د امریکا او طالبانو تر منځ د سولې هوکړه څو میاشتې وړاندې نهايي شوې او یوازې لاسلیک یې پاتې دی. د دې هوکړې لاسلیک کله د ټرمپ پر یوه ټویټ وځنډېږي او کله هم د امریکا له خوا نوې غوښتنې د خنډ او ځنډ لامل شي. کله طالبان پر یوه خبره کلک ولاړ وي او دریځ یې نه نرمېږي او کله هم د ملي یووالي حکومت یو مخ دا پروسه مردود ګڼي. اوس امریکا له طالبانو د اوربند غوښتنه کوي، خو طالبان د تاوتریخوالي د مشروط کمولو خبره کوي. حکومت نه یوازې د سولې په دې پروسه کې کومه مرسته نه کوي، بلکې له افغان اړخه د پلاوي په ټاکلو کې ځنډ کوي او نورې ستونزې جوړوي. په دې سره د سولې روانې خبرې له ستونزو او خنډونو سره مخ دي. که څه هم د سولې هوکړه نهايي شوې او د بین الافغاني خبرو لپاره هم ژمنې شوې دي، خو بیا هم پایله ځنډېږي.
څومره چې د سولې د هوکړې لاسلیک او سوله ځنډېږي، همدومره د افغانانو وژنې او ځورونې دوام کوي. همدومره د افغانستان وراني او د افغانانو بدبختي اوږدېږي. د جګړې درېدل له ښکېلو اړخونو ډېر د ولس او عامو خلکو غوښتنه او اړتیا ده. د جګړې تاوان ولس ته رسېږي او د سولې ګټه به هم ولس ویني. له همدې امله ولس غواړي چې دا جګړه ژر ختمه شي او د سولې هوکړه لاسلیک شي. د دې لپاره چې د ولس دا غوښتنه عملي شي، نو پکار ده چې ولس هم یو کار وکړي. که څه هم ولس په جګړه کې دی، وژل شوی او ځپل شوی، خو دا ځل دې یو متفاوت ګام واخلي. ولس ته پکار ده چې د جګړې پر ښکېلو اړخونو یو پراخ فشار راوړي. همدا د فشار راوړلو لپاره مناسب وخت دی او له شک پرته چې ولسي فشار د سولې پر وړاندې خنډونه له منځه وړلی شي او ښکېل اړخونه مجبورولی شي چې خپل دریځونه نرم کړي او د سولې هوکړه لاسلیک کړي. ولس دې اوس پر دریو اړخونو فشار راوړي. تر ګردو لومړی پر امریکا او ملګرو یې پراخ فشار پکار دی، ځکه چې هوکړه نهايي شوې، خو امریکا یې له لاسلیک ځان غړوي. له همدې امله پکار ده چې د پراخو لاریونونو او غونډو له لارې له امریکا وغوښتل شي چې د سولې هوکړه لاسلیک کړي. دویم پر طالبانو فشار پکار دی چې د سولې په برخه کې لا زیات نرمښت وښيي او له خپلو ځینو هغو شرطونو تېر شي چې په کور دننه د ستونزو سبب ګرځي. درېیم ولسي فشار باید د ملي یووالي پر حکومت وي. له حکومته باید وغوښتل شي چې د سولې په برخه کې مزاحمتي رول ختم کړي، د بین الافغاني خبرو لپاره ژر تر ژره د حکومت او نورو افغانانو ګډ پلاوی وټاکي او خپلې بې ځایه سرې کرښې او شرطونه ختم کړي.
له شک پرته چې یو پراخ ولسي فشار د سولې په برخه کې د شته خنډونو په له منځه وړلو کې مرسته کولی شي. له همدې امله اوس د ولسي فشار وخت دی. هغه سیاستوال، سیاسي ګوندونه او فعالین چې پر ولس یې زړه درد کوي، همدا یې وخت دی چې د خلکو د را ټولولو او د دغه مثبت فشار د ایجاد هڅه وکړي.
