له وسله والو طالبانو سره د سولې له خبرو وروسته، د داعش فعالیتونو یو ځل بیا زور اخیستی او دغه راز امریکايي چارواکي پرله پسې د داعش د ګواښونو په اړه خبرې کوي. تازه د مشرانو جرګې ځینو غړو ویلي چې داعش په جوزجان، سرپل او فاریاب کې فعال شوی او خپلو لیکو ته د جنګالیو پر جلبولو کار کوي. تر دې وړاندې امریکايي مهمو نظامي چارواکو ویلي وو، چې داعش په افغانستان کې فعال دی او هڅه کوي چې د افغانستان له خاورې په استفادې سره، پر امریکا برید وکړي. د امریکايي چارواکو له خوا دغو څرګندونو ته طالبانو هم غبرګون وښود او دا یې داعش ته کمپاین وباله. داسې ویل کېږي چې په شپږم پړاو خبرو کې د طالبانو او امریکايي استازو ترمنځ د داعش په تړاو توندې خبرې شوې دي.
له طالبانو سره د سولې په خبرو کې بیا بیا طالبانو ته دا روحیه ورکول کېږي، چې ګواکې له تاسې وروسته به داعش جګړه غځوي. د خلیلزاد دا خبره چې له طالبانو سره سوله به جګړه ختمه نه کړي، همدا مانا لري چې داعش به جګړه غځوي او تر یوه بریده به د طالبانو ځای نیسي. کله چې امریکايي چارواکي د داعش خطر لوی ګڼي او بیا بیا یې په اړه څرګندونې کوي، نو طبیعي ده چې طالبان به همدا پیغام اخلي چې امریکا غواړي د دوی ځای داعش ته ورکړي او جګړه وغځوي. په کونړ او د افغانستان په شمال کې د داعش تحرکات هم داسې دي چې له سولې وروسته د جګړې لپاره تیاری ترې ښکاري. څو ورځې وړاندې د ولسمشر لومړي مرستیال هم وویل چې داعش په شمال کې فعالیتونه پیل کړي او له طالبانو سره د سولې د خبرو له بریالي کېدو وروسته به دوی جګړه پیلوي.
دغه حالت پر طالبانو اغېز کړی او اوس احساسوي چې امریکا نه غواړي افغانستان ته سوله او ثبات را وګرځي. طالبان اوس درک کوي چې امریکا د سولې په خبرو کې رښتینې نه ده، بلکې غواړي له دوی سره فریب او چل وکړي. د داعش په تړاو د امریکايي نظامیانو څرګندونې او تر دې وړاندې له داعش سره د امریکا د مرستې په اړه خبرونو، رپوټونو او معلوماتو دا دریځ پیاوړی کړی، چې امریکا غواړي له طالبانو سره سوله وکړي، خو جګړه د داعش پر مټ وغځوي. همدا دریځ او بدلون د دې سبب شوی چې طالبان په خبرو کې د داعش موضوع را ګډه کړي او له امریکايي چارواکو سره پرې خبرې وکړي.
اوس به طالبان په اووم پړاو کې یو ځل بیا له زلمي خلیلزاد سره د داعش بحث را پورته کوي. طالبان غواړي چې د سولې له توافق وروسته او له عملي پیل وړاندې داعش په بشپړ ډول له منځه ولاړ شي. دا هغه څه دي چې طالبان به یې په جدیت مطرح کړي. که طالبان له داعش څخه ډاډمن نه شي، نو سخته ده چې له امریکا سره به د سولې تر عملي ګامونو ولاړ شي. د طالبانو دا دریځ سم دی او د افغانستان خلکو ته هم پکار ده چې د داعش په تړاو حساس و اوسي او پرې نه ږدي چې داعش د جګړې د غځولو لپاره وکارول شي.
