لا هم ټاکنو ته څو میاشتې پاتې دي، خو محمد اشرف غني سره له اوسه داسې ګامونه اخلي، چې کمپایني حرکتونه ورته ویل کېدای شي. نوموړی سر له اوسه په حکومت کې داسې بدلونونه راولي، چې په راتلونکو ټاکنو کې یې بیا په خپله ګټه وکاروي. هغه تازه د دریو وزارتونو وزیران له دندو ګوښه کړي دي او پر ځای یې نوي کسان ګومارلي دي. د اوبو او برېښنا، مخابراتو او لوړو زده کړو لپاره نوي وزیران ګومارل شوي دي. د حکومت سیاسي مخالفین هم دا کمپایني مقررۍ او منفکۍ ګڼي او پر محمد اشرف غني غږ کوي، چې د ټاکنو لپاره دولتي امکانات ونه کاروي.
که وروستیو بدلونو ته وګورو، واضح ترې کمپایني هڅې ښکاري. محمد اشرف غني په کورنیو رسنیو کې کم ملاتړ لري. له همدې امله یې د یوه خصوصي ټلوېزیون مالک راوست او د مخابراتو سرپرست وزیر یې کړ. ارګ غواړي په دې ډول له دغه ټلوېزیون څخه په خپل راتلونکي ټاکنیز کمپاین کې ګټه واخلي. له همدې امله یې د ټلوېزیون مالک ته وزارت ورکړ او هغه به یې په بدل کې په ټاکنو کې دده ملاتړ کوي. له دې پرته د مخابراتو وزارت ته ټاکل شوی کس نه په دې برخه کې زده کړې لري او نه هم په اړونده برخه کې کومه کاري تجربه چې پرې حساب وشي. د لوړو زده کړو وزیر هم د حنیف اتمر پخوانی ملګری و او ولسمشر په دې خاطر له دندې لرې کړ، چې په راتلونکو ټاکنو کې ترې ګټه نه شي اخیستلی. که څه هم د هغه پر ځای راغلی کس، استاد او تکړه مدیر دی، خو ولسمشر بیا هم تمه لري چې په ټاکنو کې به ترې په جنوب لوېدیځه حوزه کې ګټه واخلي. همداسې د اوبو او برېښنا وزارت ته راغلی کس هم داسې دی چې ارګ به په راتلونکو ټاکنو کې ترې ګټه اخلي.
دا په روښانه توګه کمپایني کړنې دي، چې په راتلونکو ټاکنو کې د حکومتي واک د کارولو لپاره د محمد اشرف غنی تیاری ښيي. تر دې حیرانوونکې دا ده چې دا کسان په خورا ډراماتیک ډول له دندې ګوښه کېږي او په دې اړه هېڅ فکر نه کېږي، چې د دولتي ادارې چارې او برخلیک به څه ډول وي. په دې اړه پرون اجرایه رییس ډاکټر عبدالله عبدالله هم ویلي، چې دا ډېره عجیبه ده چې ګوښه شوي وزیران د ځان د ګوښه کېدو خبر پر فیسبوک لولي او له دې لارې خبرېږي. د عبدالله په خبره، وزیران په ځان خبر نه وي، خو ولسمشر ګوښه کړي وي.
ارګ او واکمن ټیم ته پکار ده چې د راتلونکو ټاکنو لپاره تیاری ولري، خو په هېڅ ډول دولتي واک او ځواک ونه کاروي. له بده مرغه اوس ارګ نږدې هره ورځ یو سلاکار ټاکي، خو ټول پوهېږي چې د دغو سلاکارانو ټاکل د کمپاین برخه ده. همداسې حکومتي بدلونونه او نور کارونه روان دي، چې په واضح ډول له ټاکنو سره تړلي دي. دا ډول ګامونه به له یوه اړخه حکومت لا زیات وشړوي او له بله اړخه به د رڼو، عادلانه او سراسري ټاکنو مخه ونیسي او د ولسواکۍ په مرۍ به پښه کېږدي.
