڅه او پرمختګ
ګېټس په هېڅ عنوان هغه کس نه دی چې نننۍ تر لاسه شوې بریا دې په اسانۍ ومني. هغه خپله وايي: «د بریاوو لاسته راوړلو لپاره د جشن نیول ډېر مهم دي؛ خو له هغه مهم بیا له ماتې خوړلو درس اخیستل دی». ګېټس نور ته وايي: «ستاسې ناخوښ مشتریان، ستاسې لپاره د زده کړې تر ټولو ښه ماخذونه دي».
بیل ګېټس په هېڅ صورت دا اجازه چا ته نه ورکوله چې د مایکروسافټ کاري ټیم د له سستو او ټنبلو کسان ډک شي، حتی تر هغه یې هم دا غوښتنه ژوندۍ وه چې شرکت یې د بازار تر ټولو ډېرې ګټې لاسته راوړونکی هم شو.
یو رهبر باید ساکن او بې هڅې او تلاشه نه وي، بلکې خوځنده او پلټونکی وي. ګېټس د رهبرۍ پر اسطوره بدل شو، ځکه هر وخت یې هڅه کړې چې د ودې او پرمختګ په حال کې پاتې شي. هغه پوهېده چې نړې هره ورځ د بدلون په حال کې ده او جوخت ورسره د خلکو اړتیاوې او غوښتنې هم تر ډېره بدلون کوي. هغه پوهېده چې مایکروسافټ باید د خپل پوزېشن د ساتلو لپاره هر وخت د بدلون او نوښت په هڅه کې وي.
هماغسې چې ګېټس وايي: «ما هر وخت هغه تغیرات چې په راتلونکو دوو کلونو کې پېښېدل، حد اکثر نیولي او هغه تغیرات چې په راتلونکو لسو کلونو کې راتلل، هغه مې حد اقل نیولي دي. هېڅکله ځان ته دا اجازه مه ورکوئ چې د خپلو کارونو تر فشار لاندې راشی».
۴- له نورو سره مرسته
یو رښتینی رهبر له نورو سره مرسته کول، هغوی ته سمه لار ښودل، د هغوی اړتیاوې پوره کول او د ژوند د ډېرو اړخونو په اړه د هغوی پوهول خپله دنده بولي.
ګېټس هر وخت د بشردوستانه کړنو په مقابل کې خپلې پیسې او وخت قرباني کړي دي او د دې قربانۍ ورکولو په بدل کې به ډېر خوشالېده. هغه له دې چې له نورو سره مرسته وکړي، هغوی ته سمه لار وښيي، څو د راتلونکي لپاره ښه رهبران وروزي، له دې به یې ډېر خوند اخیست.
د ګېټس او مېرمنې خیریه بنسټ یې په نړۍ کې د ماشومانو او نورو اړو خلکو د اړتیاوو پوره کولو په موخه، په میلیاردونو ډالر لګولي دي. کېدای شي له همدې ځانګړنې د ګېټس د شخصیت په اړه خپله قضاوت وکړی.
