یو ځل (ادګار واټون هاو) د ټوکې په ډول وویل: «که خلک پر دې پوه شي چې له تاسو وروسته ورته د خبرو وار نه رسېږي، هېڅکله مو خبرو ته غوږ نږدي». له بده مرغه دا خبره د ډېرو په حق کې صدق کوي. ځینې کسان دومره د خبرو کولو لېوال دي چې د نورو خبرو ته هېڅ غوږ نږدي. د غوږ نیونې وړتیا په اصل کې په نورو کې د نفوذ کولو کیلي ده.
ارواپوه ډاکټر جویس برادرز وایي: «غوږ نیول تر ټولو صمیمانه چاپلوسي او غوړمالي ده». کله چې تاسو د خلکو خبرو ته غوږ نږدی، د دې ښکارندویي کوي چې اصلاً درته ارزښت نه لري، خو کله چې د یو چا خبرو ته غوږ ږدی، دا ثابتوی چې درناوی ورته لری. ان دا چې غوږ نیول له درناوي لوړ ارزښت دی، چې تاسو یې مقابل کس ته ورکوی. الماني الاصله فیلسوف پال تلچ وایي: «د مینې یوه دنده غوږ نیول دي». تر ټولو لویې تېروتنې چې خلک یې د دوو اړخیزو خبرو پر مهال کوي دا دي، چې ډېرې خبرې کوي څو ځان هوښیار معرفي کړي. خو که غواړی په رښتیا سره د یو چا زړه خپل کړی او اغېز پرې وکړی، خبرو ته یې په پوره دقت غوږ کېږدئ، علاقه ورسره وښایاست او داسې و انګېرئ چې ګواکې تر اغېز لاندې یې راغلي یاست. مشهور شاعر او فیلسوف والدو امرسون وایي: «زه چې له هر چا سره مخ کېږم، په یو ډول له ما ښه دي او یو څه ترې زده کوم». دا خبره په یاد لرئ او له هر چا یو څه زده کړئ. په دې ډول سره د دوه اړخیزې اړیکې لپاره دروازه پرانیستل کېږي.
دیل کارنګي وایي: «که نورو ته په پوره دقت غوږ کېږدی، کولی شی د دوو اونیو په موده کې د دوو کلونو په کچه اغېز وکړی». کارنیګي هغه څوک و چې د اړیکو جوړولو په برخه کې یې پوره وړتیا درلوده، نوموړي په دې برخه کې یو کتاب هم لیکلی دی. هغه په دې اند و، هغه کسان چې ډېرې خبرې کوي په ندرت له نورو سره یوه قوي اړیکه جوړولی شي. ډیوډ شوارتز (د لوی فکر جادو) په کتاب کې لیکي: «لوی خلک غوږ نیول انحصاروي، خو کوچنیو بیا خبرې کول انحصار کړي وي».
د غوږ نیولو په وسیله کولی شو د ژوند په بېلابېلو برخو کې له نورو سره قوي او ژورې اړیکې جوړې کړو؛ ځکه غوږ نیول اړتیاوې پوره کوي. مشهور لیکوال نیل سټريټ وایي: «هر څوک غواړي خبرو ته یې غوږ ونیول شي». کله چې تاسو ښه غوږ نیوونکي اوسی، له مقابل اړخ سره مرسته کوی. نو کولی شی تاسو د هغوی په ژوند کې یو اغېزناک کس واوسی.
ویلسون میزنر وایي: «ښه اورېدونکی نه یوازې پر ټولو ګران وي او درناوی یې کوي، بلکې ډېر شیان زده کوي». حیرانوونکې ده، کله چې نورو ته غوږ ږدی، څومره شیان د ځان، کورنۍ، دوستانو او یا هغه ځای په اړه زده کوی چې په کې کار کوی. داسې فکر مه کوئ چې ګواکې پر هر څه پوهېږی. هېڅوک داسې نشته چې پر ټولو شیانو دې پوه شي او یا پر یو وخت د ټولو شیانو د زده کولو هڅه وکړي. ټول هغه کسان چې نن په خپل مسلک کې پیاوړي او رسېدلي دي، هغوی د ښه ډېر وخت لپاره اورېدلي او ښه اورېدونکي پاتې شوي دي. د لوړ پوړو کسانو یوازینۍ ستونزه دا ده چې لږ اوري، هغه هم د هغو کسانو په اړه چې دوی ته باید راپور ورکړي. له بده مرغه نن سبا زموږ په ټولنه کې دا عام شوي، چې څومره یې موقف لوړېږي، لږ اوري او ډېر وایي. اصل خبره دا ده چې کله یو څوک یوه موقف ته رسېږي، هغه باید ډېر واوري. ځکه دوی د څار په ساحه کې لږ حاضرېږي، نو د دې لپاره چې له هر څه خبر شي، باید د اړوندو کسانو خبرې واوري.
نوي نظرونه او افکار له موږ سره مرسته کوي، چې د زړو ستونزو لپاره حللارې پیدا کړو، نوي توکي تولید کړو او خپل کارو بار پراخ کړو.
د پخواني یونان مشهور فیلسوف پلوتارک وایي: «غوږ نیول زده کړئ، په دې سره ان که خبرې کوونکی بدې خبرې هم وکړي، یو شی زده کوی». که کله هم د نویو شرکتونو په اړه فکر وکړو، هغه چې نه تمامېدونکي نظرونه او ایډیاګانې له ځان سره لري، له ځنډ پرته مو ۳- ام شرکت ذهن ته راځي، هغه شرکت چې تر بل هر چا مخکې نوي توکي بازار ته وړاندې کوي. دا شرکت ځکه دومره مشهور او بریالی دی، چې د کارکوونکو خبرې د زړه په غوږو اوري او د خپلو پېرودونکو نظرونو او خبرو ته ارزښت او لومړیتوب ورکوي. د دې شرکت یو مسوول وایي: «زموږ د شرکت د بریا او پرمختګ راز د مشتریانو په شکایتونو کې دی». ښه شرکتونه په دې مشهور دي چې د خپلو کارکوونکو او مشتریانو خبرو ته غوږ ږدي. هغه څه چې د یوه شرکت په اړه صدق کوي، د اشخاصو په اړه یې هم کوي. کله چې په پر له پسې او دایمي ډول د خلکو خبرو ته غوږ کېږدی، هېڅکله هم د نظرونو له کمښت سره نه مخ کېږی.
کله چې تاسو د نورو خبرو ته غوږ نه ږدی، هغوی هڅه کوي څو داسې یو کس د ځان لپاره د ملګري په توګه پیدا کړي، چې خبرې یې د زړه په غوږو واوري. کله چې کارکوونکی، د ژوند ملګری، همکار، زوی او یا نور دوستان پر دې پوه شي چې خبرې یې درته ارزښت نه لري او غوږ نه ورته ږدی، اړ کېږي چې د ځان لپاره بل څوک پیدا کړي. چې ډېری وخت دغه څه د ملګرتیا د ختمېدو، په کار ځای کې د واک او اختیار له لاسه ورکولو، د نفوذ د کمېدو او ان د خاوند او مېرمنې تر منځ د بېلېدو لامل کېږي چې دا ټول زړه بوږنوونکې پېښې دي. که تاسو ښه اورېدونکي او غوږ نیوونکي اوسی، خلک به مو خواته جذب کړی. مشهور لیکوال او ارواپوه کرل منینګر وایي: «هغه ملګري چې زموږ خبرو ته غوږ نیسي، هغه څوک دي چې موږ یې خواته جذبېږو». ښه اورېدونکی د هر چا خوښېږي، خو که په دایمي ډول د یو چا لپاره د ښه اورېدونکي او غوږ نیوونکي په توګه پاتې شی، هغه به مو د یوه وفادار ملګري په توګه د ټول عمر لپاره هېر نه کړي.
راجر ایمهوف وایي: «پرېږدئ چې خلک در باندې باور وکړي او د زړه راز درته ووایي. ښکاره ده چې دوی به په دې کار سره له تاسو سره مرسته ونه کړي، خو له ځان سره به یې مرسته کړې وي». په لومړي سر کې کېدای شي غوږ نیول داسې درته ښکاره شي، چې له مقابل کس سره مو مرسته کړې ده، خو ښه اورېدونکي واوسئ. د وخت په تېرېدو سره به پوه شی چې پر هغوی سربېره مو له ځان سره هم مرسته کړې ده، له خلکو سره به مو اړیکه جوړه کړې وي، مهم معلومات به مو تر لاسه کړي وي. هغه وخت بیا کولی شی خپل او د نورو احساسات او افکار سره پرتله او درک کړی.
