ایا تر اوسه مو له ځانه پوښتلي چې ولې له خپل کار څخه زړه توري یی؟ ایا دا زړه توروالی مو د هغو کسانو له امله دی، چې تاسې ورسره سروکار لری؟ یا مو کار نوی پيل کړی او یا هم کومه بله مسئله ده؟
له کاره د زړه توروالي د اصلي لامل پیدا کول له موږ سره مرسته کوي، څو دا بد صفت چې موږ خپل کړی، له منځه یوسو او وشو کولای چې له خپل کار څخه خوند واخلو او یا لږ تر لږه هغه د تحمل کړو. په همدې مقاله کې درته څلور هغه پوښتنې مطرح کوو، چې په ځوابولو سره یې کولای شو هغه لامل پيدا کړو چې ولې موږ له کار کولو څخه زړه توري شوي یاستو او د دغه ذهنیت او شرایطو د بدلون لپاره باید کوم کارونه وکړو.
۱ـ ایا یوازې پر منفي شیانو تمرکز کوی؟
یوازې پر منفي شیانو فکر او تمرکز کول له کاره د زړه توروالي لامل کېږي. ممکن د مخالفو او ضد خبرو اورېدل یا هغه ته ارزښت ورکول مو هم له کار څخه زړه توري کړي. کله چې د بریالیو مدیرانو خبرې اوری، چې هغوی د خپل مسیر د پيدا کولو او ننني موقف ته د رسېدو په اړه خبرې کوو، دا وخت حتماً زموږ په ذهن کې خپلو موخو ته د رسېدو ژمنه راګرځي، چې موږ خپلې ژمنې ته څومره وفادار یو. ایا موږ غواړو چې د خپلې خوښې وړ ژوند ته ورسېږو یا د هغه په اړه خبرې وکړو؟
دا حالت د هغو کسانو په اړه چې خپل ډېر وخت د ټولنیزو رسنیو په لیدو کتو او یا هم د موسیقۍ په اورېدو تېروي، ډېر ښه صدق کوي. کله چې د نورو بریاوې او لاسته راوړنې ګورو، هغه له خپل ورځني حالت سره مقایسه کوو. کله چې یو څوک وینو چې په رخصتۍ تللی او یا هم د کورنۍ له غړو سره بازار د ځینو وسایلو د اخیستو لپاره راغلی، موږ یې په لیدو ناراحته کېږو.
پوهېږی، د دغه هرڅه لامل یوازې پر هغه څه تمرکز کول دي، چې موږ مینه ورسره نه لرو او بیا همدا احساس مو له کاره د زړه توروالي لامل کېږي. د دې پر ځای ښه ده چې پر هغه څه خپل تمرکز راټول کړو، چې موږ ورسره مینه لرو، څو بیا له خپل کاره څخه زړه توري نه شو.
۲– د خپل اوسني کار پر مثبتو اړخونو مو تمرکز وکړئ
د دندې او کار پر مثبتو اړخونو فکر کول د دې لامل کېږي، چې په یاد راوړو ولې مو دا کار پیل او څنګه مو انتخاب کړ. که مو د انتخاب دلیل دا و چې د اوسنۍ دندې کاري امتیاز مو له مخکینۍ هغې لس سلنه زیات دی، کاري ټایم او مسوولیت مو په وس پوره دی، دا بیا ښه خبره ده او ورځ تر بلې ستاسې مینه له کار کولو سره زیاتېږي، خو که یوازې کاري امتیاز مو په نظر کې نیولی وي، کاري چاپېریال، همکاران او مسوولیت ته مو پام نه وي کړی، هغه ده چې بیا ستاسې د زړه توروالي لامل کېږي. کله چې موږ یوازې د دندې منفي اړخونه په یاد راوړ، هغه ده چې د وخت په تېرېدو سره مو زړه ترې تورېږي. کله چې د دندې پر منفي اړخونو فکر کوو، له ځان لاندې پوښتنې کوو:
ولې په دغه موقف کې تر اوسه پاتې یم؟
ولې په دنده کې پرمختګ نه کوم؟
ولې بد کسان، پرمختګ کوي او ترفیع اخلي؟
ایا رښتیا هم دغه بد کارونه تر سره کړم؟
معمولاً داسې پوښتنې کول، د دې لامل کېږي چې زه په دغه کار کې یو ډول بند پاتې شوی یم او مجبور یم چې مخکې یې یوسم. که د کار کولو په چاپېریال کې دې ته ورته حس لری، تر هغې مو دا دنده مه پرېږدئ، څو مو چې بله نه ده پيدا کړې؛ ځکه بېکاري مو بیا تر دې ډېر ځوروي.
۳– ایا د مدیرانو لپاره بې تفاوته کار کوی؟
د مدیرانو لپاره داسې کار کول چې هغوی مو پرمختګ او بریا ته چندانې ارزښت نه ورکوي، له کاره د زړه توروالي اصلي لامل کېدای شي. د هغه لپاره چې کار کوو او هغه فرهنګ چې موږ ته یې په کاري چاپېریال کې د عملي کولو سپارښتنه شوې، له کار سره د مینې او له هغه د زړه توروالي کې مستقیماً اغېز لري. څېړنې ښيي چې ۹۲ سلنه کارکوونکي غواړي چې له مهربانه او نرم زړو مدیرانو سره کار وکړي. په کاري چاپېریال کې مهرباني د مقابل لوري د توانايۍ او احساساتو د درک په مانا ده. دا چې مهرباني له کار سره د مینې او له هغه د نفرت په اړه څومره ژور اغېز لري، یوازینی علت یې دا دی چې هرڅوک غواړي چې نوموړی/نوموړې د ومنل شي.
۴– له رییس او مدیر سره مو د خپلو هیلو او موخو په اړه خبرې وکړئ!
کله چې له رییس او مدیر سره د خپلو موخو په اړه خبرې کوو، دا وخت غواړو هغه داسې کس و اوسي چې له موږ سره مرسته وکړای شي، څو خپلو موخو ته ورسېږو. حتی که مو رییس او مدیر نه شوای کولای چې له تاسې سره موخې ته په رسېدو کې مرسته وکړي، یوازې دا چې ستاسې هیلو ته د ارزښت په سترګه وګوري هم غټه خبره ده.
له کارکوونکو سره خواخوږي تر ټولو ارزښت لرونکی حس دی. کله چې موږ د خپلو ستونزو او مشکلاتو په اړه خبرې کوو او داسې حس کوو چې مقابل لوری مو حس درک کوي او په له منځه وړلو کې یې راسره څه مرسته کولای شي، دا وخت د ښه والي او برترۍ حس کوو. بیا هم وایم، نهايي پایله ډېره مهمه نه ده چې رییس، مدیر او یا هم کوم همکار مو څومره مرسته درسره کولای شي، خو دا چې ستاسې احساس ته ارزښت ورکړي، دا ستاسې لپاره تر ټولو ښه خبره ده او همدا مو له کار او دندې سره د مینې زیاتېدو سبب کېږي.
که مو په کاري چاپېریال کې احساساتو ته درناوی نه کېده، ښه ده چې خاموش پاتې شی. دا وخت بیا له کاري چاپېریاله بیرون داسې یو ملګری او دوست ولټوئ، چې ستاسې خبرې په سړه سینه واوري.
