د افغان سولې لپاره د امریکا ځانګړی استازی زلمي خلیلزاد په کابل کې دی او دلته یې له حکومتي او سیاسي مشرانو سره لیدلي دي. ارګ وايي، خلیلزاد ورته ویلي چې له طالبانو سره په خبرو کې پرمختګ نه دی شوی، خو پخوانی ولسمشر حامد کرزی وايي چې خلیلزاد له طالبانو سره په خبرو کې له پرمختګ څخه خوښي څرګنده کړې ده.
د سولې د خبرو په اړه چې څه واضح دي، هغه دا دي چې اوس په دې خبرو کې پرمختګ نشته او له یوه خنډ او ځنډ سره مخ دي. طالبان وايي چې امریکا وخت ضایع کوي او طالبانو ته نوي شرطونه وړاندې کوي. امریکا له طالبانو غوښتي وو چې تاوتریخوالی کم کړي، طالبانو له خپلمنځي مشورو وروسته همدا پرېکړه وکړه، خو امریکا له طالبانو نوې غوښتنې کړې دي. دا چې دا نوې غوښتنې څه دي، معلومه نه ده، خو طالبان له دې امله غوسه دي چې خلیلزاد نوې غوښتنې کوي او یا پر داسې مسایلو بحث کوي چې یوازې ورسره وخت ضایع کېږي.
له دې سره د امریکا له اړخه په بریدونو کې بې ساری زیاتوالی راغلی دی. له څو میاشتو نسبي ارامۍ وروسته امریکايي ځواکونو په کلیوالو سیمو کې خونړي بریدونه کړي، ښځې او ماشومان یې وژلي دي. دا په واضح ډول د سولې ضد او د جګړې د دوام پیغام دی. که څه د طالبانو له اړخه په ښارونو کې چاودنې او لوی بریدونه نه دي شوي، خو وېره ده چې که هوايي بریدونه دوام وکړي، طالبان به هم دا بریدونه بېرته پیل کړي. په دې سره یو ځل بیا ملکي مرګ ژوبله زیاتېږي او جګړه ګرمېږي. د جګړې دا شدت مخامخ د سولې پر پروسه منفي اغېز کوي. هغه پرمختګونه له منځه ځي چې تر اوسه پورې شوې دي. د دې ترڅنګ د باور او حسن نیت فضا لا زیاته خرابېږي او دواړه لوري به د خپل قوت د ښودلو لپاره لا زیات پر جګړه، وژنو او بریدونو ټینګار وکړي.
له همدې امله دغه حالت ته یو پیاوړی غبرګون پکار دی. اوس داسې ښکاري چې د سولې خبرې په واضح ډول د امریکا له خوا له خنډ او ځنډ سره مخ شوې دي. له همدې امله پکار ده چې پر امریکا فشار راشي. لومړی باید طالبان له خلکو سره جزیات شریک کړي او د امریکا د نوو غوښتنو په تړاو معلومات ورکړي. له هغه وروسته باید افغان سوله غوښتونکي سیاستوال او خلک په ګډه امریکا ته یو واضح پیغام ورکړي او هغه دا چې د افغانستان ولس سوله غواړي او که امریکا دا سوله نه کوي، نو خلک به د سولې لپاره پر نورو لارو چارو فکر او کار وکړي. خلیلزاد ته باید همدا پیغام ورکړل شي چې خلک نور دا امریکايي جګړه، وحشت، وژنې او د بې ګناه خلکو قتل عام نه شي زغملی. له همدې امله باید له طالبانو سره شوې هوکړه نهايي کړي او لاسلیک یې کړي. له دې پرته خلک درک کوي چې د سولې پر وړاندې اصلي خنډ امریکا ده او خلک به بیا په افغانستان کې د امریکايي حضور پر ضد په کلکه ودرېږي او د سولې دا خنډ به له منځه یوسي.
