وړمه شپه طالبانو یو ځل بیا د کندوز ښار د نیولو هڅه وکړه. طالبانو د ښار څنډې ونیولې، خو ټول ښار یې لاندې نه شو کړلی. پرون ټوله ورځ جګړه وه او وېره ده چې دا جګړ به دوام وکړي. په دغه جګړه کې د دواړو اړخونو تر څنګ ملکي وګړو ته هم مرګ ژوبله اوښتې ده، خو کره شمېره یې معلومه نه ده. تر دې وړاندې هم طالبانو څو ځله کندوز ښار ګواښلی و او دوه ځله توانېدلي وو چې ټول ښار ونیسي. د ۲۰۱۵ ز کال په اکټوبر کې طالبان وتوانېدل چې دا ښار ونیسي. دا د طالبانو په ۱۴ کلنه جګړه کې لومړی ځل و چې دوی د یوه ولایت مرکز نیسي. که څه هم طالبانو ښار ونه شو ساتلی، خو څو ورځې یې په کنټرول کې و او داسې ښودل کېدله چې دا د طالبانو ستره بریا ده. له دې پېښې وروسته یو ځل بیا طالبانو د ۲۰۱۶ ز کال په اکټوبر کې پر کندوز ښار برید وکړ او لویه برخه یې ونیوله.
حکومت له دغو دواړو پېښو وروسته د عامه ذهنیت تر فشار لاندې و. حکومتي مشرانو او ویندویانو بیا بیا په کندوز کې د بدلونونو، اصلاحاتو او پرمختګونو خبره وکړه، خو دا دی کندوز لا هم له ګواښ سره مخ دی. ولسمشر غني کندوز ته ولاړ او هلته یې نه یوازې په امنیتي سکټور کې د پراخو اصلاحاتو ژمنې وکړې، بلکې ویې ویل چې ملکي حکومت ته به هم پام کوي، نوي اداري جوړښتونه به رامنځ ته کوي، د بیا رغونې پروژې به عملي کوي او کندوز به د منځنۍ اسیا پر څلور لارې بدلوي.
دا دی نه یوازې په کندوز کې د پام وړ کار ونه شو او هغه ژمنې عملي نه شوې، بلکې کندوز لا هم له ګواښ سره مخ دی. اوس که چارواکي وايي چې طالبان یې په شا تمبولي او وژلې یې دي، دا د کندوزیانو ستونزه نه شي حل کولی. کله چې طالبان پر ښار برید وکړي، د ښار یوه برخه ونیسي، آن مرکزي روغتون ته را ورسیږي، د پولیسو او اردو د تسلیمۍ ویډیوګانې خپرې کړي، په ښار کې وېره خپره کړي، خلک له ښاره په تښته شي، ښار بند شي، لویې لارې وتړل شي او خلکو ته مالي او ځاني زیانونه واوړي، نو بیا د طالبانو ماتول، په شا تمبول او نورې لویې خبرې هېڅ مانا نه لري. له بده مرغه چې حکومت لا هم د کمزوري مدیریت او د امنیتي ځواکونو په رهبرۍ کې د ستونزو له امله کندوز له ستونزو سره مخ کړی او نه دي توانیدلي چې دا ښار خوندي کړي.
له بله اړخه طالبان هم باید پوه شي چې د سولې د خبرو په منځ کې پر ښارونو برید، د خلکو وېرول، وژل، ټپي کول، ځورول، مالي او ځاني زیان ور اړول، نه د سولې په ګټه دي او نه هم خپله د طالبانو په ګټه دي. پر ښارونو برید او په کوڅو او ښار کې جګړه کټ مټ هغسې ده، لکه ګډ ځواکونه چې د شپې پر کلیو ورکوزېږي، وحشت خپروي، خلک وژني او ورانی کوي. له همدې امله پکار ده چې په سوله کې د حسن نیت په پار له دغه ډول بریدونو څخه ډډه وشي.
