په ممبیي کې ژوند کول د «سیمي» یوه هیله وه. د همدې لپاره کله یې چې په یوه کوچني ښار کې خپلې لوړې زده کړې پای ته ورسولې، د یوه نوي ژوند د پیلولو لپاره ممبیي ته مهاجره شوه. هغې د دې ښار په اړه مخکې له مخکې ډېر څه اورېدلي وو او څېړنه یې کړې وه. بې صبره دې ته په تمه وه چې څه وخت به دغه ځای ته ورځي، خو په ممبیي کې ژوند کول هغسې نه وو لکه سیمي یې چې په اړه فکر کړی و. دلته هر څه مخ پر ځوړ روان وو او مخابراتي کمپنیو هم نوي کسان پر دندو نه ګومارل. هغه ډېر وخت له یوې کمپنۍ څخه بلې او له بلې څخه بلې ته ولاړه، په دنده پسې سرګردانه وه، خو ونه توانېده چې دنده پیدا کړي. لنډه دا چې چانس ورسره یاري نه کوله او هر ځای به چې ولاړه، مخه به یې بنده شوه. هغه وو چې نوره ستونزو او د ژوند بدو حالاتو ته تسلیمېده. یوه ورځ یې له یوه کس سره وپېژندل او هغه د مرستې ژمنه ور سره وکړه. کومه دنده یې چې ورته په نظر کې نیولې وه، ښه معاش یې درلود، خو هغه کس هم ترې یو څه تمه درلوده. یوه ورځ یې له سیمي سره اړیکه ونیوه او ترې ویې غوښتل چې ژر شرکت ته ورشي. سیمي بله چاره نه درلوده، دندې ته یې بیخي ډېره اړتیا وه، نو اړ شوه چې شرکت ته ورشي. کله چې شرکت ته ورسېده، نو په شرکت کې پرته له هغه کس څخه بل څوک نه وو. کس ورته ځینې کاغذونه وړاندې کړل چې امضا پرې وکړي او دنده یې پیل کړي، خو تر څنګ یې ورته وویل چې ته هم باید له ما سره یو څه مرسته وکړې. سیمي وویل، سمه ده ته چې هر څه غواړې زه یې کوم. مخامخ ناست کس ورته وویل، که غواړې چې د یوې ښې تنخوا لرونکې دندې څښتنه شې، نو ته باید له ماسره هم بستره شې.
دې خبرې سیمي ته ټکان ورکړ، سخته په غوسه او ناهیلې شوه، په ځای کې یې ودرېده، ناست کس ته یې یوه کلکه څپېړه په مخ ورکړه او په ژړا له شرکت څخه ووته. یو څه وخت نه و تېر شوی چې دنده یې پیدا کړه، په دنده کې یې ترفیع وکړه او د هغه پخوانۍ وړاندیز شوې تنخوا پنځه برابره تنخوا يې اخیسته. که سیمي د هغه کس غوښتنه منلې وای او د یوه ناوړه کار په بدل کې د دندې څښتنه شوې وای، څه به پېښ شوي وو؟ غرور او پاک لمني یې له لاسه ورکوله. شرافت ستاسو د ژوند برخه ده، په هره بیه چې وي باید له هغه څخه دفاع وکړئ او ساتنه یې وکړئ. تاسو باید رښتیني، سرلوړي، منظم، شرافتمند، بااېمانه او پاک لمني اوسئ. دا هغه موارد دي چې ستاسو شخصیت او اصالت جوړوي. د ژوند تر ټولو سختې شېبې هغه دي چې موږ خپل شرف له لاسه ورکړو او معامله پرې وکړو. دا په رښتیا هم هغه ځای دی چې موږ پکې ماتې خورو. راځئ یوه بله کیسه هم درته وکړم: «بولا» تازه په یوه ودانیز شرکت کې د موټر چلوونکي په توګه دنده اخیستې وه. ده باید هره اونۍ د شرکت د جنراتور لپاره ۵۰ لېټره تېل اخیستی. دغه ۵۰ لېټره تېلو پوره ۳۰ ساعته کار ورکاوه، خو کله چې بولا په یاد شرکت کې کار پیل کړی او دغه دنده ور وسپارل شوه، په ۵۰ لېټره د ماشین د چلېدو وخت ۲۳ ساعتونو ته راښکته شوی و. پنځه اونۍ دغه پېښه تکرارېدله او بالاخره د شرکت د مدیر حوصله تنګه شوه. له بولا څخه یې پوښتنه وکړه، ایا له هغو پیسو څخه چې شرکت یې درکوي، کوم شی ځان ته هم ګرځوي که نه؟ بولا ځواب ورکړ، نه! له څېړنو وروسته ثابته شوه چې بولا هره اونۍ د ۵۰ لېټره پر ځای ۳۹ لېټره تېل د شرکت جنراتور ته اخیستل او پاتې پیسې به یې په خپل جېب کې اچولې. دغه څه د شرکت لپاره بیخي د منلو نه وو او بالاخره بولا د خپل دې کار له کبله زنداني شو. هغه نه یوازې خپله دنده، بلکې شرافت یې هم له لاسه ورکړ. د دې لپاره چې رښتینی خدمت مو کړی وي، داسې کار وکړئ چې هغه نه په پیسو واخیستل او نه هم محاسبه شي او دغه څه له شرافت او صداقت پرته بل څه نه دي. که پر حالت او هر ډول شرایطو کې وی، هڅه وکړئ چې صادق واوسئ. صداقت مو د نابودۍ لامل نه، بلکې د ازادۍ او سرلوړۍ لامل کېږي. دندې ته مو ژمن اوسئ او داسې یې تر سره کړئ، چې رییس، مدیر، همکاران او ټول مو ستاینه وکړي. داسې کار مه کوئ چې خلک در څخه نفرت وکړي. داسې ژوند وکړئ چې خلک په هر حالت له تاسو سره ملګرتیا وکړي او په ملګرتیا مو وویاړي.
که سوداګریزې چارې مخ ته وړی، نو پر پېرودونکي مو تقلبي شی مه پلورئ؛ په مشتریانو مو باکیفیته شی وپلورئ، داسې چې هم در څخه ښه خاطره ولري او هم بیا بیا درته راشي او جنس در څخه وپېري. صداقت او شرافت د یوه سوداګر تر ټولو ښه پانګه ده. د یوه رهبر په توګه نور له تاسو څخه الګو اخلي، نو پام مو وي چې هغوی در څخه ګمراه او لار ورکي نه شي. د یوه رهبر لپاره تر ټولو اړینه خبره شرافت دی. له شرافت پرته بریا ناشونې ده. مهمه نه ده چې تاسو د څه ډول ډلې رهبر یاست، خو داسې یو رهبر باید نه وی چې د پیسو لپاره خپل شرافت خرڅ کړی. تاسو به ځینې رهبران لیدلي وي چې د ټاکنیزو کمپاینونو پر وخت خپلو پلویانو ته ډېرې غوړې وعدې ورکوي، خو همدا چې پر څوکۍ کېناست، بیا خلک او خپلې وعدې له یاده باسي. خلکو ته وایي چې له فساد سره به مبارزه کوي، خو بیا خپله په فساد کې ښکېلېږي.
باب مارلي وایي: «لویي په شتمنۍ کې نه، بلکې په شرافت کې ده.» تاسو باید داسې کارونه وکړئ چې ستاسو د شرافت څرګندونه وکړي. دغه مشهوره خبره به مو اورېدلې وي چې وایي:«که ور سره جنګېدلای نه شی، بیا ور سره مله شئ، خو زه نن تاسو ته وایم چې هېڅکله د دو روپیو لپاره خپل شرف مه خرڅوئ او د یو چا د خوښۍ لپاره خپل عزت او شرف مه پلورئ او ځان مه بدلوئ. هڅه وکړئ چې خپله اوسئ، که یوازې وی او که د خلکو په منځ کې، ځان مه بدلوئ، ځکه اصیل انسان هر وخت خپل ارزښت او شرف ساتي. د نه ویلو زړه باید ولرئ. د رښتیا ویلو او رښتیا منلو شجاعت باید در سره وي. هڅه وکړئ تل ښه کار د دې لپاره چې ښه کار دی، تر سره کړئ. دا د یوه شرافتمند ژوند اصل دی. د «استون» دغه کلمې مو باید په یاد وي: «هېڅکله په ازموینه کې درغلي مه کوئ، په سوداګرۍ کې د خلکوسترګو ته خاورې مه ور شیندئ، په انساني اړیکو کې خیانت مه کوئ، په ورزش کې خیانت مه کوئ او لطفاً په ژوند کې هم خیانت مه کوئ. تل شرافتمند اوسئ.»
