بې له شکه چې “یوازیتوب” خوند لري؛ ځکه کولای شی د خپلې خوښې چارې لکه فکر کول، کتاب لوستل، شعر لیکل او دې ته ورته نور کارونه په یوازیتوب کې تر سره کړی.
که غواړی چې خپلو موخو ته تنوع او نوښت ورکړی او د ځان لپاره بالقوه ملګري پیدا کړی، ستاسو په شاوخوا کې په میلیونونو کسان شته چې ستاسو په څېر موخې لري. نو که غواړی د ځان لپاره ډېر د خپلې خوښې او دایمي ملګري پیدا کړی، نو دغه ټکي په پام کې ونیسئ:
۱- د خلکو په منځ کې وخت تېر کړئ
که غواړی چې ملګري پيدا کړی، نو یوازیتوب پرېږدئ او له کوره ووځئ؛ ځکه تر دې چې په کور کې د ټلوېزیون تر شا ناست یاست او په دې تمه یاست چې ملګري به پیدا کړی، دا ښه ده چې په ځینو مجلسونو کې هم په روحي او هم په فزیکي ډول ګډون وکړئ.
د بېلګې په توګه، په ورزشي کلپ کې نوملیکنه وکړئ، کېدای شي هلته داسې کسان پيدا کړی چې ګډ او مشترک ټکي ولری، په اصل کې له هغو کسانو سره ملګري تر ډېره دوام پیدا کوي چې ډېرې مشرتکې وجې ولری؛ ځکه که ګډ ټکي مو له یو بل سره زیات وي، کېدای شي چې په ځینو مسایلو کې سره ټکر شی.
په خپله خوښه او خيريه کارونه تر سره کول هم د ملګرو او دوستانو د پیدا کولو لپاره تر ټولو غوره لاره ده، چې په دې چارو کې له ډېرو کسانو سره مخ کېږی. د دې ډول ګډو کارونو په تر سره کولو سره کولای شی له زیاتو خلکو سره اړیکه ونیسی او خپل نظرونه ورسره شریک کړی.
۲- خبرې تاسو پيل کړئ
کولای شی په یوه ورزشي ګروپ، مرستندویه ټولنه او یا هم د انټرنېټ له لارې په یوه ټولنه کې غړي شی، خو څو چې په خبرو کولو پیل ونه کړی، نه شی کولای د ځان لپاره ملګري او دوستان پیدا کړی. تر ډېره هڅه وکړئ چې په لومړي سر کې د خبرو کولو پر مهال موسکي شئ؛ ځکه که تاسو په تروشه ټنډه له یو چا سره خبرې پیل کړی، کېدای شي مقابل کس چندان ارزښت در نه کړي، خبرې په ورين تندي پیل کړئ، لومړنۍ خبرې مو باید د مهربانۍ او احترام له جملو څخه ډکې وي.
۳- خپل ځان ور وپېژنئ
د لومړنیو خبرو په پای کې خپل ځان ور معرفي کړئ او په ساده ګۍ سره ووایئ: “رښتیا زما نوم… دی” کله چې تاسو خپل ځان معرفي کړ، بې له شکه چې مقابل کس به هم خپل ځان درته معرفي کړي او په دې سره به ستاسو دواړو تر منځ د دوستۍ یوه خښته کېښودل شي.
۴- د کتلو وخت وټاکئ
د بیا ليدلو لپاره سره وخت وټاکئ؛ تاسو کېدای شي له یو چا سره وګوری، ځان ور معرفي کړی، که د دویم ځل لپاره ورسره ونه ګوری، کېدای شي رابطه او اړیکه مو همداسې سره پاتې شي. د بیا لیدلو لپاره وخت ټاکل ډېر کله هغه وخت تر سره کېږي چې دواړه خواوې د دوستۍ لپاره میل ولري. دغه وخت له لاسه مه ورکوئ، کولای شی ورته ووایاست: زه باید ولاړ شم، که غواړی نورې خبرې هم وکړو، کېدای شي بل ځل سره وګورو، داسې وخت چې دواړه په کاپي اندازه وخت ولرو، اجازه راکړئ چې د خپل ټلیفون شمېره درکړم.
په دې سره هغوی ته اجازه ورکوی چې له تاسو سره اړیکه ونیسي، کېدای شي هغوی هم دغه ډول چلند درسره وکړي، خو که داسې وشي، تر ګردو ښه خبره ده.
که مقابل کس له خپلو نوو دوستانو سره د بیا لیدلو وخت نه لري او ستاسو لپاره یې ځواب منفي وي، له دغه چلند څخه یې مه خواشیني کېږئ. دغه راز که مقابل کسه د بیا لیدلو لپاره لېوالتیا ونه ښوده، تاسو پرې ټینګار مه کوئ.
۵- هڅه وکړئ چې ښه ملګری شی
کله چې له یوه چا سره نوي ملګري کېږی، هڅه وکړئ چې په اړه یې بشپړ معلومات تر لاسه کړی، له ورځنیو کارونو او د خوښې وړ له فعالیتونو یې ځان خبر کړئ.
۶- وخت پېژندونکي و اوسئ
له وعدې سره سم ټاکلي ځای ته ځان ورسوئ او که کله مو ناوخته کړه، په بد خلقۍ سره ځواب مه ورکوئ. هېڅکله هم څوک په تمه مه پرېږدئ دا یوه بې ادبي ده او د یوې نوې دوستۍ لپاره ښه پيل نه شي کېدای.
هره کله چې له یوه چا سره د یوه کار د کولو وعده کوی، نو وعده خلافي مه وررسره کوئ.
۸- ښه اورېدونکي و اوسئ
د نورو خبرو ته غوږ نیول، د خوښې وړ لوبو پوښتنه کول تاسو ته اجازه درکوي چې مقابل کس پوره وپېژنی.
هڅه وکړئ داسې وښیئ چې ژوند مو له هر ډول ستونزې پاک او ښه پر مخ ځي.
د خبرو کولو پر مهال یو دم موضوع مه بدلوئ، دا هم مه هېروئ چې د خبرو اهنګ او ریتم مو یو ډول وي، مانا دا چې د خبرو کولو اواز مو ټيټ او جګ نه شي.
تل د خلکو راز وساتئ، څو نور هم درباندې باور وکړي.
د خپل ځان او باورونو په اړه صادق و اوسئ، له شایعاتو څخه ډډه وکړئ او کوم څه چې اوری، باور مه پرې کوئ، څو تاسو د نورو لپاره د اعتماد وړ کس و اوسی او ستاسو په شتون کې د راحتۍ احساس وکړي.
که ملګري مو په کوم کار کې د مرستې اړتیا درلوده، له خپل وس سره سم مرسته ورسره وکړئ.
یادونه: ځینې وخت کېدای شي ستاسو ملګري داسې یو کار تر سره کړي چې ستاسو د خوښې خلاف وي، د بېلګې په توګه، له داسې چا سره ناسته ولاړه کوي چې تاسو یې نه غواړی، نو لازمه نه ده چې خپل ملګری له دې ډول کړنو را وګرځوی او له هغه څه یې منعه کړی، له دې چې ستاسو نه خوښېږي.
کله چې نوي دوستان پیدا کوی، زاړه شاته مه پرېږدئ؛ ځکه دغه کار یوه ستره تېروتنه ده. کېدای شي ستاسو دوستان د مختلفو ټیپونو درلودونکي وي، نو لازمه نه ده چې د یوه دوست لپاره بل پرېښودل شي، هڅه وکړئ چې له هر یوه سره جوړ راشی.
تل باید دا هڅه درسره وي چې نوي دوستان ولټوئ، دا هم باید په یاد وساتئ چې زاړه دوستان در نه هېر نه شي.
نوي ملګري سپينو زرو ته ورته دي، خو زاړه بیا لکه سره زر داسې دي.
هڅه مه کوئ چې د پیسو او ډالیو په اخیستو سره د ځان لپاره نوي ملګري پيدا کړی، که څه هم چې د ملګرو لپاره ډالۍ ورکول ښه او پر ځای کار دی، خو په دې ډول سره نوي دوستان پیدا کول یوه موقتي چاره ده، نه دایمي.
ښه ملګری هغه دی چې هغوی هم په یوه مناسبت او یا هم بې له کوم مناسبته ستاسو لپاره ډالۍ واخلي.
لوستونکیه: د ښو دوستانو لرل لویه مینه ده، نو د خپلو دوستانو قدر وپېژنه!
ښه دوست په بده ورځ معلومېږي.
