د ننګرهار په غنيخېلو ولسوالۍ کې په یوه موټربم برید کې شاوخوا شل کسان وژل شوي او تر پنځوسو ډېر ټپیان دي. په وژل شوو او ټپیانو کې د ماشومانو او ښځو په ګډون لویه برخه یې ملکيان دي. دا برید د خلکو له توند غبرګون سره مخ شوی او د انسانیت او اسلامیت خلاف عمل یې بللی دی. ارګ وايي، طالبانو او نورو ترهګرو لاس یو کړی او دا ډول بریدونه کوي، خو نه طالبانو او نه هم کومې بلې ډلې تر پرون ناوخته پورې د دغه برید پړه منلې وه.
دا برید په رښتیا هم یو وحشیانه برید و، چې پکې لویه برخه قربانیان ملکي وګړي وو. پرون پر ټولنیزو رسنیو د وژل شوو او ټپي ماشومانو تصویرونه خپرېدل چې په لیدو یې د هر انسان زړه څړیکه کوله او پر قاتلینو یې لعنت وایه. دا ډول بریدونه چې هر څوک کوي او د هرې موخې لپاره یې کوي، د توجیه وړ نه دي او دا وحشي، شیطاني او ظالمانه کړنه ده.
دا چې برید چا کړی، لا هم معلومه نه ده، خو په داسې حال کې چې د سولې خبرې روانې دي، دا برید د دې خبرو خلاف کار دی او په واضېح ډول د سولې د خبرو د تخریب هڅه ده. دا برید چې هر چا کړی، له شک پرته چې یوه موخه به یې همدا وي چې د سولې روانې خبرې تخریب کړي او یو ځل بیا افغانستان د جګړې شدت ته ور ټېل وهي. دا چې د برید موخه د سولې د خبرو تخریب دی، نو ځکه په غبرګون کې هم باید دې چارې ته پام وشي. دغه برید ته د ښکېلو اړخونو غبرګون باید د دې پر ځای چې د سولې د تخریب لامل شي، برعکس د سولې د پروسې له بریا او پرمختګ سره باید مرسته وکړي. که طالبانو د دغه برید پړه اخیستې وی، نو بیا باید د هر لوري غبرګون توند او تېز وی او پر طالبانو باید له دې امله سخت فشارونه راغلي وی، خو دا چې طالبانو د یاد برید پړه نه ده اخیستې او نه هم کوم څه شته چې ثابته کړي، دا برید طالبانو کړی، نو پر دوی یې پړه اچول، د سولې له تخریب سره مرسته کوي او دا همغه څه دي چې د دغه برید پلانوونکو غوښتې دي. له بده مرغه د ارګ غبرګون همداسې دی؛ پرته له دې چې طالبان د برید پړه واخلي او یا کوم ثبوت وي چې دا برید طالبانو کړی، دوی طالبان مسوول وګڼل. پر یو بل پړه اچول یا تورنول نه یوازې دا چې په جګړه او سوله کې کومه مثبته ګټه نه کوي، بلکې د جګړې د زیاتوالي او د سولې په برخه کې د خنډ سبب ګرځي.
دواړه لوري باید درک کړي چې د سولې دښمنان شته او په شدت سره تخریب کوي؛ له همدې امله دوی نه یوازې دا چې د سولې په برخه کې باید چټک کار وکړي او انعطاف وښيي، بلکې اوس هم باید هڅې وکړي چې د دغه ډول بریدونو مخنیوی وشي. دا اوس د حکومت او طالبانو دواړو دنده ده چې د هغو کړنو او بریدونو مخه ونیسي چې د سولې د تخریب سبب ګرځي. د دې تر څنګ دواړه اړخونه باید د پرونيو شهیدو او ټپي ماشومانو وینو ته وګوري او د سولې په برخه کې رښتینې هلې ځلې وکړي، څو دغه ډول وحشتونه یو مخ ورک شي.
