د افغان سولې لپاره د امریکا د بهرنیو چارو وزارت ځانګړی استازی په کابل کې دی او دلته یې له پخواني ولسمشر کرزي او د ملي یووالي حکومت له مشر اشرف غني سره کتلي دي. د امریکا سفارت وايي چې خلیلزاد له حکومتي چارواکو، سیاستوالو او مدني فعالینو سره ګوري. ارګ وايي چې خلیلزاد له ولسمشر سره په خبرو کې د سولې په تړاو د وروستیو پرمختګونو جزیات شریک کړي دي او د هغې بینالافغاني غونډې په اړه یې خبرې کړې دي، چې ټاکل شوې د جرمني له لوري په قطر کې جوړه شي. خلیلزاد به ولسمشر غني ته ډاډ ورکوي چې طالبان به قانع کوي، څو له افغان حکومت سره خبرې وکړي، خو له ولسمشر کرزي سره یې د خبرو په اړه ډېر جزیات نشته.
خلیلزاد په پاکستان کې هم له ځینو چارواکو سره لیدلي او په اروپا کې یې هم د امریکا له متحدینو سره خبرې کړې دي. ټاکل شوې چې خلیلزاد به په نږدې راتلونکي کې قطر ته ورځي او له طالبانو سره به د خبرو اووم پړاو پیلوي. په کابل کې خلیلزاد غواړي حکومت ته ډاډ ورکړي، چې دوی به داسې ګام نه اخلي چې حکومت یو مخ پکې څنګ ته شي. دغه راز حکومت ته به وايي چې دوی به له طالبانو سره موافقه نه کوي، خو که طالبانو له حکومت سره اوربند او خبرې ومنلې، نو دوی به ورسره توافق کوي. طالبان په دې برخه کې کلک دریځ لري او لا هم ټینګار کوي چې له حکومت سره د سولې په تړاو خبرې نه کوي. طالبان وايي چې د بهرنیو ځواکونو د وتلو مهالوېش او د چا پر ضد د افغان خاورې نه استعمال به له امریکایانو سره کوي او بیا به پر کورنیو چارو له افغان سیاستوالو، ګوندونو او فعالینو سره خبرې کوي، خو نه وايي چې له حکومت سره به هم خبرې وکړي. اوس که خلیلزاد حکومت ته ډاډ هم ورکړي چې طالبان به خبرو ته حاضروي، دا دې خلیلزاد پر وړاندې ستره ننګونه ده، ځکه چې طالبان لا هم پر خپل پخواني دریځ ټینګار کوي.
بل بحث چې د خلیلزاد په دې سفر کې مهم دی، هغه دا چې خلیلزاد لا هم پخواني ولسمشر او له حکومت څخه د باندې سیاستوالو ته ارزښت ورکوي. تر ولسمشر غني وړاندې خلیلزاد د حامد کرزي کور ته ورغلی او هلته یې له ځینو سیاستوالو سره کتلي هم دي. خلیلزاد ته حامد کرزی او دا نور سیاستوال ښایي ځکه مهم وي، چې دوه ځله د مسکو غونډې ته ورغلي او طالبان هم له دوی سره خبرې کوي. د سولې په چاره کې د روسیې رول او که طالبان بیا هم له حکومت سره خبرو ته نه حاضریږي، نو له دغو سیاستوالو سره ګډ کار د امریکا لپاره مهم دی. له همدې امله امریکا دغو سیاستوالو ته ارزښت ورکوي، خبرې یې اوري او ترې غواړي چې د سولې په چاره کې ورسره ګډ کار وکړي. د همدغو دوو ماموریتونو لپاره خلیلزاد په کابل کې دی او همدا ماموریتونه به یې په قطر کې له طالبانو سره پر خبرو او د دې خبرو پر پایلو اغېز ولري.
