د امریکا د بهرنیو چارو وزیر مایک پامپیو د څو اروپایي هېوادونو له خوا د وينزويلا د موقت ولسمشر په توګه د خوان ګوایدو له په رسمیت پېژندلو هرکلی کړی دی.
نوموړي په یوه اعلامیه کې د اروپایي ټولنې د نورو هېوادونو په ګډون، له ټولو هېوادونو غوښتي چې د خوان ګوایدو له په رسمیت پېژندلو سره د وینزويلا د خلکو ملاتړ وکړي.
دا په داسې حال کې ده چې ځینو اروپایي هېوادونو وروسته له هغې په ګډه دغه اقدام وکړ چې د نویو ټاکنو ترسره کېدو لپاره یې وخت پای ته ورسېد. دوی د وینزويلا ولسمشر نیکولاس مادورو ته اته ورځې وخت ورکړی و چې نویو ټاکنو ته لاره برابره کړي، خو مادورو د اروپایي ټولنې د غړو دغه ضرب الاجل و غانده او ویې ویل چې هېڅوک نه شي کولی چې موږ ته وخت وټاکي.
بلخوا روسیې چې په وینزويلا کې د دغه بحران له پیله یې د مادورو ملاتړ کړی، د اروپایي هېوادونو پر دغه اقدام توندې نیوکې کړې دي.
اوسمهال په وینزويلا کې د حکومت پرضد او پلوۍ لاریونونه روان دي چې دغه هېواد یې له سخت اقتصادي وضعیت سره مخ کړی دی.
په ورته وخت کې د کاناډا لومړي وزیر اعلان کړی چې د وینزويلا خلکو ته د بشري مرستو د رسولو لپاره ۵۳ میلیونه ډالره مرسته کوي.
جاسټین ترودو وړمه ورځ د کاناډا په اوتاوا ښار کې د لیما ډلې د غونډې پر مهال دغه څرګندونې کړې دي.
دې ډلې چې د کاناډا او لاتینې امریکا له ۱۲ هېوادونو څخه جوړه ده، د وینزويلا د سیاسي بحران په اړه دغه غونډه جوړه کړې وه.
جاسټین ترودو په دې غونډه کې له ګوایدو څخه د کاناډا پر ملاتړ هم ټینګار کړی. نوموړي په دې اړه زیاته کړې: «موږ دا بېړنۍ غونډه د وینزويلا له وروستیو پېښو وروسته جوړه کړه. کاناډا تېره اونۍ له نورو متحدینو سره یوځای شوه او د ملي اسامبلۍ مشر خوان ګوایدو یې چې په ډیموکراټیکه توګه انتخاب شوی و، د وینزويلا د موقت ولسمشر په توګه په رسمیت وپېژانده. ما پرون له ګوایدو سره خبرې وکړې او خوښ یم چې شخصاً مې د کاناډا ملاتړ هغه ته ورساوه.»
بلخوا فرانسه هم د هغو هېوادونو له ډلې ده چې خوان ګوایدو یې د وینزويلا د موقت ولسمشر په توګه په رسمیت پېژندلی دی.
د فرانسې د بهرنیو چارو وزیر ژان ایولو دریان له راډیو فرانسې سره په خبرو کې ټینګار کړی چې په وینزويلا کې ډیموکراسي د ټاکنو د ترسره کېدو له لارې راتلی شي.
نوموړي ویلي: «زموږ پام دی چې مادورو د بېړنیو انتخاباتو غوښتنه رد کړه. هغه انتخابات چې کولای شي وضعیت ارام او عادي کړي. موږ باور لرو چې ښاغلی ګوایدو د دغو انتخاباتو د ترسره کېدو ظرفیت او مشروعیت لري.»
د وینزويلا د حکومت سیاسي مخالفین چې د ګوایدو پلویان دي، د دغه هېواد ولسمشریزې ټاکنې له درغلیو ډکې بولي او دوی شاوخوا ۲۰ ورځې وړاندې د وینزويلا د ولسمشر په توګه د نیکولاس مادورو د بیا ټاکل کېدو په اعتراض کې لاریونونه پیل کړل.
