د هر کار او دندې د پایېدو لپاره د کارکوونکو ترمنځ اغېزناکې اړیکې تر هرڅه مهم او ارزښتناک حیثیت لري. هرڅومره چې ستاسې کارکوونکي متخصص او پر کار پوه وي، تر هغې چې د اړیکې په ساتلو او له مقابل لوري سره په مرسته کولو کې سست وي، ستاسې په درد نه خوري. په دې وروستیو کې ډېری مدیران په کاري چاپېریال کې د کارکوونکي تر تخصص د هغه شخصیت ته ارزښت ورکوي. هغه کارکوونکی چې ځان تر نورو مجرب او پوه ښکاره کوي او یا د هر چا کار کې کار لري، پرته له شکه چې هم ستاسې او هم د خپل کاري پرمختګ په لار کې لوی خنډ ګرځي. موږ په همدې مقاله مدیرانو ته هغه لارې چارې ښيو، چې د استخدام په وخت د کارکوونکي تر تخصص د هغه شخصیت ته په ارزښت ورکولو کې له هغه سره مرسته وکړي، څو ښه کارکوونکي پر دنده وګوماري.
۱–پر هرڅه پوه کارکوونکی ستاسې په درد نه خوري
په مخکې وختونو کې به هر مدیر د داسې کارکوونکي په لټه کې و، چې پر هرڅه به پوه و. دوی غوښتل چې له تخصص پرته په نورو برخو کې اشنايي لرونکي کارکوونکي وګوماري، چې دا د استخدام پر وخت تر ټولو لویه تېروتنه ده. د بېلګې په ډول، د مارکېټېنګ د برخې یو کارکوونکی چې یوازې د یو بازار په سطحه د تبلیغاتو وړتیا ولري، کفایت کوي. خو ځینې مدیران بیا وايي چې د مارکېټېنګ برخې کارکوونکي د تبلیغاتو رسولو ترڅنګ باید په پلان جوړونه او د انلاین کمپنیو په مدیریت کې هم ښه وړتیا ولري، خو په دې وروستیو کې هرڅه بدلون کړی دی. نن ورځ ډېری مدیران د کار په ډول، د ستونزو پر حل او د هغه پر بدیل امتیاز او د ځینو نورو اړخونو په نظر کې نیولو سره په ډېر متفاوت ډول برخورد کوي. په داسې شرایطو کې پر هرڅه پوه کارکوونکی په درد نه خوري؛ بلکې داسې کس پکار دی، چې نوښت ولري او وکولای شي هغه لارې وازمويي چې تر اوسه بل چا پرې پل نه دی اېښی او دا ځانګړنې لرل دقیقاً د یوه ښه کارکوونکي د شخصیت استازولي کوي.
۲– په نوې دنده کې یوازې تخصص لرل مهم نه دي
پر هرڅه پوه کارکوونکی نن ورځ ډېر په درد نه خوري. کلونه مخکې په کاري چاپېریال کې د خپل پوزېشن وړاندوینه کول ډېر محدود او کم شونی کار و، خو نن ورځ کاملاً شرایطو بدلون کړی دی. د بېلګې په ډول، کلونه مخکې مو د انلاین بازارموندنې په برخه کې د (خوشحالۍ مدیر) په نوم پوزېشن هېڅ نه پېژانده، خو کله چې د دغه پوزېشن په رامنځته کولو فکر وشو، سمدستي یې دنده او کار هم مالوم شول چې د شرکت له خدمتونو به د خلکو په راضي ساتلو کې کار کوي. دا چې دغه دنده او پوزېشن ډېر نوی او خلاقانه دی، د استخدام په وخت مدیر نه شي کولای چې د څو کارکوونکو له منځه داسې سړی انتخاب کړي، چې هغه مخکې په دې برخه کې کار کړی وي. دقیقاً باید په داسې شرایطو کې د کارکوونکي شخصیت ته د هغه تر تخصص زیات ارزښت ورکړل شي.
۳– د کاري ټیم وړتیا تر هرڅه زیاته د کارکوونکوپه شخصیت پورې اړه لري
د کاري ټیم وړتیا تر هرڅه د کارکوونکو په شخصیت پورې اړه لري. نن ورځ ډېر کارونه په ګروپي او ټیمي ډول ترسره کېږي، نو په دې لحاظ مدیر باید داسې کسان پر دنده وګوماري چې هغوی انعطاف منونکي، له مقابل لوري سره مرسته کوونکي او د خپلو تجربو شریکوونکي و اوسي، څو وکولای شي د ټیم له ټولو غړو سره ښه اړیکه وساتي. هغه کارکوونکی چې باید ۹۰ سلنه وخت د خپل ټیم له غړو سره یو ځای کار وکړي، که ځان خوښوونکی او پر نور نه ورګډېدونکی خاصیت ولري، حتماً ده چې په کاري ټیم کې دې ستونزې رامنځته کړي. هغه کس چې په شخصیتي لحاظ په ګډ ټیم کې د کار کولو روحیه ونه لري یا په ډېرې سختۍ سره په هغه کې کار کوي، بیخي ناممکنه ده چې هغه د ښه لاسته راوړنه ولري.
۴– د کارکوونکي د شخصیت بدلول ناممکن دی
د کارکوونکي د شخصت بدلون د مدیر له وسه وتلې خبره ده. ځکه دا له ډېره وخته زده شوی او په وار وار تکرار شوی عمل دی. خو داسې هم نه ده چې د هغه شخصیت تور کاڼی دی او په هېڅ رقم نه ماتېږي، د ځینو خاصو لارو چارو په استعمال سره کولای شی خپلو کارکوونکو ته د کار کولو لاره وښيی. که تاسې د استخدام پر وخت داسې کارکوونکی پر دنده وګوماری چې ښه تجربه ولري، خو په شخصیتي لحاظ بیا نیمګړی وي، باوري اوسی چې ستاسې لپاره به درد سر وي. ځکه په کاري چاپېریال کې د یو چا د شخصیت اصلاح کول سلو په سلو کې بې پایلې کار دی. نو ښه خبره دا ده چې د استخدام پر مهال د نیمګړي شخصیت، خو پوره تجربه لرونکي کارکوونکي په ګومارلو پسې ونه ګرځئ. د هغه پر ځای د هغه کارکوونکي په لټه کې شی، چې د کار او زده کړې مینه وال وي. دا دقیقاً هغه کسان دي چې پر فوق العاده کارکوونکو اوړي. هغه کارکوونکي چې ښه شخصیت، خو کمه کاري تجربه ولري، د هغه په پرتله چې ډېره کاري تجربه او بد شخصیت لري، په څو څو وارې ستاسې شرکت او کاري دفتر ته د بریا راوړلو ضامن دي.
۵– د ګډ کاري ټیم د کارکوونکو د شخصیتونو ترمنځ باید تعادل په پام کې ونیول شي
د ګډ کاري ټیم د کارکوونکو د استخدام پر مهال څو ډوله شخصیت لرونکي کارکوونکي وګومارئ. داسې نه چې تاسې یو ډول شخصیت لرونکي کسان ځای پر ځای کړی. د کارکوونکو ترمنځ د شخصیت د تعادل په پام کې ساتل، واقعاً ټیم ته خوشالي ورکوي. اوسنیو کارکوونکو ته مو ښه پام وکړئ او د هغوی هر یوه له اخلاقو او عادتونو یو ذهني فهرست واخلئ. اوس وګورئ، ستاسې د کارکوونکو ترمنځ کوم عادت نیمګړی دی. د بېلګې په ډول، کېدای شي ستاسې د ډېری کارکوونکو شخصیت داسې وي چې هغوی کمې خبرې کوي او پر همدې اساس کله چې دفتري موبایل ته زنګ وهل کېږي، هر یو د دې کوښښ کوي چې هغه بل ځواب ورکړي. نو که داسې وخت کې یو ډېرې، خو پر ځای خبرې کوونکی کارکوونکی کس وګوماری، څومره به ښه وي.
د کاري مصاحبې او استخدام پر وخت، د کارکوونکي له دغو ځانګړنو سترګې مه پټوئ، ضرور نه ده چې هغوی د پوره کاري تجربه ولري، چې ښه شخصیت ولري، حتماً به بریا ته رسېږي.
