مهرباني یو له هغو مسایلو ده چې په ټولو مذهبونو کې پرې ټینګار شوی او ارزښت ورکړل شوی دی. خو له دې سره سره، د ټولنې ډېر کم وګړي دې خبرې ته د عمل جامه ور اغوندي. کېدای شي دوی په دې اند وي چې که پر خلکو مهربانه اوسي، کوم څه به له لاسه ورکړي… خو زه په دې اند یم چې په مهربانه اوسېدلو تاسو هېڅ شی هم له لاسه نه ورکوی. هېڅوک د یوه شي د ورکړې او مهربانۍ له کبله نه دي فقیر شوي.
مهرباني یانې په حاصل ورکوونکې ځمکه کې د ګټورو زړو کرل، چې د وخت په تېرېدو سره حاصل او مېوه ورکوي. مهرباني باید د زړه په خوښه او ستاسو د شخصیت یوه برخه وي. مهربانۍ ته باید تاسو له داسې یوې زاویې وګورئ چې په بدل کې یې تاسو د یوه فقیر انسان دعا تر لاسه کوی. ما د ځینو مخکښو کسانو ژوند مطالعه کړی دی. دا چې دوی ټول وخت تر نورو مخکښ دي او د خلکو په زړه او ژبه دي، اصلي لامل یې دا دی چې دوی پر خلکو مهربانه دي او تر خپلې وسې یې ور سره مرسته کړې ده. د بېلګې په توګه، بېل ګټس چې د مایکرو سافټ شرکت مشر او د نړۍ لومړنی شتمن انسان دی. دی او مېرمن یې د ملیندا ګېټس په نوم یوه خیریه موسسه لري. دغه موسسه په ۲۰۰۰ ز کال کې تاسیس شوه او ویل کېږي چې د نړۍ په کچه لومړنۍ، لویه او قوي خیریه موسسه ده. د دې موسسې اصلي موخه د فقر او ناروغیو له منځه وړل او تر خپلې وسې له اړمنو خلکو سره مرسته کول دي. له دې سره سره چې کله بېل ګټس د ۲۰۱۳ ز کال د مې میاشتې په ۱۶مه ۲۸ میلیارده ډالر دې خیریه موسسې ته وقف کړل، اوس هم د نړۍ میلیاردر یادېږي.
پریسلاچان او خاوند یې مارک زاک ربرګ چې د فېسبوک ټولنیزې شبکې مشر او بنسټګر هم دی؛ دوی په ۲۰۱۵ ز کال کې پرېکړه وکړه چې ۱،۶ میلیارده ډالر د خیریه کارونو لپاره ولګوي. خو له دې سره سره مارک زاګر برګ هم د نړۍ د میلیادرانو په لېست کې دی.
الیکا دانګوټ د Dangote Groups شرکت لوی مدیر؛ هغه د افریقا یو شتمن کس دی. نوموړي د Dangote په نوم یوه خیریه موسسه جوړه کړه. دې موسسې په تېرو څلورو کلونو کې په افریقا او نایجیریا کې د ۲۵ میلیونو ډالرو په ارزښت مرستې له بې وزلو، اړمنو او مصیبت ځپلو کسانو سره کړې دي. دغه موسسه په څلورو برخو لکه روغتیا، اقتصادي پراختیا، زده کړو او له اړمنو کسانو سره د مرستې په برخه کې کار کوي. یاد ټول کسان له اړمنو او بې وزلو کسانو سره د خپلې شتمنۍ په بښلو سره مرسته کوي، خو نه یوازې دا چې د دوی په شتمنۍ کې کموالی نه دی راغلی، بلکې ثانیه په ثانیه، دقیقه په دقیقه او ورځ تر بلې د دوی شتمني لا زیاتېږي.
ښه نو، که تاسو هم زما په څېر یو میلیونر نه یاست، څنګه کولای شی له نورو سره مرسته وکړی؟
تاسو کولای شی د خیر او ښېګڼې په کارونو کې د خپل وس مطابق مرسته وکړی، له بې سرپرسته کسانو سره مرسته وکړی، په داوطلبانه کارونو کې برخه واخلی، مصیبت ځپلو کسانو ته له نورو خلکو مرستې را ټولې کړی، له یوه سپین ږیري کس سره مرسته وکړی، د ګڼې ګوڼې له ځای او یا له سړک یې تېر کړی. د ښوونځي له هغو ماشومانو سره مرسته وکړی چې له سړک نه شي اوښتی. بنده په خپل وس نیولی. ډېرې زیاتې لارې شته چې تاسو کولای شی خلکو ته خیر ورسوی. یوازې دومره پکار ده چې خپلې شاوخوا ته وګورئ او فکر وکړئ چې خلک څه شي ته اړتیا لري او ستاسو په وس څه پوره دي.
مهرباني یوازې په پیسو پورې محدوده نه ده. خلکو ته د خدمت، جنس لکه جامې، بوټ، وخت چې لرو یې، موسکا چې کوو یې، په غېږ کې نیول، لارښوونه کول او هر هغه کار چې یو څوک ورته اړتیا لري او زموږ په وس پوره وي، مهرباني او صدقه بلل کېږي. دغه څه یوازې تر پیسو پورې مه محدودوئ. یوازې پیسې کفایت نه کوي. هر څوک کولای شي شتمن شي. خلک ستاسو یوه مهربانه زړه ته اړتیا لري. نو چې داسې ده، هر ځای ته چې تلی، مینه وکرئ او خلکو ته خپله مینه ډالۍ کړئ.
