ملګرو ملتونو د نومبر په ۲۰مې نېټې د غزې د اوربند هغه مسوده رايګيرۍ ته وړاندې کړه، چې د امنيت شورا د لسو غير دايمي غړو هېوادونو له خوا ترتيب شوې وه، خو امريکا ورته مخالفه رايه ورکړې او د غزې د اوربند هڅې یې يو ځل بیا په اوبو لاهو کړې دي.
په ملګرو ملتونو کې د امريکا د دايمي استاري مرستيال روبيرټ وود يادې مسودې ته له رایې ورکولو څو ورځې مخکې ويلي وو، چې له يادې مسودې سره د بنديانو مسئله نه ده تړل شوې او تصویب به نه شي، خو هغه د خبريال هغې پوښتنې ته ځواب ور نه کړ، چې څنګه کولی شي، دغه دوه چارې یوه له بلې سره وتړي.
دا باید هېره نه کړو، د امريکې دا لومړی ځل نه دی، چې د غزې د اوربند مخه نیسي، بلکې څو څو ځلې يې په يوې او بلې پلمې د ورته مسودو د تصویب مخه نېولې ده.
واشنګټن د روان کال په فبرورۍ کې هم د غزې د اوربند په تړاو د الجزاير له خوا وړاندې شوې لايحه نه وه منلې او لامل يې دا ښودلی و، چې د حماس له خوا د یرغملو کسانو خوشي کېدل باید د اوربند په لازمو شرایطو پورې وتړل شي.
امريکې د فلسطين او اسرائيل ترمنځ د شخړې له پيل راهيسې شپږ ځلې د غزې د اوربند مسودې ته مخالفې رايې ورکړي او پنځه ځلې يې په غزې کې د اوربند مخه نېولې ده.
واشنګټن له تېرې يوې مودې راهیسې لسګونه ځلې د فلسطين او اسرائيل د مسئلو په هکله مخالفې رايې کارولې دي.
ډېری هېوادونه شک لري، چې امريکا ولې بیا بیا په ورته پلمې په غزې کې د اوربند مخه نيسي؟
ایا امريکا د ملګرو ملتونو له دايمي غړيتوب څخه ګټه اخلي او د خپل ملګري هېواد پلوي کوي؟
امنيت شورا پنځه دايمي غړي هېوادونه لري، چې هر یو یې د وېټو یا د مخالفې رايې حق لري.
که يوه مسوده د امنيت شورا د زياترو غړو هېوادونو ملاتړ ترلاسه کړي، خو که يو دایمي غړی هېواد یې وېټو کړي، نو هغه مسوده نشي تصويبېدلی.
دغه حق د ملګرو ملتونو د پنځو دايمي غړو هېوادونو ځانګړی حق بلل کېږي او دا پر دغو هېوادونو د نړيوالې ټولنې د باور ښکارندويي هم کوي، خو امريکا باید په مسؤلانه او محتاطې رويې دغه حق وکاروي او داسې باید ونه کړي، چې له دغه حق څخه ناوړه ګټه پورته او په نامشروع لارو خپل ملګري هېوادونه وساتي.
امريکا له اسرائيل سره پوځي مرستو ته دوام ورکړی او داسې ښکاري، چې په سیمې کې د شخړې د غځېدو د مخنيوي کوم نیت نه لري. جالبه دا ده، که نور هېوادونه هم د دغې شخړې د پای ته رسیدو لپاره هڅې کوي، امريکا يې بیا هم مخه نيسي.
امريکا په حقیقت کې له خپل مسؤليت تېښته کوي او د امنیت شورا له دایمي غړيتوب څخه ناوړه ګټه پورته کوي.
په غزې کې جګړه لاهم روانه ده او بې ساری بشري ناورين پکې راپورته شوی، نو اړينه ده، چې فلسطين او اسرائيل اوربند وکړي او جګړه ودروي.
امريکا بايد په دې برخه کې رغنده رول ولوبوي، د اوربند خبرې باید وهڅوي او د دوو هېوادونو لايحې د عملي کولو او په سوله کې د فلسطین او اسرائيل د ګډ ژوند او په منځني ختيځ کې د دايمي امنيت او سولې د ساتلو لپاره باید نه ستومانه کېدونکي کوششونه وکړي.
