په چين کې د نوي کال د شپې هنري ننداره

نوی کال، يانې د طبيعت تازه کېدنه، غوړېدنه او نوې ساه اخيستنه، له تېر کال سره خدای پاماني او د نوي کال د هرکلي په مانا ده. د نمانځنې دودونه يې په بېلابېلو سيمو او هيوادونو کې د وګړو تر منځ د يو منل شوي کلتور او دود په توګه شتون لري.

له ډېرو پخوا زمانو راهيسې خلکو د دې لپاره چې د خپلو چارو په تېره بيا د کرکيلې او کښتونو لپاره ښه تنظيم او ترتيب ولري، په يو اغېزمن چوکاټ او مهالوېش کې يې راونغاړي او تر سره یې کړي، د جنتري(کالیزه) اړتيا د پوره کولو او موندلو په لټه کې وو، له نېکمرغه دا اړتيا په چين کې خلکو ډېره مخکې درک او پوره کړې وه. څرنګه چې معلومه ده چين يو لرغونی زراعتي هيواد دی او په نړۍ کې په کرنيزو چارو کې مخکښ او د اوږدې مخينې درلودونکی پاتې شوی دی، تر ډېره يې ځانګړې کرنيزه کاليزه هم د خپلې بزګرۍ چارو پر بنسټ ټاکلې او جوړه کړې ده.

چينايانو په خپل کرنيز کاليز کې له اوږدو مودو او زمانو راهيسې ځينې ځانګړې دوديزې ورځې ټاکلې او معلومې کړې دي، له دې ډلې يو د چين نوی کال دی. زه دلته يوازې د نوي کال او د نوي کال د شپې هنري نندارې په اړه خبرې کوم.

څرنګه چې نوی کال او نمانځنه يې په چينايي ټولنه کې له ستر کلتوري ارزښت څخه برخمنه ده او په مناسبت يې بېلابېل فعاليتونه جوړېږي، په همدې سلسله کې نن سبا د بیجېنګ ښار په بڼه کې له همدې امله بدلون تر ډېره د هر چا پاملرنه جلبوي. اه رښتيا، نه يوازې د بیجېنګ بڼه، بلکې په چين کې د ټولو ښارونو، کليو او بانډو په څېرو کې له ورايه څرګند بدلون ليدل کيږي. سړکونه، لارې، کوڅې، ودانۍ او د کورونو په دروازو قنديلونه، څراغونه او ملي بيرغونه او د نوي کال په اړه د خلکو د علاقې اندازې دا ښکارندويي او څرګندونه کوي. د چين سږنی دوديز کال د موږک له کال سره برابر دی او موږک په چيني ټولنه کې د ځيرکۍ، هوښيارۍ، چالاکۍ، تېزبينۍ په مانا او سمبول ګڼل کيږي.

د چينايانو نوی دوديز کال، نوروز يا په بله اصطلاح پسرلنی اختر، په چين کې تر ټولو مهم، لوی او د ستر کلتوري ارزښت درلودونکی دی. دا په نړۍ کې يو له فوق العاده او سترو اخترونو حسابيږي.

هغه چې وايي، ژوندي ملتونه تل د ژونديو دودونو او کلتورونو درلودونکي وي، درنښت يې کوي، پالنه يې کوي او په خوند، شوق او ذوق يې نمانځي. له دې ډلې يو چيني ملت دی، له دوديزو ورځو او جشنونو يې يو د نوي کال ورځ او اختر دی، د نمانځنې په اړه يې له وړاندې چمتووالی نيسي، رارسېدو ته يې شېبې شماري او د نوي کال د نمانځنې د فعاليتونو په لړ کې د نوي کال د شپې هنري ننداره يې بيا تر ټولو ستره او د يادونې وړ ده.

د چين د دوديزې جنترۍ له مخې، د هر کال د وروستۍ ورځې په شپه د دې هنري نندارې تر سره کېدنه او جوړېدنه اساسي برخه ده. د نوي کال د شپې هنري نندارې نوښت په ۱۹۷۹ ز کال کې د چين د مرکزي راډيو- ټلوېزيون له خوا وشو او ډېر ژر دا هنري ننداره د نوي کال د شپې نه جلاکېدونکې برخه وګرځېدله او په دې ترتيب له ۱۹۸۳ ز کال څخه دا ننداره په پرله پسې توګه له ۳۷ کلونو راهيسې دوام لري او د هر نوي کال په شپه تر سره کيږي.

په دې ننداره کې د لوبغاړو  شمېر سلګونو ته رسيږي، د يوې سترې پياوړې هنري ډلې له خوا يې هر حرکت په ځير تر سره کيږي، نږدې شپږ مياشتې وړاندې يې د لوبغاړو روزنيزې او تمريناتي چارې پيل کيږي او د بېلابېلو ازمايښتي پړاوونو په ترڅ کې په دقت سره بشپړېږي او تر وروستي پړاوه  رسيږي.

د نوي کال د شپې سږنۍ هنري ننداره يوه بشپړه او جالبه ننداره وه، هغسې چې پر سټېج، صحنې او لوبغاړو باندې يې ډېر کار شوی و، ساز او موسيقي، سندرې او نڅاوې، اوپراوې، ټوکې ټکالې، د ټولنې تودې مسئلې، د وګړو مهمې اساسي اړتياوې، د وګړو له ژوند سره تړلې کيسې، داستانونه، د ټولنې حقيقتونه، ښېګڼې، ښکلاګانې، د يوې سوکاله شتمنې ټولنې جوړولو د هدف پوره کول او داسې نورو مهمو برخو ته پکې ځای ورکړل شوی و. همدارنګه ځينې هغه ناوړه، ناسمې ځوروونکې پديدې، بدګڼې، فساد، کاغذپراني، فريب، جعل او داسې نور يې په لوړ مهارت سره وغندل او ورټل.

د سږنۍ هنري نندارې بله مهمه ځانګړتيا دا وه، هغسې چې د هر اړخ او نظر له پلوه غني او بشپړه وه، ويې کولای شوی چې د چيني ملت سعادتمندي، نېکمرغي او په اوسني عصر کې د ورخلاصون په مټ د لا پرمختياوو په لوري د سترو هڅو تصوير وړاندې کړي.

دا هنري ننداره لکه څومره چې د خپلو پراخو نندارو او لوبغاړو له پلوه بې مثاله او بې سياله ده، همداسې د مينه‌والو او ليدونکو د شمېر له پلوه هم نوموتې ده. له همدې امله د نړيوالو ريکارډونو په کتاب «ګېنز» کې ثبت ده. اصلي ستره ننداره يې په بیجېنګ کې وه او نورې کوچنۍ نندارې يې په یو وخت کې په جنګ جو، ګوانګ دونګ، هانکانګ او مکاو کې تر سره شولې.

سږنۍ هنري ننداره د چين ميډيا ګروپ له خوا جوړه او تر سره شوله، پراخو ټولشموله غني محتواياتو ته پکې ځای ورکړل شوی و او د دې تر څنګ، مسلکي کاري ډله يې د نويو پياوړو تخنيکونو او ټکنالوژۍ ونډه هم پکې تر ډېره مهمه او د پام وړ وه. د لومړي ځل لپاره تصوير جوړولو او وړاندې کولو کې د 8K+5G ځيرکو کامرو کارونه تر سره شوه. د ننه په چين او بيرون کې د ډېرو ټلوېزيوني شبکو پر پردو باندې وښودل شوله. په ۱۷۰ هيوادونو کې نږدې ۵۰۰ رسنيو پوښښ کړې وه.

دا هنري ننداره ټوله څلور ساعته وه، د چين په وخت د ماسختن په اتو بجو د چينا ميډيا ګروپ د چين مرکزي ټلوېزيون په تالار کې پيل او د شپې په دوولسو بجو او د نېټې په بدلون او د نوي کال د زنګ په کړنګېدو، تر يوې بجې يې دوام وکړ.

په پام کې وه چې د دې هنري نندارې ځينې مهمې، جالبې په زړه پورې صحنې او برخې راټولې د دوستو هيوادونو د اړوندو ټلوېزيوني چينلونو او د لويو سينماګانو پر پردو باندې وښودل شي.