د ولسمشریزو ټاکنو لپاره ټاکنیز کمپاین نن پیلیږي او دوې میاشتې به دوام کوي. د ټاکنو کمېسیون له کاندیدانو غوښتي چې د یو بل له تخریب، ګډوډۍ، په پوځي ځایونو کې له کمپاین، د بهرنیو مرستو له تر لاسه کولو او دولتي امکاناتو له کارولو څخه په کلکه ډډه وکړي. کمېسیون دغه راز د نورو اصولو د مراعاتولو خبره هم کړې ده او ویلي یې دي چې ټولو قوانينو او مقرارتو ته درناوی، نورو کاندیدانو ته درناوی، په برابره توګه رسنیو ته لاسرسی، د کمپاین مودې رعایتول، د مالي راپور وړاندې کول او داسې نور هغه څه دي، چې کاندیدان باید ورته پام وکړي.
ټاکنیز کمپاین په داسې وخت کې پیلیږي چې خلک د ټاکنو پر ځای سولې ته لومړیتوب ورکوي او غوره ګڼي چې ټاکنې ونه شي او پر ځای یې له وسله والو مخالفینو سره جوړجاړی وشي. لا هم کره معلومه نه ده چې ټاکنې به وشي او که نه، خو حکومت پر ټاکنو ټینګار کوي. را روانې ټاکنې که وشي هم، پر وړاندې یې څو اساسي خنډونه شته چې ښکاري موږ به ښې ټاکنې ونه لرو. تر ګردو لویه ننګونه دا ده چې پر نیم افغانستان طالبان واکمن دي او په نیم نور کې هم په ټیټه او لوړه کچه ګواښ رامنځ ته کولی شي، نو په داسې فضا کې به ټاکنې سختې وي. له بله اړخه خلک د ټاکنو پر ځای سولې ته لومړیتوب ورکوي او په ټاکنو کې برخې اخیستو ته زړه نه ښه کوي. یوازې سوله هم نه ده، بلکې په تېرو ټاکنو کې درغلۍ او د محمد اشرف غني لخوا د خلکو په رایو ملنډې او د اساسي قانون خلاف د جان کیري پر مټ د ملي یووالي حکومت جوړول هم هغه څه دي، چې خلک یې په ټاکنو کې له ګډون څخه زړه توري کړي دي. د دې تر څنګ، سر له اوسه ښکاري چې حکومت به په پراخه کچه په ټاکنو کې لاسوهنه کوي، دولتي امکانات به کاروي، صندقونه به ډکوي او خپل واک به غځوي. له همدې امله را روانې ټاکنې یوه ناکامه حکومتي پروسه ده چې یوازې د اوسنیو چارواکو وخت غځوي.
د ټاکنو کمېسیون د اصولو د مراعاتولو خبرې کوي، خو له زورورو حکومتي کاندیدانو سره به څوک حساب کتاب وکړي. دوی به اصول مات کړي او سر له اوسه یې مات کړي، دولتي واک او ځواک کاروي او هر څه په خپله خوښه مخکې وړي. تر دې بده یې لا دا چې دوی به بیا خلکو ته دروغ وايي او بیا به د خلکو په سترګو کې خاورې شیندي. بیا به وايي چې د ننګرهار سبزي فرانسې ته وړم، د بامیانو او وردګو کچالو هالنډ ته وړم، افغانستان د آسیا پر څلور لارې بدلوم، مشاورین نه مقرروم، امنیت راولم، په واسطه خلک نه ګومارم، د مسجد او ښوونځي فاصله را لنډوم… . دوی به بیا زموږ د خلکو په پر پوهه او شعور ملنډې وهي او بیا به داسې ژمنې کوي چې د خلکو سترګو کې د خاورې شیندلو مانا لري.
رښتیا دا دي چې را روانې ټاکنې د افغانستان په زیان دي. موږ باید سولې ته لومړیتوب ورکړو او پرې نه ږدو چې د قدرت څو لونیان د خپل واک د دوام لپاره موږ پنځه کاله نور هم په وینو او وژنو کې را ګېر کړي او دوی خپل واک وغځوي.
