وسله والو طالبانو ته نږدې سرچینې وايي، د دې ډلې مشرانو منلې چې له امریکا سره له هوکړې وړاندې به اوربند کوي. ځیني سرچینې دا اوربند لس ورځنی او ځینې نور یې اووه ورځنی ګڼي. طالب ویاند هم وايي چې په دې اړه بحثونه او مشورې روانې دي او له نهايي کېد وروسته به یې رسمي اعلان کوي. د ذبیح الله مجاهد له خبرو ښکاري چې اوربند کېدونکی او اعلانېدونکی دی او ژر به عملي شي.
په افغانستان کې د جګړې ختمول او اوربند د افغانستان د خلکو اساسي هیله او غوښتنه ده، نو ځکه خلک ورته خوشاله دي او هرکلی یې کوي. دا ګام په واقعي مانا ښيي چې د جګړې ښکېل لوري مثبت ګامونه اخلي او دا د سولې په برخه کې یو ستر ګام دی. خلک په تمه ده چې اوربند ژر عملي شي او بیا ورپسې دایمې سوله وشي. د دې مثبت ګام له ملاتړ او هر کلي سره سره پکار ده چې څو اساسي اندېښنو ته جدي پام وشي.
لومړی دا چې دا اوربند باید هر اخیز وي او له ټولو اړخونو سره وي. که اوربند له یو اړخ سره کېږي او بل اړخ هېرېږي، نو بیا ښايي نوې ستونزې پیدا شي او د سولې خبرې له خنډ او ځنډ سره مخ کړي.
دویم دا چې ښکېل اړخونه باید رښتیني وي. وېره ده چې ښايي امریکا له طالبانو سره اوربند د دې لپاره کوي، چې بیا په پټه د خپلو استخباراتي کړیو او ډلو پر مټ ځیني بریدونه وکړي. ښايي دا بریدونه طالبانو ته منسوب شي او یا یې هم له طالبانو سره تړلي ځینې اشخاص او کړۍ مسوولیت هم واخلي. دا اندېښنه شته چې امریکا په دې اوربند کې رښتینې نه وي او بیا هم دسیسه او توطیه کوي. که داسې څه وي، نو بیا وېره شته او پکار ده چې سره له اوسه ورته پام وشي.
درېیم دا چې ښايي ځینې نورې کړۍ د اوربند د ګډوډولو او ماتولو هڅه وکړي. د سولې روانې خبرې دواړو اړخونو ته دښمنان لري. دا هم رښتیا ده چې یو درېیم او څلورم اړخ به هم وي چې غواړي دا خبرې له خنډ او ځنډ سره مخ شي او جګړه دوام وکړي. له همدې امله دوی به هڅه وکړي چې په بریدونو او چاودنو سره دا اوربند ګډوډ کړي او د سولې په برخه کې دا ستره لاسته راوړنه خرابه کړي.
ځینې نورې اندېښنې هم شته، خو پکار ده چې سر له اوسه ورته پام وشي. لومړی باید رښتینولي وي، اوربند باید هر اړخیز وي او بل دا چې ښکېل اړخونه په ګډه کار وکړي چې د هغو کړیو مخه ونیسي، چې د اوربند د ګډوډولو هڅه کوي. له بله اړخه دا هم باید له وړاندې ومنل شي چې که کومه پېښه کېږي، چېرته برید یا چاودنه کېږي، ښکېل اړخونه باید ژوره همغږي ولري. یوه پېښه چې ښايي د سولې او اوربند دښمنانو کړې وي او یا هم تېروتنه او ناسم پوهاوی وي، باید د دې سبب نه شي چې ټول اوربند او دا ستره لاسته راوړنه خرابه کړي. له همدې امله د بریدونو شونتیا باید هېره نه شي، د مخنیوي لپاره یې همغږي وي او یوه پېښه باید هر څه ګډوډ نه کړي.
