تر شپږ پړاو خبرو وروسته هم د افغان کړکېچ د سوله ییز حل په اړه د امریکا او وسله والو طالبانو دریځونه څومره چې پکار وه، نه دي سره نږدې شوي. د اووم پړاو په اړه د دواړو لورو څرګندونې هم په بشپړ ډول له یو بل سره په ټکر کې دي. په قطر کې د وسله والو طالبانو د دفتر ویاند سهیل شاهین څو ورځې وړاندې په یوه ټویټ کې د جزیاتو له ورکولو پرته وویل، چې امریکایانو له افغانستانه د ټولو ځواکونو له ایستلو سره هوکړه کړې او ژمنه کوي چې په راتلونکي کې به د افغانستان په چارو کې هېڅ راز لاسوهنه نه کوي. د شاهین له څرګندونو وروسته، د افغان سولې لپاره د امریکا ځانګړي استازي زلمي خلیلزاد پر خپله رسمي ټویټرپاڼه ولیکل چې امریکا له افغانستانه د وتلو د هوکړې په لټه کې نه ده، بلکې هدف یې د سولې یوه جامع توافق ته رسېدل دي. هغه پر خپل پخواني دریځ په ټینګار سره وویل، څو چې پر هر څه هوکړه نه وي شوې، پر هېڅ شي هم هوکړه نه کېږي.
د امریکا او طالبانو له دریځونو په وضاحت ښکاري چې اووم پړاو خبرې به هم له ننګونو ډکې وي او د کومې محسوسې پایلې تمه نه شي ترې کېدلی. د امریکا او طالبانو ترمنځ په خبرو کې ستونزه د دواړو له لوري پر خپلو دریځونو تر اړتیا ډېر ټینګار دی. امریکا هڅه کوي چې له افغانستانه د خپلو ځواکونو د ایستلو تر مهالوېش وړاندې، طالبان له افغان دولت سره مخامخ خبرو ته مجبور کړي. د طالبانو ټوله هڅه بیا دا ده چې له افغان دولت سره تر خبرو وړاندې پر امریکا مهالوېش اعلان کړي. ستونزه د دواړو لورو ترمنځ د باور ده. طالبان د امریکا او امریکا بیا د طالبانو ارادې ته د شک په سترګه ګوري. طالبان لا هم نه دي ډاډه شوي چې امریکا دې په رښتیا د کړکېچ داسې سوله ییز حل وغواړي، چې د هغوی پوځي حضور ته دلته د پای ټکی ږدي. له بل لوري هغوی د سیاسي مذاکراتو تجربه هم نه لري، له همدې کبله ډېر په احتیاط ګامونه اخلي او وېره لري چې په مذاکراتو کې کوچنۍ تېروتنه یې د جګړې د ډګر لاسته راوړنې پر اوبو لاهو کولی شي. امریکا بیا اندېښنه لري چې که له افغان حکومت سره د طالبانو تر مخامخ خبرو وړاندې د ځواکونو د وتلو مهالوېش اعلان کړي، طالبان ښايي وروسته هم له دولت سره له خبرو انکار ته دوام ورکړي. د ځواکونو د وتلو مهالوېش پر دې سربېره، طالب جنګیالي په پوځي لحاظ پر خپلې بریا نور هم ډاډمنوي.
د سولې مذاکرات برخلیک ټاکوونکي پړاو ته رسېدلي دي. په دې پړاو کې دواړو لورو ته پکار ده چې انعطاف وښيي او دغه بهیر له بشپړې ناکامۍ وژغوري. غوره به دا وي چې په دې پړاو خبرو کې پر ځینو باور جوړوونکو اقداماتو هوکړه وشي، څو دواړه لوري د یو بل له ارادو ډاډه شي او په راتلونکي کې د سولې په تړاو عمده پرېکړو ته لاره هواره شي. که طالبان او امریکا د تېرو پړاوونو په څېر پر خپلو دریځونو بشپړ ټینګار وکړي، د سولې په برخه کې تر اوسه پورې شوی پرمختګ له منځته تللی شي.
