څنګه په کاري چاپېریال کې غیرمنطقي غوښتنې کنټرول کړو؟

ایا کله مو داسې حس کړی چې نه شی کولای کارونه مو له خپل پروګرام سره سم مخکې یوسی؟ ایا کله داسې شوي چې رییس مو د ۹۰ دقیقو لپاره تاسې ته یو ماموریت درکړی؟ ایا هره پروژه چې تاسې ته یې وړاندې کړي، تاسې یې بدون له څنګې او ولې منی؟

که مو دغو پوښتنو ته ځواب مثبت وي، ممکن داسې حس کوی چې تاسې ستړي او د کار واک مو له لاسه وتلی دی. که همداسې وي، همدا مقاله ستاسې په درد خوري. تر پایه یې ولولئ. موږ د دې مقالې په اوږدو کې درته ځینې هغه لارې چارې ښیو، چې تاسې کولای شی په ښه ډول کار وکړی، ځان ته ډېر احترام راجلب کړی او ډېره ګټه له ځان سره یوسی.

څېړنې ښيي چې په کاري چاپېریال کې فشار اصلاً د په عمر پخو همکارانو د اضطراب لامل کېږي. دا مسئله په دې نږدې څو لسیزو کې بېخي زیاته شوې ده. د دې ستونزې (په کاري چاپېریال کې غیرمنطقي غوښتنې او د کار له کنټروله وتل) اصلي لامل د ټکنالوژۍ  بې ساری پرمختګ دی؛ ځکه موږ له رسمي کاري ټیم پرته هم ان ۲۴ ساعته له کاري چاپېریال سره تړلي یو او همدا مو د ذهني ګډوډۍ لامل شوی  دی.

موږ د خپلو کړنو په واسطه نورو ته ښيو چې هغوی له موږ سره څنګه عمل وکړي. که غواړی چې له همکارانو سره مو ښه ناسته ولاړه ولری، لاندې سپارښتنې له یاده مه باسئ:

۱- خپل کاري حد مو معلوم کړئ

له رییس او مدیر څخه د خپل کاري حد معلومول په کاري چاپېریال کې ستاسې عزت او له همکارانو سره نېکه اړیکه روغه ساتي. کن بلانچارد د (یوې دقیقې مدیر) کتاب لیکوال وايي: «د کار په لومړیو کې مو هم تاسې او هم رییس د هغه کار نوملړ برابر کړئ چې له مخې یې تاسې د هغه پر سرته رسولو مکلف شوي یی». دا له تاسې د خپل وخت او انرژۍ په کنټرول کې مرسته کوي. بلانچارد وايي، د فهرست له برابرولو وروسته مو کارونه اولیت بندي کړئ او د هغه په اړه مو له رییس سره خبرې وکړئ.

۲- خپل کړه وړه مو و ارزوئ

له رییس څخه د مرستې غوښتلو سربېره، په کاري چاپېریال کې د خپلې ناستې ولاړې ارزونه هم د روښانه حدودو په ټاکلو کې مرسته کوي.

خپل همکاران او هغه ارګان چې تاسې پکې کار کوی، ښه وپېژنئ، که نه، هغه ستاسې لپاره پر یو فشار اوړي. مانا دا چې بیا هېڅ نه شی کولای چې د هغوی له غوښتنو سره په یو وخت کې ځان عیار کړی. دا په یاد ساتئ، که پوه شوی چې دغه موارد ستاسې لپاره د غوسې، کرکې او د ګناه د حس لامل شول، باید چې د هغه په اړه په سړو ماغزو فکر وکړئ او ځان له هغو سره جوړ راولی. که ممکن تاسې ورسره جوړ نه شوای راتللی، ښه ده چې بله دنده ځان ته ولټوئ.

۳- حدود وټاکئ

کله چې درته روښانه شوه چې پر کومو مواردو باید تمرکز وکړی، بیا د هغه لپاره حدود وټاکئ. د بېلګې په ډول، د ماښام له ۶-۹ بجو ځګه ایمیل مه چکوئ، چې دا وخت تاسې د خپلې کورنۍ له غړو سره یاستی. کېدای شي دا ستاسې لپاره یو حد وي. کېدای شي دا هم ستاسې لپاره یو بل حد وي، چې رییس یا مدیر ته مو ووایی، چې د کاري سفرونو په اړه دې تاسې یوه اونۍ مخکې خبر درکړي، څو وکړی شی هم کاري او هم کورني مسایل سره همغږي کړی.

۴- واضح خبرې وکړئ

د پولې له ټاکلو وروسته باید د هغه په اړه روښانه، واضح او په پوره باور له خپلو همکارانو سره خبرې وکړئ. د بېلګې په ډول، که نه غواړی چې هر وخت د همکار له تاسې سره اړیکه ونیسي، هغه ته روښانه کړی چې کوم وخت کولای شي له تاسې سره اړیکه ونیسي. که نه غواړی چې د اونۍ پای او یا هم د رخصتۍ ورځو کې دې تاسې ته زنګ ووهي یا دې یو ځای ته د تللو او چکر وهلو په اړه تاسې ته خبر درکړي، ښه ده چې هغوی ته ووایی کوم ځای ته تلل مو خوښېږي او کوم ته نه. که مو ځینې ملګري او همکاران ستاسې حدونه نادیده نیسي، تاسې پر خپلو خبرو تاکید وکړئ او له هغه مه په شا کېږی.

۵– ښه رهبري وکړئ

که په یوازې ځان د ۵۰ کسانو کار کوی او په هر کار کې د ستړیا حس کوی، پوه شی چې تاسې په رهبرۍ کې  ستونزې لری، خو ستاسې لپار ښه خبره دا ده چې دا مهارت زده کېږي. دا په یاد ساتئ هر کار ته لاس مه اچوئ، یوازې پر کاري ټیم باور وکړئ او د هغه له وړتیا ګټه واخلئ.

۶– له خبرو کولو مخکې یو څه مکث وکړئ

له هغو (هو) ویلو ځان ساتل چې بیا وروسته سړي ته په سرخوږي اوړي، یو مهارت په خبرو کولو کې مکث دی.

د بېلګې په ډول، مخکې له دې چې رییس مو یو نوی ماموریت درته وسپاري، تاسې له ځواب ورکولو مخکې د ځواب په اړه لږ مکث وکړئ. دا کار تاسې ته دا چانس په لاس درکوي چې پر خپله برنامه مو مرور وکړئ او وګوری چې ایا ستاسې له لومړیتوبونو سره اړخ لګوي او که نه. که لازمه وي، ښه ده چې یو څه وخت وغواړئ او ووایی: «ممکن وکړای شم، اجازه راکړی چې پر خپلو کارونو یو ځل فکر وکړم، وروسته تاسې ته خبر درکوم».

۷- نه ویل تمرین کړئ

د (۱۸ دقیقې) کتاب لیکوال برګمان وايي، د ځینو کړنو او مسوولیتونو اخیستو لپاره (نه) ووایئ. د بېلګې په ډول، د هغه مسوولیت اخیستو ته نه ووایئ چې ستاسې په زړه نه دی جوړ. هغه پلورونکي ته نه ووایئ چې په لاسونو کې څیزونه خرڅوي. یوازې ژوند کولو ته نه ووایئ. کېدای شي په لومړیو کې دا کار درته ښه ښکاره نه شي، خو داسې نه ده، همدا نه ویل ډېری وخت تاسې ته چانس او ارام په لاس درکوي.

۸- یو مهالوېش ولرئ

د اوږدو مجلسونو او له رییس سره د خبرو لپاره مهالوېش جوړ کړئ. د مهالوېش جوړولو یو اصل د لومړیتوبونو پېژندل دي. د کاري چاپېریال په اونیزو او مهالنیو جلسو کې ګډون وکړئ او د اجنډا په اړه یې له مخکې ځان خبر کړئ. که غواړی په کاري چاپېریال کې ښه کنټرول ولری، ښه ده چې ان د راتلونکې ورځې په اړه د شپې مخکې له دې چې د خوب کټ ته لاړ شی، لس دقیقې فکر وکړئ.

۹- له نورو د منفي خبرو د اورېدو زغم ولری

ځان ته د حدودو له ټاکلو وروسته د نورو عکس العملونو او منفي خبرو ته سینه سپر کړئ. له دې کړنې سره به حتماً مخکې کېږی، خو له خپلو حدودو په شا نه شی. اورېدلي به مو وي، هره بریا لومړی نادیده بلل شوې، بیا مسخره شوې او وروسته نمانځل شوې ده.

د پای خبره

هغه کسان چې په کاري چاپېریال کې د ځان لپاره حد او پوله لري، خوشاله او تر نورو زیات ګټونکي دي. دې ډول کسانو ته نور خلک احترام کوي، ځکه دوی ځان ته په احترام قایل دي.

د حد او پولې ټاکل مانا له ځان سره بې سارې مینه کول، داسې مینه چې کېدای شي، ځینو بخیلو کسانو ته په رنځ هم واوړي، خو تاسې د هغوی په اړه فکر مه کوئ، هغوی د خدای له دې رنځه مړه کړي. زموږ ارزښت د نورو په تایید کې نه دی. که د زړه له کومې او په پوره مینه د خپل ځان احترام وکړو، کولای شو نورو ته ووایو، نور بس دي!!