په تېرو پنځو کلونو کې ټولو چينايانو د هېواد له پرمختګ څخه ګټې واخيستې او په راتلونکو پنځو کلونو کې به د چين حکومت څه نوی پلان جوړ کړي؟
د تېر پنځه کلن پلان لاسته راوړنې
د چين کمونېست ګوند د نولسمې دورې مرکزي کمېټې پنځمه عمومي غونډه اوس په بېجينګ کې روانه ده چې څه باندې ۳۰۰ تنه غړي پکې ګډون کوي. دغه غونډه د چين د واکمن ګوند يوه مهمه غونډه ده چې پکې به له ۲۰۲۱م کال څخه تر ۲۰۲۵م کال پورې په راتلونکو پنځو کلونو کې د چين د پرمختګ پلان ( يعنې د چين د څوارلسم پنځه کلن پلان) او تر ۲۰۳۵م کال پورې د چين د اوږدمهاله پرمختيايي هدف ټاکلو په اړه وړانديزونه وشي.
په نړۍ کې د دوهم لوی اقتصاد په توګه د چين پرمختګ د ټولې نړۍ پاملرنې راجلبوي، نو په راتلونکې کې به د چين د پرمختګ پلان د افغانستان په شمول ټولې نړۍ ته څه فرصتونه برابر کړي؟ په دې ليکنه کې يادې پوښتنې ته ځواب پيدا کېږي.
لومړی، موږ بايد په تېرو پنځو کلونو کې يعنې د چين د ديارلسم پنځه کلن پلان په موده کې د چينايانو په ژوند کې پرمختګونو ته کتنه وکړو.
په تېرو پنځو کلونو کې د چين حکومت د بې وزلۍ د له منځه وړلو لپاره ډول ډول تدبيرونه نيولي دي. د دغه پلان له مخې، په چين کې ۳۵ زره نوي استوګنيز ښارګوټي او ۲ ميليونه ۶ لکه او ۶۰ زره نوي کورونه جوړ شوي دي چې پکې څه باندې ۹ ميليونه او ۶ لکه بې وزله کسان نويو کورونو ته انتقال شوي او د دغه پلان موخه پوره شوې ده. په تېرو پنځو کلونو کې په ښارونو او علاقه داريو کې د کاري فرصتونو زياتوالی ۶۰ ميليونو ته رسېدلی، تر ۲۰۱۹م کال پورې د چينايانو منځنی عمر ۷۷.۳ کلونو ته رسېدلی او څه باندې ۹۵٪ کسان د طبي بيمو په سيستم کې شامل شوي دي.
د چين له شمال لوېديځې برخې زما د سترګو ليدلی حال
ما د روانې مياشتې له ۱۵مې نېټې څخه تر ۱۴مې نېټې پورې د چين په شمال لوېديځه برخه کې د چينګهای او ګان سو له ولايتونو څخه ليدنه وکړه. ۵۳ کلنه مېرمن جانګجوماشجي چې د چينګهای ولايت د هوجو د تو قوم د کورواکې ولسوالۍ په بان يان کلي کې اصلي اوسېدونکې ده، په ۲۰۱۶م کال کې د ځايي حکومت تر مرستې لاندې له پخواني کور څخه نوي کور ته انتقال شوې. کورنۍ يې پخوا د سخت طبيعي چاپيريال له امله ډېره بې وزله وه او د ترافيک، څښاک اوبو، طب او تعليم اسانتياوې نه درلودې او ژوند يې له ستونزو ډک و. خو اوس په نوي کلي کې لوی او ښکلی کور لري، د ياد کلي خلک له نل اوبو او طبيعي ګازو څخه استفاده کوي. ځايي اوسيدونکي د حکومت تر مرستې لاندې د سيلانيزو چارو له پرمختګ څخه ګټې اخلي. بر سېره پردې، د مېرمن جانګجوماشجي په شمول لوړ عمر لرونکې مېرمنې د حکومت د روزنيزو خدماتو په رڼا کې د انلاين شرکت په مرسته د خامک دوزۍ په برخه کې انلاين ډول د مشتريانو سپارښتنې منلی شي او په خپل کور کې توليد شوي خامک دوزۍ په انلاين دوکانونو کې پلوري. دوی له دې لارې هره مياشت کابو زر يوانه تر لاسه کوي چې له بې وزلۍ څخه د خپل کور په وتلو کې مرسته ورسره کوي.
د ګان سو ولايت د دونګ شيانګ قوم کورواکې ولسوالۍ د مسلکي مهارتونو په روزنيز مرکز کې مې وکتل چې ځايي بې وزله او بې روزګاره کسان په وړيا توګه د لاسي صنايعو، سينګارولو، د ډوډۍ د پخولو او د سکواټر د چلولو په شمول ډول ډول مسلکي روزنې تر لاسه کوي او تر روزنې وروسته مناسب کار پيدا کولای شي. ۲۱ کلنه نجلۍ هان لينګ لينګ د ۴ مياشتو لپاره د سکواټر چلولو تر روزنې وروسته اړوند سند تر لاسه کړی او په دغې ولسوالۍ کې يې مناسب کار پيدا کړ چې هره مياشت څه باندې ۶۰۰۰ يوانه ګټې اخيستلی شي.
د دغو عامو وګړيو له کيسو څخه څرګندېږي چې د چين د حکومت بېلا بېلې ادارې د نويو چارو د پرمختګ، د کاري فرصتونو برابرېدو، د استوګنځايونو د ادارې او د کورونو د ابادولو له لارې له بې وزلۍ څخه د خلکو د وتلو لپاره مرستې کړې دي او د ليدو وړ برياليتوبونه يې تر لاسه کړي دي.
راتلونکي پنځه کلن پلان
په تېرو ۵ کلونو کې د چين حکومت د خلکو د ښه ژوند د تامينولو لپاره اغيز تدبيرونه نيولي، نو په راتلونکو پنځو کلونو کې به څه پلان طرحه شي او داسې پلان به په نړۍ باندې څه اغيزه ولري؟
لومړی، د يادې غونډې له شروع کېدو مخکې د چين مشرانو له بېلا بېلو ځايونو څخه له ليدنو او څارنو، د خلکو له استازو سره له خبرو اترو او په انټرنيټ کې د عامو وګړيو له انلاين وړانديزونو څخه څرګندېږي چې د خلکو د ژوند ښه والی به د چين د راتلونکي پلان يوه برخه وي. تعليم او ښوونه، طب او روغتيا او استوګنيزو ښارګوټو جوړول به د پاملرنې وړ تکي وي.
دوهم، اوس د چين اقتصاد هم له ځېنو ستونزو سره مخامخ دی، مثلأ، د چين په ختيځو او لوېديځو برخو، ښارونو او کليوالو سيمو کې د پرمختګ حالات نابربر دي. د دغو ستونزو د ليرې کولو په بهير کې به نوی فرصتونه رامنځته شي. د بېلګې په توګه، له ۲۰۱۵م کال څخه تر ۲۰۱۹م کال پورې، په چين کې د ښاري کېدو د زياتوالي انډول څلور اعشاريه پنځه سلنې ته رسېدلی يعنې کابو سل ميليون تنه له کليوالو سيمو څخه ښارونو ته انتقال شوي دي.له دې امله په چين کې د مشتري بازار لا پراخ شوی دی. دا د ټولې نړۍ لپاره د اقتصاد د پرمختګ فرصت هم برابروي.
درېيم، په ټوله نړۍ کې د سوداګرۍ ساتونکې غوښتنه او يواړخيزم د سختېدو په حال کې دي. په تېره بيا د کرونا وبا له رامنځته کېدو وروسته، نړيوال اقتصاد مخ پرځوړ دی. خو چين پر خپل پلان او لايحې ټينګار کوي.
ويل کېږي چې په راتلونکو پنځو کلونو کې به چينايان د خپل ژوند د لا ښه کېدو لپاره نه ستومانه کېدونکي هلي ځلي وکړي، د دې ترڅنګ، چين به د اصلاحاتو او ورخلاصون پر تګلارې ټينګار وکړي او له ټولې نړۍ سره به لا ښې همکارۍ او د شيانو راکړه ورکړه وکړي. چين به له ټولې نړۍ سره د پرمختګ فرصتونه شريک کړي.
