له پخوا ویل کېدل چې په ارګ کې اخلاقي فساد دی او آن د همدې فساد پر اساس په ارګ او ځینو نورو مهمو دندو کې ګومارنې کېږي. په دې اړه د ارګ کارکوونکو او آن چارواکو تل په شخصي مجلسونو کې خبرې کولې، خو دا موضوع رسنیزه شوې نه وه او نه هم چا په رسمي ډول داسې ادعا کړې وه. له هغه وروسته چې ارګ پر مهمو څوکیو کمزورې، بې تجربې او غیر مسلکي نجونې وګومارلې، نو پر ارګ نیوکې زیاتې شوې. د همدغو نیوکو په دوام په خاص امنیت کې د ولسمشر غني ستر سلاکار جنرال حبیب احمدزي چې تر څو میاشتو وړاندې په ارګ کې و، ادعا وکړه چې په ولسمشرۍ ماڼۍ کې ځینې کړۍ د اخلاقي فساد د تروریج لپاره سیستماتیک کار کوي. جنرال حبیبالله احمدزي په کابل کې له یوه خصوصي ټلوېزیون سره په خبرو کې ادعا کړې ده، چې ځینې وزیران، د ولسمشر غني سلاکاران او د ولسي جرګې وکیلان “د اخلاقي فساد خپرولو” رول لوبوي. له دې وروسته د ارګ یوې بلې سلاکارې مریم وردګ هم په ارګ کې د اخلاقي فساد خبره کړې ده. په ټولنیزو رسنیو کې په دې تړاو له توندو غبرګونونو وروسته ارګ اړ شو، چې غبرګون وښيي. د ولسمشر ویاند هارون چخانسوري پر ارګ د فساد او فحشا خپرولو ادعاوې رد کړې او هغه یې بې بنسټه وبللې. نوموړي وویل چې که له ښاغلي احمدزي سره اسناد وي، باید لویې څارنوالۍ ته یې وسپاري.
ښکاره ده چې داسې اسناد به نه وي چې په کره ډول دا ادعا ثابته کړي او جنرال احمدزی په څارنوالۍ پرې استناد وکړي، خو ډېر داسې څه شته چې که ثابت نه شي، خو ارګ ترې ځان سپینولی هم نه شي. هغوی چې د ولسمشر غني په وخت کې ارګ او د چارو ادارې ته ورغلي، پوهيږي چې هلته ډېر داسې څه شته، چې د اخلاقي فساد بوی ترې راځي. دا سمه ده چې ښځې دندې او کاري حق لري، خو هېڅوک باید د دوی له مجبوریت څخه ناوړه ګټه وانه خلي او یا هم د اخلاقي فساد په لینونو باید په دندو ګومارنې ونه شي. په ارګ او چارو اداره کې د ډېرو بې تجربې، غیر مسلکي او آن کم لوستو نجونو ګومارنې هغه څه دي، چې پوښتنې را پیدا کوي. خبره هغه وخت لا شک او اندېښنې ته ځي چې همداسې کم لوستې، غیر مسلکي او بې تجربې نجونې له ارګ څخه د باندې په لوړو څوکیو ګومارل کېږي. زموږ ټولنه دودیزه ټولنه ده او سخته ده چې خلک دې دا ډول کړنې وزغمي. اوس دا سمه ده چې نه به جنرال احمدزی او نه هم بل څوک داسې اسناد وړاندې کړي، چې په ارګ کې د اخلاقي فساد ادعاوې ثابتې کړي، خو ډېرې داسې پوښتنې او شکونه شته چې نه یې څوک د کولو جرئت لري او نه به یې هم ارګ داسې ځواب کړي، چې ستونزه حل شي، خو د خلکو په ذهنونو کې یې د شکونو او تورونو یو لوی غر جوړ کړی دی.
ارګ باید دې چارې ته ډېر پام وکړي، ځکه افغانان په دې مسایلو کې ډېر حساس دي او هېڅ داسې ګام وا نه خلي چې د خلکو شکونه او پوښتنې زیات کړي. ښځې د کار حق لري او د هغوی له مجبوریتونو باید ناوړه ګټه وانه خیستل شي او نه هم داسې فضا جوړه شي چې شکونه زیات کړي. د ښځو د ګومارنې بهیر باید روڼ، واضح او له قانون سره سم وي، څو هم هغوی د کار حق تر لاسه کړي او هم د هغوی او حکومت حیثیت ته زیان وا نه وړي.
