پرون په کابل کې ځینې سیاستوال را غونډ شوي وو او د افغانستان د سولې په تړاو یې د یوې طرحې د وړاندې کولو ژمنه وکړه. دې غونډې ته پخوانی ولسمشر حامد کرزی او اجرایه رییس ډاکټر عبدالله هم ورغلي وو. په غونډه کې ډېری ګډونوالو ویل چې که حکومت د سولې مخالفت کوي، نو دوی به خپله طرحه ولري او دا طرحه به عملي کوي. دوی ټولو پر یوه خوله پر سوله ټینګار کاوه او له دریځه یې ښکارېدله چې دوی د حکومت د سولې له تګلارو خوښ نه دي او غواړي چې له خپله اړخه یو حرکت پیل کړي.
دغه سیاستوال چې ډېری یې څه ناڅه ولسي ملاتړ هم لري، له هغه وروسته د سولې په برخه کې له خپله اړخه د ګام اخیستلو ژمنه کوي، چې حکومت د سولې پروسې پر مخالفت تورنیږي. که څه هم حکومت د سولې د مخالفت خبره ردوي، خو په تېرو ولسمشریزو ټاکنو کې د ولسمشر لومړی مرستیال امرالله صالح په ښکاره د سولې مخالفت کوي او وايي چې که امریکا له طالبانو سره توافق لاسلیک هم کړي، له طالبانو سره جګړه به دوام کوي. طالبان هم حکومت پړ ګڼي چې د سولې په لاره کې خنډونه جوړوي او آن د افغان سولې لپاره د امریکا ځانګړي استازي زلمي خلیلزاد هم څو څو ځله حکومت پر ناغېړۍ تورن کړی او ویلي یې دي چې له پرله پسې غوښتنو سره سره د بین الافغاني خبرو لپاره د ولسمشر غني له خوا پلاوی نه ټاکل کېږي.
په افغانستان کې د حکومت له اړخه باید په هېڅ ډول د سولې مخالفت نه وي، ځکه سوله د ولس اساسي غوښتنه ده او څوک یې چې مخالفت کوي، د افغان ولس اصلي دښمن دی. حکومت او بل هېڅوک باید سولې د پروسې مخالفت ونه کړي. له افغانستان څخه باید یوازې یو غږ وي او هغه د سولې د غوښتنې غږ. دا غږ باید دومره پیاوړی وي چې امریکا، طالبان او نور اړخونه تر فشار لاندې راولي او اړ یې کړي چې ژر سوله وکړي. که څه هم ټول ولس سوله غواړي، خو له بده مرغه له افغانستان څخه دا غږ نشته او یا هم ډېر کمزوری دی. تر دې بده خو یې لا دا چې له افغانستان څخه او آن د حکومت له منځ څخه د سولې ضد غږونه پورته کېږي. که څه هم دا غږونه لکه زهر په شاتو کې ګډېږي، خو خلک یې درک کوي چې دا زهر دي او په شاتو کې ګډ شوي دي. ځیني خو لکه امرالله صالح دا زهر په شاتو کې هم نه ګډوي او مخامخ یې غواړي پر خلکو وخوري.
له حکومت څخه د سولې د مخالفت غږ واضح دی، اوس پکار ده چې د دې غږ پر ضد پراخ ولسي غږ پورته شي. د کابل په پرونۍ غونډه کې د را ټولو شوو سیاستوالو د تېر په هېرولو سره دا یو ښه ګام دی او باید لوی، ولسي او پیاوړی شي. په حکومت کې د سولې مخالفین، محمد اشرف غني، امرالله صالح او د سولې نور مخالفین باید درک کړي چې ولس سوله غواړي او د دوی د سولې ضد دریځ پر وړاندې غلی نه پاتې کېږي. سوله د ولس غوښتنه ده او هر څوک چې د دې غوښتنې پر ضد ودریږي، د ولس دښمنان دي او ولس به یې پر وړاندې په جدیت ودریږي.
