تقریباً لس کاله مخکې مې له هیوستون څخه نیویارک ته کاري سفر درلود، د سفر پر مهال هغې ښځې ته متوجې شوم چې زما له څنګه صندلۍ ته ناسته وه. هېڅ داسې څه ونه شول چې دواړه سره اشنا شو. هغه د یو شرکت د خرڅلاو برخې مدیره وه. له ستړي مه شي او جوړ پخیر وروسته مې نیویارک ته د خپل سفر او کاروبار په اړه له هغې سره یو څه خبرې وکړې. له یوڅه خبرو وروسته مجبور وم چې د مطالعې لپاره چوپ پاتې شم، له بکسې مې ورځپاڼه را واخیسته، خو د هغې زما دې کار ته پام نه و، د پرواز تر اخره یې راسره خبرې کولې.
لا له الوتکې نه وو ښکته شوي چې د یوې غریبې او بېچاره ښځې د ژوند کیسې مې ذهن ستړی کړ، له ځان سره مې وویل، هسې دې له هغې سره خبرې وکړې. فکر کوم هغه له یو څه خبرو وروسته داسې بې پروا غوندې شوه، خو بیا یې هم د خپل ژوند د هرې برخې په اړه داسې بې خیاله او بې نوبته پوښتنې او خبرې کولې. هغې په شرکتونو کې له مسوولیتونو، لاسته راوړنو، د هغو موخو په اړه چې همدا کال یې د ځان لپاره ټاکلې وې، د ستونزو په اړه، د هغه ټيم په اړه چې دې ورسره کار کړی و، د رييس په اړه، د هغو شرکتونو د دود او فرهنګ په اړه چې دې پکې کار کړی و، د هغو سفرونو په اړه چې کړي یې وو او حتی د مخکنیو سفرونو په اړه یې جالبې کیسې راته وکړې.
اوس هم د هغه ساعت احساس ښه په یاد لرم «حواس مې ګډوډ وو او سر مې سخت درد کاوه.» غوښتل مې له هغې ځان ورک کړم، خو هېڅ داسې چانس په لاس نه راتلو. هر وار به مې چې وغوښتل فکر یې واړوم، بیا به یې نوې کیسه شروع کړه. بالاخره مې همداسې پرې ښوده، ما ویل ښه ده چې ښه زړه راته تش کړي. ما لیده چې هغه سخته تر فشار لاندې ده او ما ته یې هم د ژوند د هر جنجال په اړه ډېرې کیسې وکړې.
یوه میاشت مخکې مې چې کله د پاسپورټ وخت تمدید کاوه، بیا مې هغه کیسه ذهن کې را یاد شوه. دا وار مې ډېر ښه سفر درلود، دا وار د یوې ډېرې مؤدبه ښځې خوا ته ناست وم چې په ډېر ښه ډول یې رانه د دندې او کار په اړه وپوښتل. لا مو دوه ساعته لار د ښکته کېدو ځای ته پاتې و او ډېره لار مو وهلې وه، خو دا وار مې هېڅ داسې احساس نه کاوه لکه دومره لرې ډېره لار مې چې وهلې وي، دې ښځې له پوښتنې پرته یوه بې ځایه او بې مورده خبر هم نه کوله. بس یوازې به ما ترې پوښتنې کولې او دې به په ډېر ښه ډول د هغه په اړه ځواب راکاوه.
د خپل کار او ژوند په اړه بې ځایه او بې مورده خبرې او له ژونده شکایت کول مو د ملګري او هغه چا پر روان هم بد اغېز کوي، چې تاسې ورته خبرې کوی. دا منم چې هرڅوک په ژوند کې مشکلات لري او په یو ډول نه یو ډول له ژونده ځورېږي؛ خو د دې پر ځای چې تاسې نورو ته شکایت وکړی، ښه ده چې د شکایت کولو پر ځای د هغه د حل لپاره یوه دقیقه کار وکړئ. که غواړی چې خوشاله ژوند وکړی، داسې چې هم مو کار او هم مو ژوند ته رسیدهګي وکړی، دغه لاندې کړنې عملي کړئ:
۱ـ څو ساعته کار کوی؟ ولې؟ رښتیا ووایئ
ایا ستاسې د کار او دندې سرته رسولو لپاره دا ضرور ده، چې ډېر وخت په کارځای کې تېر کړی؟ یا دا چې په کارځای کې د ډېر وخت تېرېدو لپاره کوم بل دلیل لری؟ ایا دا څه مو د رییس او همکارانو د توجو جلبولو لپاره دي او که څنګه؟ یا خو به داسې نه وي چې په ټاکلي کار وخت کې مو کار پوره سر ته نه شی رسولی؟
۲- د انرژۍ مصرف د وخت تر مصرف ډېر مهم دی
د خپلې انرژۍ کچه مو د ورځې او اونۍ لپاره وسنجوئ. یوه ورځ له کارځایه یو څه وختي لاړ شی، څو مو یو څه انرژي باقي پاتې شي. همدا اوس څه احساس کوی چې څومره انرژي لری؟ څنګه کولای شی د هغه د کمېدو مخه ونیسی او لا یې زیاته کړی؟
۳- هېچا ته چانس مه ورکوئ چې ستاسې وخت ضایع کړي
داسې کسان شته چې د خپلو هیلو لاسته راوړلو لپاره ستاسې وخت نیسي؟ ایا مجبور یاستی چې ځینې کارونه هره ورځ وکړی؟ یا داسې کوم بد عادت لری چې ستاسې ډېر وخت نیسي؟ همدا هره یوه کړنه مو ښه و ارزوئ او د پرېښودو لپاره یې یوڅه وکړئ. که مو داسې وکړل، هره ورځ به یوازې هغه کارونه وکړئ چې تاسې ته ارزښت او لومړیتوب لري.
۴- له یو همکار سره مو د دوستۍ اړیکه جوړه کړئ
د دې پر ځای چې هره ورځ مو د کاري مسایلو په اړه د ژوند د ملګري خبرې پر سر یوسی، ښه ده چې په اونۍ کې مو د ژوند سختو مسایلو په اړه له یو نږدې همکار سره خبرې وکړئ.
زما یو نږدې دوست له خپل یو همکار سره د کاري مسایلو په اړه هره ورځ نیم نیم ساعت خبرې کوي او په دې اړه د هغه لارښوونې عملي کوي. باور مو وشه، هغه اوس ډېر ښه ژوند لري. تاسې هم همداسې وکړئ، باور وکړئ دې چارې زما په ګډون د ډېرو نورو کسانو ژوند هم جوړ کړی دی.
هغه ملګری مو څوک دی چې تاسې پرې دا باور کولی شی؟
۵- له هغه وخته ښه ګټه واخلئ چې کار او دندې ته نه ځی
د خپلې رواني سلامتیا لپاره باید خپل کار د خپلې انرژۍ مطابق عیار کړئ. د خپلې انرژۍ د بېرته لاسته راوړلو لپاره باید په اونۍ کې هره ورځ نیم ساعت کار وکړئ. کله چې غواړی ځان ارام او خوشاله کړی، څه کوی؟ پياده مزل کوی؟ چکر ته ځی؟ د ملګرو کره مو ورځی او یا هم د خپلې خوښې رسټورانټ ته ځی؟
۶- دا هر وخت په یاد لری چې ژوند یوازې کار کول نه دي
دا ډېره ښه ده چې له خپل کار سره مینه ولری، خو داسې نه چې خپل هویت مو د کار له زاویې نورو ته تعریف کړی. خپل ځان ته وخت ورکړئ او وګورئ چې اصلي موخې مو کومې دي. په خپل شخصي ژوند کې مو د بریا او موفقیت په اړه فکر وکړئ. که داسې وکړی، هم به مو کار او هم به له کار ورهاخوا د ژوند نورې چارې هم منظمې کړی.
څومره مو چې وس کېږي، هومره ښه ژوند وکړئ، په ژوند کې مو وړې وړې بریاوې او د خوښۍ شېبې هم له لاسه مه ورکوئ، هره ورځ کوښښ وکړئ چې له همدې وړو بریاوو خوند واخلئ، که څه هم دا ډېر واړه څیزونه وي، لکه: د خپلې خوښې وړ کافي څښل، د خوښې وړ عطر استعمالول، پياده مزل کول، خپلو ماشومانو ته کتاب لوستل، له خپلې کورنۍ سره یو ځای ډوډۍ خوړل او یا هم یو بل کار. دا له تاسې سره مرسته کوي چې ارام او استراحته اوسی او خپله انرژي تر ډېره مهمو کارونو ته وسپموئ.
