په دې ورځو کې په کابل کې هر سړی له غلاوو او شوکو شکایت کوي. هره ورځ له دوستانو او خپلوانو څخه اورو چې غلو وهلي، موبایل، پیسې، موټر او نور توکي یې ترې وړي دي. تازه په کابل کې د غلو له خوا د څو کسانو د وژنې خبرونه هم خپاره شوي دي. پولیس د تل په څېر د پېښو د مخنیوي ژمنې کوي، خو غلاوې همداسې زیاتېږي.
په کابل کې غلاوې او شوکې بیخي عامې شوې دي. پر عمومي سړک، په موټر کې، په عمومي او فرعي کوڅو کې، د جومات په دروازه او هر ځای کې خلک له غلو سره مخ کېږي، لوټل کېږي، وهل کېږي او آن وژل کېږي. خبره یوازې د کوڅو او پس کوڅو نه ده، د پولیسو د پوستو او حوزو په څنګ کې غلاوې کېږي او خلک لوټل کېږي. پخوا به خلکو د شپې له خوا ځان ساته، ځکه چې غلاوې به ډېرې ناوخته او یا هم د شپې له خوا کېدلې، خو اوس د ورځې په هر وخت کې، سهار، غرمه او مازیګر غلاوې کېږي. اوس خلک له وېرې یا موبایلونه او پیسې نه ګرځوي او یا هم په سختۍ له کورونو وځي، آن داسې هم شوي چې که له چا سره ټلیفون یا پیسې نه وي، نو غلو له دې امله وهلي ډبولي چې ولې پیسې او موبایلونه نه ګرځوي. په کابل کې، د کابل پر کوڅو او سړکونو اوس په واقعي مانا د غلو واکمني ده، داسې لکه حکومت چې د دوی واکمني په رسمیت پېژندلې وي او سړکونه او کوڅې یې همدوی ته ور پرې اېښي وي. اوس په کابل کې داسې حالت دی، لکه پولیس چې یوازې د دولتي ودانیو د ساتنې مسوول وي او له دولتي ودانیو د باندې ساحه یې یو مخ غلو ته پرې اېښې وي.
خلک پولیس پړه بولي، په ځینو پېښو او ځایونو کې پولیس له غلو سره پر همکارۍ تورنېږي. داسې ډېرې پېښې شوې دي چې خلکو غله نیولې، پولیسو ته یې سپارلي، خو وروسته پولیسو نیول شوي غله بېرته خوشي کړي دي. له همدې امله خلک ځیني پولیس چارواکي په پېښو کې شریک ګڼي. که د شراکت په اړه ډېر اسناد او شواهد نه وي، خو پولیس له بده مرغه د دغو پېښو پر وړاندې بې تفاوته دي. د مخنیوي لپاره یې نه کوم پلان او پروګرام لري او نه هم اراده. له همدې امله غلاوې او شوکې ورځ تر بلې زیاتېږي.
اوس د کورنیو چارو وزارت وايي، ژر به پراخ اصلاحات راولي او حالت به بدل شي. دوی بیا د یوې نوې تګلارې خبرې کوي چې په خبره یې بشپړه شوې او عملي به شي، خو خلک ډېر ډاډه نه دي چې حالت به ښه شي. تر هغو چې په پولیسو کې ژور بدلونه را نه وړل شي، تر هغو چې د کابل د حوزو چارواکي د قوانینو پر اساس ونه ټاکل شي او تر هغو چې دوی خلکو ته ځواب ویونکي نه وي، همدا غلاوې او شوکې به دوام کوي او ورځ تر بلې به زیاتېږي. خلک د حکومت له خوا نور د تشو ژمنو پر ځای قوي اراده او عملي ګامونه غواړي، څو د غلو دا واکمني ختمه شي.
