محمد اشرف غني د یوه حکومتي پلاوي په مشرۍ دوحې ته تللی دی. ویل کېږي چې دا سفر د قطر د امیر په رسمي بلنه شوی، چې پکې د نورو لیدنو کتنو ترڅنګ دوه مهم مجلسونه کېږي. د افغان سولې لپاره د امریکا له ځانګړي استازي زلمي خلیلزاد او په افغانستان کې د ناټو او امریکايي ځواکونو له عمومي قوماندان سکاټ مېلر سره لیدنه او د دې تر څنګ د قطر له امیر سره لیدنه د دغه سفر اصلي برخه جوړوي.
اوس پوښتنه دا ده چې د دغه سفر اصلي موخه څه ده او په دغو دوو مهمو مجلسونو کې به څه وشي؟
اشرف غني په یوه مهم وخت کې دوحې ته ورځي، ځکه له یوه اړخه د سولې خبرې له خنډ او ځنډ سره مخ دي او له بله اړخه امریکا هڅه کوي چې دا خنډ او ځنډ له منځه یوسي. له دې سفر سره هممهاله د ناروې، جرمني، ازبکستان او اندونیزیا استازي هم په دوحه کې دي او هڅه کوي چې دواړه اړخونه د سولې په برخه کې د رامنځ ته شوو خنډونو حل ته وهڅوي او تر ممکنه بریده پرې فشار راوړي. سفر له دې امله هم مهم دی چې خلیلزاد په دوحه کې دی او په افغانستان کې د ناټو او امریکایي ځواکونو عمومي قوماندان هم دوحې ته ورغلی دی. ښکاري چې په دوحه کې به ولسمشر غني ته یو واضح پیغام ورکړل شي.
زلمی خلیلزاد او سکاټ مېلر به اشرف غني ته د امریکا له اړخه یو مهم پیغام ورکړي او ورته واضح به کړي چې امریکا په افغانستان کې د جګړې دوام نه غواړي او نور یې په جګړه کې د طالبانو پرضد ملاتړ نه شي کولی. ښايي دا هم ورته وویل شي چې سوله امریکايي غوښتنه او پروسه ده او د دې پروسې پر وړاندې درېدل د امریکا پر وړاندې د درېدلو مانا لري. البته هغه څه چې د دې لیدنو په اړه رسمي چارواکي وايي او یا هم رسنیو ته پرې خبرونه راځي، تر هغه ډېرې متفاوت دي چې دواړو اړخونو پرې خبرې او بحث کړی دی.
د قطر امیر به هم هڅه وکړي چې اشرف غني سولې ته وهڅوي او ورته وبه وايي چې له شرطونو، سرو کرښو او خنډونو تېر شي او ټول هغه څه ومني چې د سولې پروسه ورته اړتیا لري. په دې کې به د موقت حکومت او جمهوریت په ګډون ټول هغه مهم څه راځي چې اشرف غني یې سرې کرښې ګڼي. د قطر امیر به یوازې هڅونه نه کوي، بلکې د سولې په مسئله کې د امریکا د جدیت تر څنګ به ورته د امریکا د زور او فشار پیغام هم په نامستقیم ډول ورسوي.
د دغو دواړو مهمو لیدونو په اړه به رسنیو ته ډېر څه را نه شي او نه به هم ژر لوی محسوس بدلون راشي، خو د امریکا پیغام به جدي وي او له لږ ځنډ وروسته به یې محسوسې پایلې ولیدل شي. اشرف غني او ملګري به یې اړ شي چې ډېرې غوښتنې ومني، له سرو کرښو به تېر شي او د موقت حکومت به ګډون به ټولو هغو چارو ته غاړه کېږدي چې د سولې په پروسه کې ورته اړتیا ده.
