طالبانو د سعودي عربستان او متحده عربي اماراتو له فشارونو د خلاصون لپاره د جدې غونډه تحریم کړې ده. طالبانو ته نږدې سرچینو کابل نیوز ته ویلي چې طالبان له افغان حکومت سره د خبرو په موخه د سعودي عربستان او متحده عربي اماراتو تر فشار لاندې وو. د دغه سرچینې په خبره، طالبان نه غواړي له افغان حکومت سره مخامخ خبرې وکړي، نو له همدې امله به دغه غونډه د جدې پر ځای په دوحه کې ترسره کېږي.
تر دې مخکې ټاکل شوې وه چې د طالبانو، افغان حکومت، متحده عربي اماراتو، سعودي عربستان او امریکا ترمنځ د افغان سولې په تړاو په جده کې غونډه وشي. د دغه غونډې دقیقه نېټه نه وه په ګوته شوې، خو اوس طالبان وايي چې غونډه به د جدې پر ځای په دوحه کې جوړېږي. طالب سرچینو هم د غونډې دقیقه نېټه نه ده په ډاګه کړې.
سرچینې همدا راز ویلي چې په دغه غونډه کې افغان حکومت، امریکا، طالبان، متحده عربي امارات، سعودي عربستان او پاکستان برخه اخلي. طالبان په دې غونډه کې د افغان حکومت ګډون مني، خو وايي چې د حکومت له استازو سره به یوازې په غونډه کې ګډون کوي او مخامخ خبرې نه ورسره کوي.
بل پلو د سولې عالي شورا بیا وايي چې د جدې د غونډې د ترسره کېدو دقیقه نېټه او همدا راز د دغه غونډې د لغوه کېدو په اړه رسمي معلومات نه دي ورکړل شوي. د دې شورا ویاند سید احسان طاهري وايي، د جدې د غونډې د ترسره کېدو او لغوه کېدو رسمي معلومات نه دي ورکړل شوي او نه هم په دې اړه نظر څرګندولی شي. د ده په وینا دا ځل باید د ابوظبۍ د غونډې تجربه تکرار نه شي او افغان حکومت باید تر هرڅه وړاندې ځان باوري کړي چې طالبان مخامخ خبرې ورسره کوي. د طاهري په خبره، که طالبان له افغان حکومت سره مخامخ خبرې نه کوي، نو ضرور نه ده چې استازي یې په دې غونډه کې ګډون وکړي.
طالب سرچینې بیا وايي چې د دوحې په غونډه کې به له امریکا سره مخامخ خبرې کوي او په وینا یې په دې خبرو کې به پرمختګ وشي. تر دې وړاندې ویل شوي وو چې د افغان حکومت او طالبانو ترمنځ به د مخامخ خبرو لپاره زمینه برابرېږي او سعودي عربستان په دې برخه کې قوي ژمنې کړې وې. خو اوس طالبان وايي چې د ځان د استقلالیت او د سعودي عربستان او اماراتو له فشاره د خلاصون لپاره په قطر کې غونډه کوي.
په دې وروستیو کې د ایران، پاکستان، امریکا او سعودي عربستان له لوري پر طالبانو فشارونه زیات دي، څو له افغان حکومت سره مخامخ خبرو ته حاضر شي، خو دغه ډله وايي چې دوی له امریکا سره خبرې کوي او لومړی غواړي چې د افغانستان د قضیې بهرنی اړخ حل کړي. بل پلو د افغانستان د پارلمان غړي بیا وايي چې طالبان باید له افغان حکومت سره خبرې وکړي او په دې توګه په هېواد کې روان بحران ته د پای ټکی کېږدي. د مشرانو جرګې غړو هم په پرونۍ غونډه کې د خبرو پر مهال وویل چې د افغانستان ستونزه یوازې د افغان حکومت او طالبانو ترمنځ د مخامخ خبرو له لارې د حل وړ ده. د دوی په خبره، په هېواد کې د ننه ټول سیاسیون باید د سولې په اړه اجماع رامنځته کړي او د خپلو شخصي ګټو لپاره دې دغه ملي پروسه نه زیانمنوي. دوی پر طالبانو هم غږ وکړ چې له افغان حکومت سره مخامخ خبرې وکړي او اجازه دې نه ورکوي چې د سیمې هېوادونه او ګاونډیان د خپلو ګټو لپاره د افغانستان د سولې مسئله وکاروي او دا پروسه زیانمنه کړي.
