د ملي یووالي حکومت اجرائیه مشر وايي، د ولسي جرګې د راتلونکو ټاکنو په ورځ به د رایه ور کولو لپاره له بایو مېټریک کار واخیستل شي. د عبدالله عبدالله په خبره، د ټاکنو په ورځ به رایه ور کوونکي بایومېټريک کېږي. ارګ په دې تړاو څه نه وايي، خو د ټاکنو کمېسیون بیا په دې اړه وروستۍ شوې خبره نه کوي. د ټاکنو کمېسیون وايي، په دې اړه وروستۍ پرېکړه نه ده شوې او د کمېسیون تخنیکي ټیمونه له یوې بهرنۍ کمپنۍ سره په دې اړه کار کوي. د کمېسیون ویندویان وايي چې په راتلونکو څو ورځو کې په دې تړاو وروستۍ خبره کولی شي.
د سیاسي ګوندونو یوه مهمه غوښتنه دا وه چې په راتلونکو ټاکنو کې دې بایومېټریک وکارول شي، خو کمېسیون ویل چې د دې لپاره ناوخته دی او دوی نه شي کولی چې له سره نوملیکنه وکړي. وروسته سیاسي ګوندونو وویل چې د ټاکنو په ورځ بایومېټریک هم کولی شي روڼتیا تضمین کړي. اوس که د ټاکنو کمېسیون په عملي ډول د دې پروسې اعلان وکړي، نو د سیاسي ګوندونو یوه اساسي غوښتنه منل شوې او دا چاره به د روڼتیا پر لور یو ګام وګڼل شي. که څه هم لوی ملي ائتلاف وايي چې دوی لا هم په دې اړه ډاډمن نه دي چې دا چاره به عملي کېږي، خو ټینګار کوي چې د دوی نورې غوښتنې دې هم ومنل شي. د بایومېټریک پروسې ګټه دا ده چې روڼتیا به تضمین کړي، خو وېره ده چې ښايي ځینې کړۍ د دې پروسې مخه ونیسي.
د لوی ملي ائتلاف پاتې غوښتنې داسې دي چې ښايي د سیاسي ګوندونو لپاره مهمې وي، خو خلک د دغو غوښتنو ملاتړ نه کوي. یوازې یوه غوښتنه چې ملي ائتلاف لرله، خلکو یې هم غوښتنه کوله او هغه د ټاکنو د روڼتیا لپاره د بایومېټریک یا بلې داسې پروسې کارول وو. اوس چې دا کار کېږي، نو په طبیعي ډول د لوی ملي ائتلاف دریځ کمزوری کېږي او خلک یې ملاتړ نه کوي. له همدې امله لوی ملي ائتلاف باید له خپلو ځینو غوښتنو تېر شي او پرېږدي چې ټاکنې پر خپل وخت وشي.
د ټاکنو کمېسیون یوازې له سیاسي لانجې سره هم مخ نه دی، نورې ستونزې هم شته چې باید سر له اوسه کمېسیون ورته تیاری ولري. که څه هم په کمېسیون کې چارواکي وايي چې له تخنیکي اړخه ټاکنو ته تیاری لري، خو پکار ده لا زیات ډاډ تر لاسه شي. له بله اړخه کمېسیون باید د امنیت په تړاو له حکومته جدي غوښتنې وکړي. د شوو پرېکړو پر اساس تر دوو زرو زیات مرکزونه به تړلي وي او پنځه زره به پرانیستې وي، خو تضمین نشته چې همدا پنځه رزه به هم پرانیستي پاتې شي او که نه. له همدې امله امنیت د ټاکنو پر وړاندې جدي ګواښ دی او داسې نه ښکاري چې د دغه ګواښ د مخنیوي او یا کمزوري کولو لپار جدي ګامونه اخیستل شوي وي. د ټاکنو کمېسیون باید له خپله اړخه پوره هڅه وکړي، خو پر حکومت او نورو اړخونو هم باید فشار راوړي چې خپلې دندې ښې ترسره کړي، ځکه چې د حکومت له پوره همکارۍ پرته کمېسیون رڼې، عادلانه او سراسري ټاکنې نه شي کولی.
