دا تاسو یاست چې ټاکنه کوی! ژوند د انتخابونو او ټاکنو ټولګه ده او موږ چې په ژوند کې کومې کړنې تر سره کوو، په اصل کې زموږ له ټاکنو سرچینه اخلي. دا تاسو یاست چې ټاکنه کوی! غواړی ټوله ورځ د خوب په بستره کې پرېوځی او که غواړی را پورته شی، دندې ته مو لاړ شی او یا مو نور کارونه سرته ورسوی؟ موږ چې څه شی انتخابوو، په اصل کې زموږ د شخصیت ښکارندویي او استازيتوب کوي. هغه څه چې زموږ د شخصیت ښکارندویي کوي، هغه زموږ وړتیاوې نه دي، بلکې ټاکنې مو دي. که تاسو ناسمه پرېکړه کوی، هغه ده چې له ناوړه پېښې سره به مخ کېږی. د دې موضوع برعکس هم دغه ډول دی.
یوه کس دری مزدوران درلودل او د یوه سفر لپاره یې تیاری نیوه. دې کس خپل یوه مزدور ته پنځه چلونه یا وړتیاوې ور زده کړې، دویم ته یې دری چلونه ور زده کړل او درېیم ته یې یو چل ور زده کړ او په سفر یې واستول. لومړی مزدور چې یو څه ځیرک و، پر خپلې هرې وړتیا یې یوه بل وړتیا هم ور زیاته کړه او ټولې یې لس وړتیاوې شوې. دویم پر خپلو دریو وړتیاوو دری نورې وړتیاوې ور زیاتې کړې او د شپږو وړتیاوو درلودونکی شو، خو درېیم کس له خپل مشر څخه د وېرې له کبله هماغه یوه وړتیا او چل له ځان سره وساتل. دا کیسه همداسې دوام لري… خو زه چې څه غواړم، د دې کیسې په همدې لږې برخه کې سپړل شوي دي. هر مزدور خپله پرېکړه وکړه او پایله یې هم ولیده. نو که تاسو هم غواړی چې بریالي شی، همدا نن باید پرېکړه وکړئ.
ځینې وخت وېره د دې لامل کېږي، چې نور خلک زموږ په اړه او زموږ پر ځای پرېکړه وکړي. ژوند مو په تاسو پورې اړوند دی او د ژوند د موټر چلوونکي خپله تاسو یاست. هېڅوک حق نه لري چې ستاسو په اړه او ستاسو لپاره تصمیم ونیسي او پرېکړه وکړي. دوی یوازې هغه وخت دا کار کولای شي چې تاسو اجازه ورکړی. دغه راز که تاسو د نورو د غبرګونونو او قضاوتونو پر اساس پرېکړه وکړی، هغه وخت به مو هم سمه پرېکړه نه وي کړې. توپ ستاسو په واک او ستاسو په ځمکه کې دی. دا تاسو یاست چې پرېکړه کوی او خپله راتلونکې ټاکی چې باید څه ډول وي. که غواړی په علمي برخه کې بریالي وی، باید پرېکړه وکړئ چې پر ځینو شیانو سترګې پټې کړئ او مطالعه پیل کړی. تاسو تل په مخ کې دوې لارې لری، ژمنتیاوې او وېرې.
غواړی مشهور او شتمن شی؟ غواړی ټوله نړۍ مو په ښه نوم یاد کړي؟ غواړی په سوداګرۍ کې بریالي وی؟ غواړی د نړۍ ټول خلک ستاسو خبرې واوري؟ غواړی پر خپل معنوي ژوند کار او پانګونه وکړی؟
که هر څنګه وي، نو همدا نن یوه ښه پرېکړه وکړئ او لاس پکار شئ. زه د دې کار لپاره ستاسو په مخ کې دوې لارې وینم؛ سمه لار او ناسمه لار. دا تاسو یاست چې د ځان لپاره کومه یوه غوره کوی. زه هیله من یم چې په پوره انرژۍ ور باندې تمرکز وکړئ.
په ژوند کې دری کلمې ټاکنه، رېسک (خطر) او بدلون موجود دي، چې تاسو باید ور سره په اړیکه کې اوسئ. تاسو باید دا ومنئ چې رېسک منوونکي اوسی، که نه؛ پرته له خطر منلو مو په ژوند کې بدلون نه راځي. زه پر دې خبره پوره یقیني یم چې ژوند د هغو ټاکنو ټولګه ده چې تاسو یې کوی. تاسو چې څومره غوره او پر ځای ټاکنه کوی، په ډېر احتمال به مو ژوند هم غوره او له خوښیو ډک وي.
سټیوجابز وایي: «تر ټولو غوره او لویه وسیله چې د خپل ژوند د ښه کولو لپاره مې ترې ګټه اخیستې ده، هغه دا جمله ده چې ډېر ژر به مړ شم؛ ځکه ټولې هیلې، ویاړونه، له ماتې څخه وېره یا شرمېدل او دې ته ورته نور موارد؛ هغه وخت له منځه ځي چې له مرګ سره مخ شی. یوازې له هغه څه سره ژوند وکړئ چې ارزښتمن وي».
زه داسې کسان پېژنم چې ناست دي او ټوله ورځ له خپل بد اقتصادي وضعیت څخه سر ټکوي، خو له دې وضعیت څخه د راوتلو لپاره لاس پکار کېږي نه. دوی د اوسني وضعیت له کبله خپل مور او پلار ګرم ګڼي چې ګواکې ولې پر خپل وخت لاس پکار شوي نه دي او د دوی لپاره یې شتمني او جایدادونه په میراث نه دي پرې اېښي. ایا تاسو هم غواړی په همدې موقعیت او حالت کې پاتې شی او لاس تر زنې کېنی؟ انتخاب وکړئ او پرېکړه وکړئ، غواړی څه ډول ژوند وکړی؟ د نورو خلکو په څېر مه اوسئ، چې ژوند هر څه ور باندې راولي، دوی یې مني او مخه یې نه نیسي. هر څه خپله کنټرول کړئ او د راتلونکې په اړه ښه پرېکړه وکړئ.
ژوند دوې اصلي ټاکنې یا انتخابونه لري: د اوسنیو حالاتو او شرایطو منل او یا هم د همدې شرایطو له بدلون وروسته د عواقبو او پایلو منل. په ژوند کې ځینې ټاکنې د وخت محدودیت لري. دا سمه ده چې پرېکړه باید په خورا دقت سره وشي، خو که ډېر ځنډ پکې راشي، کېدای شي فرصت مو له لاسه ووځي. ځینې وخت شکونه او تردیدونه د دې لامل کېږي، چې موږ له هغو پرېکړو منع کړي، چې زموږ په ژوند کې د مثبت بدلون لامل کېږي. زما مطلب دا دی چې په دقت پرېکړه وکړئ، خو پام مو وي چې فرصت له لاسه ورنه کړئ.
موږ ټول په ټاکنه کې خپلواک یو. موږ خپلواک یو چې د طبعیت له قانون سره همغږي کوو او که سرغړونه ترې کوو. دا ستاسو ټاکنه ده چې د هر څه پایلې تعریفولای شي. تر اوسه هېڅوک نه دي توانېدلي او نه هم توانېدلای شي، چې د خپلو ټاکنو له پایلو تېښته وکړي. که زموږ د ژوند شرایط یا زموږ د ټاکنو پایله هر ډول وي، د وخت په تېرېدو ور سره روږدي کېږو. دغه څه د مرګ تر ورځې پورې دوام کوي او په پایله کې ویلای شو چې د ټاکنې مسوولیت مو پر خپله غاړه دی.
