کله چې په ۲۰۱۴ ز کال کې محمد اشرف غنی کاندید و، د نورو ژمنو تر څنګ یې په اقتصادي برخه کې هم سترې ژمنې وکړې. خلکو هم اشرف غني ته د یوه اقتصاد پوه په سترګه کتل، چې زموږ په اقتصادي حالت کې به بدلون راولي. نوموړي به ویل چې یو میلیون کسانو ته کار پیدا کوم، افغانستان د اسیا پر څلور لارې بدلوم، افغانستان د منځنۍ او جنوبي اسیا ترمنځ پر پله بدلوم، د خلکو په دسترخوان کې بدلون راولم، لویې پروژې پیلوم، اوبه مهاروم، لوی بندونه جوړوم، د افغانستان میوو او نورو کورنیو تولیداتو ته مارکېټ پیدا کوم، د ننګرهار سبزي فرانسې ته وړم، بادام اروپا ته وړم، انار امریکا ته وړم او نورې همداسې لویې ژمنې به یې کولې.
دا دی د ولسمشر قانوني وخت پوره دی، خو د نورو برخو تر څنګ، په اقتصادي برخه کې د ده ژمنې نه دي پوره شوې او اقتصادي تګلارې یې ناکاره شوې دي. ولسمشر نه یوازې یو میلیون کسانو ته کار پیدا نه کړ، بلکې سلګونه زره کسان یې وزګار کړل. افغانستان یې نه یوازې د اسیا پر څلور لارې بدل نه کړ، بلکې د خپل ناکاره سیمه ییز سیاست له امله یې هېواد د رقابتونو او جګړې پر څلور لارې بدل کړ. د خلکو د دسترخوان ډوډۍ یې نیمه کړه. خدمات یې کم، خو مالیه یې لوړه کړه. د اوبو د مهارولو لپاره یې له خبرو پرته په عمل کې هېڅ ونه کړل او یوازې د نورو حساسیت یې را وپاراوه. زموږ میوې لا هم بې ارزښته دي او همدا اوس د فراه یوه کیلو هندوانه په یوه افغانۍ پلورل کېږي او هېڅ بازار یې ورته پیدا نه کړ.
ولسمشر هوايي دهلیزونه جوړ کړل چې په تاوان چلېږي او تاوان یې هم USAID ورکوي، چې دا بیا له حکومت سره په مرسته حسابوي. د لاجوردو د لارې سندرې وېل کېدلې، خو یوازې شپږ لارۍ ترکیې ته ولاړې چې په هر ځای کې به یې عکسونه اخیستل او د سترې لاسته راوړنې په توګه به یې یادول. شپږ لارۍ د یوه هېواد پر اقتصاد څه اغېز لري او څه داسې پکې بار دي چې څوک پرې حساب وکړي!؟ له چین سره د رېل ګاډي خبره وه، رېل ګاډۍ راغی او بېرته ولاړ، خو هېڅکله بیا را ونه ګرځېد. د ټاپي، کاسا زر او ټوټاپ خبرې خو لا هم خیالي کیسې دي، چې پر ځمکه یې څرک نه ښکاري. د ډالرو پر وړاندې د افغانیو بیه را لوېدلې ده او اوس یو ډالر تر ۸۰ افغانۍ پورته پلورل کېږي، په داسې حال کې چې د ولسمشر غني د واک په پیل کې ۵۰-۵۳ پورې و. له هېواده میلیاردونه ډالره ایستل شوي دي او د سوداګرۍ خونې په وینا چې یوازې په تېرو دریو میاشتو کې ۱۴۰۰ سوداګرو خپلې پانګې له هېواده ایستلې دي. د پانګونې په برخه کې هېڅ د حساب وړ کار نه دی شوی او هر پانګه وال هڅه کوي چې خپله پانګه وساتي.
له بده مرغه اشرف غني افغانستان له یوه واقعي اقتصادي بحران سره مخ کړی او د خلکو هغه هیلې یې تر خاورې لاندې کړې دي، چې د یوه اقتصاد پوه په توګه یې له نوموړې لرلې. له بده مرغه ولسمشر د نورو چارو تر څنګ، په اقتصادي برخه کې هم له سختې ناکامۍ سره مخ شوی چې زیان یې د افغانستان خلک پرې کوي. د نورو چارو تر څنګ، د نوموړي اقتصادي تګلارې هم ناکاره او مسخره شوې دي.
